RSS

Monthly Archives: ഫെബ്രുവരി 2012

ഖുര്‍ആന്‍ ശാസ്ത്രീയമെന്നു്‌ ശാസ്ത്രജ്ഞര്‍!!

പ്രപഞ്ചാരംഭം മുതല്‍ ബ്ലാക്ക് ഹോള്‍ വരെയുള്ള ശാസ്ത്രജ്ഞാനം മുഴുവനും ഖുര്‍ആനില്‍ ഉണ്ടെന്നു്‌ അവകാശപ്പെടുന്ന ഒരു വെബ്സൈറ്റാണു്‌ സയന്‍സ് ഇസ്ലാം (scienceislam.com). അതു്‌ സ്ഥാപിക്കാനായി അവര്‍ ലേഖനങ്ങള്‍ വീഡിയൊ ഓഡിയൊ മുതലായ പല മാര്‍ഗ്ഗങ്ങള്‍ സ്വീകരിക്കുന്നു. സകലശാസ്ത്രജ്ഞാനവും ഉള്ളവനാണു്‌ അവരുടെ ദൈവമെങ്കിലും പ്രൊപഗാന്‍ഡക്കു്‌ ദൈവത്തിന്റെ മാര്‍ഗ്ഗത്തെക്കാള്‍ ആധുനികവും ശാസ്ത്രീയവുമായ മാര്‍ഗ്ഗങ്ങള്‍ സ്വീകരിക്കുന്നതാണു്‌ എളുപ്പവും നല്ലതുമെന്നു്‌ അവര്‍ക്കറിയാമെന്നു്‌ തോന്നുന്നു. അതവര്‍ പഠിച്ചതു്‌ എന്തായാലും ഖുര്‍ആനില്‍ നിന്നുമാവാന്‍ വഴിയില്ല. കാരണം, പണ്ടു്‌ മൂസാനബിക്കു്‌ കല്പനകള്‍ എഴുതിക്കൊടുക്കാന്‍ അക്ഷരങ്ങള്‍ കല്‍പലകകളില്‍ കൊത്തുന്ന ശാസ്ത്രമാണല്ലോ അല്ലാഹു ഉപയോഗിച്ചതു്‌. അതുകൊണ്ടു്‌ ഏറിയാല്‍, “വിശ്വാസികളേ, മരംകൊത്തിയില്‍ നിങ്ങള്‍ക്കൊരു ദൃഷ്ടാന്തമുണ്ടു്‌. സീനായി മലയിലെ സന്ദര്‍ഭം ഓര്‍ക്കുക. നിങ്ങളും ആശയവിനിമയത്തിനായി അക്ഷരങ്ങള്‍ കല്പലകകളില്‍ കൊത്തുന്ന രീതി മാത്രമേ സ്വീകരിക്കാവൂ. മറ്റു്‌ രീതികള്‍ സ്വീകരിക്കുന്നവരെ നിങ്ങളുടെ വംശത്തില്‍ നിന്നും ഛേദിച്ചുകളയുക” എന്നൊരു കല്പനയേ ഈ വിഷയത്തില്‍ അല്ലാഹു നല്‍കാന്‍ സാദ്ധ്യതയുള്ളു. കൊക്കിലൊതുങ്ങുന്നതേ കൊത്താവൂ എന്നു്‌ അല്ലാഹുവിനറിയാം. മതപണ്ഡിതര്‍ അങ്ങനെയല്ല. അവര്‍ക്കു്‌ കൊക്കില്‍ ഒതുങ്ങാത്തതേ വേണ്ടൂ. ആ വെബ്സൈറ്റിലെ MIRACLES എന്ന ഭാഗം വായിച്ചാല്‍, പ്രപഞ്ചാരംഭത്തെ സംബന്ധിച്ചു്‌ ശാസ്ത്രം എന്താണു്‌ പറയുന്നതെന്നു്‌ അറിയാവുന്നവര്‍, കൊക്കിലൊതുങ്ങാത്തവ കൊത്തി വിഴുങ്ങാനായി അവര്‍ പെടുന്ന കഷ്ടപ്പാടുകള്‍ കണ്ടു്‌ കരഞ്ഞുപോവും. കൂടാതെ അതില്‍ അവര്‍ പ്രപഞ്ചാരംഭം സംബന്ധിച്ച ശാസ്ത്രരഹസ്യങ്ങള്‍ ഖുര്‍ആനില്‍ ഉണ്ടെന്നു്‌ സ്ഥാപിക്കാനായി ഒരു ജര്‍മ്മന്‍ ജിയോളജിസ്റ്റ് ആയ Professor Alfred Kroener പറഞ്ഞ ചില കാര്യങ്ങള്‍ സന്ദര്‍ഭത്തില്‍ നിന്നും അടര്‍ത്തിമാറ്റി പകര്‍ത്തിവച്ചിട്ടുമുണ്ടു്‌. ക്ര്യോണര്‍ പണ്ടെന്നോ പങ്കെടുത്ത ഒരു ചടങ്ങില്‍ നിന്നും ഒരു ചെറിയ കഷണം വീഡിയോയും (അവര്‍ക്കു്‌ വേണ്ട ഭാഗം മാത്രം മുറിച്ചെടുത്തു്‌) അവര്‍ പ്രദര്‍ശിപ്പിച്ചിട്ടുണ്ടു്‌. അവരുടെ കഷ്ടകാലത്തിനു്‌ ഇതു്‌ ബോധവത്കരണം ലക്ഷ്യമാക്കുന്ന ഒരു വെബ്സൈറ്റിന്റെ ശ്രദ്ധയില്‍ പെട്ടു (http://www.anti-religion.net/aufklaerung.htm). പ്രൊഫസ്സര്‍ ക്ര്യോണര്‍ക്കു്‌ സ്വന്തമായി ഒരു വെബ്സൈറ്റും (http://www.staff.uni-mainz.de/kroener/) അതില്‍ ഇമെയില്‍ അഡ്രസ്സും ഉള്ളതിനാല്‍ അവര്‍ അദ്ദേഹവുമായി ബന്ധപ്പെട്ടു. അവര്‍ക്കു്‌ ലഭിച്ച മറുപടി താഴെ കൊടുക്കുന്നുണ്ടു്‌.

ഇസ്ലാമിസ്റ്റുകള്‍ ഇതുപോലെ പല അഭിപ്രായങ്ങളും വീഡിയോകളും അറിയപ്പെടുന്ന ശാസ്ത്രജ്ഞര്‍ പറഞ്ഞതാണെന്ന വ്യാജേന അവരുടെ വെബ്സൈറ്റുകളില്‍ പ്രദര്‍ശിപ്പിക്കാറുണ്ടു്‌. പല ശാസ്ത്രജ്ഞരും ഇസ്ലാമിലേക്കു്‌ കണ്‍വെര്‍ട്ട് ചെയ്തു എന്നും മറ്റുമുള്ള വ്യാജമായ അവകാശവാദങ്ങളും അവര്‍ നടത്താറുണ്ടു്‌. ഒന്നുകില്‍ അങ്ങനെ സംഭവിച്ചിട്ടില്ല, അല്ലെങ്കില്‍, അവര്‍ pseudoscientists ആയിരിക്കും. ആന്റി-റിലിജ്യണ്‍ വെബ്സൈറ്റില്‍ Professor Alfred Kröner കൂടാതെ Dimitri Buliakov, William Hay, Joe Leigh Simpson എന്നിവരെപ്പറ്റിയും പരാമര്‍ശിക്കുന്നുണ്ടു്‌. അല്ലാഹുവിന്റെ സ്വന്തക്കാരുടെ സത്യസന്ധത അറിയാന്‍ ആ വെബ്സൈറ്റില്‍ പോയി വായിച്ചാല്‍ മതി. ഇതുപോലുള്ള മിക്കവാറും എല്ലാ കഥകളും മനഃപൂര്‍വ്വമായ കബളിപ്പിക്കലുകളാണു്‌. അതു്‌ മനസ്സിലാക്കാന്‍ അവയുടെയൊക്കെ സത്യാവസ്ഥ അന്വേഷിച്ചു്‌ പോകണം. ആരും അതിനൊന്നും പോവുകയില്ല എന്നതാവും ഇക്കൂട്ടരുടെ ധൈര്യം. ഇവിടെ ഞാന്‍ ആല്‍ഫ്രെഡ് ക്ര്യോണറെപ്പറ്റി മാത്രം സൂചിപ്പിക്കാന്‍ ആഗ്രഹിക്കുന്നു.

1) Alfred Kröner

Wenn man Alfred Kröner die Frage per Email stellt, bekommt man folgende Standard-Antwort: (ആല്‍ഫ്രെഡ് ക്ര്യോണറോടു്‌ ഈ ചോദ്യം ഇമെയില്‍ വഴി ചോദിച്ചാല്‍ താഴെ കൊടുത്തിരിക്കുന്ന സ്റ്റാന്‍ഡേര്‍ഡ് മറുപടി ലഭിക്കും):

Dear xxxx, I have answered literally hundreds of e-mails over the years concerning this issue. In 1979 I attended a geological conference in Jedda, Saudi Arabia, and there was a TV-Interview with five western geologists, organized by the then Minister of Religious Affairs who had a PhD in Geology. The issue was whether the Quran was compatible with modern views on the evolution of the Earth. As you can imagine there are alsways aspects in religious writing that are compatible with nature, and the Quran is no exception. The citations that you now find on these religious sites are taken out of context, I cannot even remember details of the interview. In any case, whatever you find on these sites I surely never said as it is quoted now. There is little I can do about this, I asked several friends in the islamic world for advice, and they all said just to leave it and live with it. Best wishes, Alfred

Sie können Alfred Kröner anmailen, um selbst zu prüfen, ob er tatsächlich diese Antwort schickt! Zu Alfred Kröners Website. Es ist auch eine gute Möglichkeit, um zu verlangen, dass der Professor mehr als diese Standard-Antwort macht, um die Frage zu klären, und ein für allemal etwas darüber auf seiner Website schreibt, oder sich an die Presse wendet. (ആല്‍ഫ്രെഡ് ക്ര്യോണര്‍ യഥാര്‍ത്ഥത്തില്‍ ഈ സ്റ്റാന്‍ഡേര്‍ഡ് മറുപടി അയക്കുമോ എന്നു്‌ സ്വയം പരിശോധിക്കണമെങ്കില്‍ നിങ്ങള്‍ അദ്ദേഹത്തിനു്‌ ഒരു ഇമെയില്‍ അയക്കുക! ആല്‍ഫ്രെഡ് ക്ര്യോണറുടെ വെബ്സൈറ്റിലേക്കു്‌. അതു്‌ ഈ സ്റ്റാന്‍ഡേര്‍ഡ് മറുപടി എന്നതിനപ്പുറം ഈ പ്രശ്നം പരിഹരിക്കാനായി അതിനെസംബന്ധിച്ചു്‌ എന്തെങ്കിലും അദ്ദേഹത്തിന്റെ വെബ്സൈറ്റില്‍ എന്നേക്കുമായി എഴുതുകയോ, അല്ലെങ്കില്‍ ആനുകാലികങ്ങളെ സമീപിക്കുകയോ ചെയ്തുകൂടെ എന്നു്‌ അദ്ദേഹത്തോടു്‌ ആവശ്യപ്പെടാനുള്ള ഒരു നല്ല അവസരം കൂടി ആയിരിക്കും.)

Folgende Email können Sie an Professor Kröner schicken:  (താഴെ കാണുന്ന ഇമെയില്‍ നിങ്ങള്‍ക്കു്‌ പ്രൊഫസ്സര്‍ ക്ര്യോണര്‍ക്കു്‌ അയക്കാം):

Dear Professor Kröner,

I would like to ask you some questions about your contribution to the islamic video “This is the truth”. I read articles on islamic websites, which contain citations from you as proof that the Quran had “scientific miracles” (scientific knowledges, which were unknown at Muhammad’s time), and that this book were God’s word. At http://www.islam-guide.com/de/truth.htm we also find videos. Is it really your opinion, or do theses websites give false informations? I thank you for your answer. I believe, you should write a clarification on your site, or talk to the press, because it’s a very important issue. Islamic missionaries propagate informations about you, and these are used as one of the most convincing arguments to convert people.

Yours sincerely,

[Schreiben Sie Ihren Namen] (നിങ്ങളുടെ പേരു്‌ എഴുതുക)

Die Behauptungen der islamischen Websites spiegeln nicht Alfred Kröners Meinung wieder. Der Professor weist darauf hin, dass er ausser dem Zusammenhang zitiert wurde, und zwar bei einem Interview, bei dem die Frage nicht war, ob es Beweise gibt, dass der Koran Gottes Wort ist, sondern ob Stellen des Korans vereinbar mit heutigen Modellen und Kenntnissen der Erdentwicklung, der Geologie, sind. Wesentlicher Unterschied. Das ist überhaupt nicht das selbe Vorgehen. Doch wurden die (anscheinend verratene) Aussagen Kröners zu Missionierungszwecken verwendet. (ഇസ്ലാം വെബ്സൈറ്റിന്റെ അവകാശവാദങ്ങള്‍ ആല്‍ഫ്രെഡ് ക്ര്യോണറുടെ അഭിപ്രായം പ്രതിഫലിപ്പിക്കുന്നവയല്ല. താന്‍ സന്ദര്‍ഭത്തില്‍ നിന്നും അടര്‍ത്തിമാറ്റി ഉദ്ധരിക്കപ്പെടുകയായിരുന്നു എന്നു്‌ പ്രൊഫസ്സര്‍ ചൂണ്ടിക്കാണിക്കുന്നു. ഒരു (പ്രസ്തുത) ഇന്റര്‍വ്യൂവിലെ ചോദ്യം ഖുര്‍ആന്‍ ദൈവത്തിന്റെ വചനങ്ങളാണെന്നതിനു്‌ തെളിവുകള്‍ ഉണ്ടോ എന്നതായിരുന്നില്ല, ഖുര്‍ആനിലെ ഭാഗങ്ങള്‍ ഇന്നത്തെ ജിയോളജിയിലെ ഭൂമിയുടെ വികാസപരിണാമം സംബന്ധിച്ച മാതൃകകളും അറിവുകളുമായി പൊരുത്തപ്പെടുന്നവയാണോ എന്നതായിരുന്നു. നിര്‍ണ്ണായകമായ വ്യത്യാസം. അതു്‌ തീര്‍ച്ചയായും ഒരേ രീതിയിലുള്ള സമീപനമല്ല. എന്നിട്ടും ക്ര്യോണറുടെ അഭിപ്രായങ്ങള്‍ (പ്രകടമായും വഞ്ചനാപരമായി) മതപ്രചാരണലക്ഷ്യത്തിനായി ഉപയോഗപ്പെടുത്തി.

“സയന്‍സ്ഇസ്ലാം” പ്രപഞ്ചാരംഭത്തിലെ അവസ്ഥയെപ്പറ്റി നടത്തുന്ന മറ്റൊരു അവകാശവാദം കാണൂ:

The science of modern cosmology, observational and theoretical, clearly indicates that, at one point in time, the whole universe was nothing but a cloud of ‘smoke’ (i.e. an opaque highly dense and hot gaseous composition). This is one of the undisputed principles of standard modern cosmology. Scientists now can observe new stars forming out of the remnants of that ‘smoke’. The illuminating stars we see at night were, just as was the whole universe, in that ‘smoke’ material. God said in the Quran:

Then He turned to the heavens when it was smoke…

[Noble Quran 41:11]

“the whole universe was nothing but a cloud of ‘smoke'”! “an opaque highly dense and hot gaseous composition”!! പ്രപഞ്ചത്തിന്റെ തുടക്കത്തില്‍ ആകെമൊത്തം പുകയായിരുന്നു. കട്ടപ്പൊഹയില്‍ നിന്നായിരുന്നു പ്രപഞ്ചത്തിന്റെ തുടക്കം!!!

സയന്‍സ് ഇസ്ലാം “Noble Quran 41:11” വായിക്കുന്നതു്‌ ഇങ്ങനെ: “Then He turned to the heavens when it was smoke…”

ഖുര്‍ആനില്‍ നമ്മള്‍ Fussilat 41:11 വായിക്കുന്നതു്‌ ഇങ്ങനെ: “അതിനു പുറമെ അവന്‍ ആകാശത്തിന്‍റെ നേര്‍ക്ക്‌ തിരിഞ്ഞു. അത്‌ ഒരു പുകയായിരുന്നു.എന്നിട്ട്‌ അതിനോടും ഭൂമിയോടും അവന്‍ പറഞ്ഞു: നിങ്ങള്‍ അനുസരണപൂര്‍വ്വമോ നിര്‍ബന്ധിതമായോ വരിക. അവ രണ്ടും പറഞ്ഞു: ഞങ്ങളിതാ അനുസരണമുള്ളവരായി വന്നിരിക്കുന്നു.”

ബിഗ്-ബാംഗ് സംഭവിച്ചപ്പോഴത്തെ പ്രപഞ്ചത്തിലെ ‘പൊഹയുടെ’ കാര്യമാണു്‌ ഇവിടെ സര്‍വ്വശക്തനായ അല്ലാഹു വെളിപ്പെടുത്തുന്നതെന്നു്‌ സംശയം ഉണ്ടാവാതിരിക്കാന്‍ ഖുര്‍ ആനിലെ തൊട്ടു്‌ മുന്‍പിലെയും പിന്‍പിലെയും വാക്യങ്ങള്‍ കൂടി വായിക്കുന്നതു്‌ നന്നായിരിക്കും. അവയിതാണു്‌:

Fussilat 41:10 “അതില്‍ (ഭൂമിയില്‍) – അതിന്‍റെ ഉപരിഭാഗത്ത്‌ – ഉറച്ചുനില്‍ക്കുന്ന പര്‍വ്വതങ്ങള്‍ അവന്‍ സ്ഥാപിക്കുകയും അതില്‍ അഭിവൃദ്ധിയുണ്ടാക്കുകയും, അതിലെ ആഹാരങ്ങള്‍ അവിടെ വ്യവസ്ഥപ്പെടുത്തി വെക്കുകയും ചെയ്തിരിക്കുന്നു. നാലു ദിവസ(ഘട്ട)ങ്ങളിലായിട്ടാണ്‌ (അവനത്‌ ചെയ്തത്‌.) ആവശ്യപ്പെടുന്നവര്‍ക്ക്‌ വേണ്ടി ശരിയായ അനുപാതത്തില്‍”

Fussilat 41:12 “അങ്ങനെ രണ്ടുദിവസ( ഘട്ട )ങ്ങളിലായി അവയെ അവന്‍ ഏഴുആകാശങ്ങളാക്കിത്തീര്‍ത്തു. ഓരോ ആകാശത്തിലും അതാതിന്‍റെ കാര്യം അവന്‍ നിര്‍ദേശിക്കുകയും ചെയ്തു. സമീപത്തുള്ള ആകാശത്തെ നാം ചില വിളക്കുകള്‍ കൊണ്ട്‌ അലങ്കരിക്കുകയും സംരക്ഷണം ഏര്‍പെടുത്തുകയും ചെയ്തു. പ്രതാപശാലിയും സര്‍വ്വജ്ഞനുമായ അല്ലാഹു വ്യവസ്ഥപ്പെടുത്തിയതത്രെ അത്‌.”

എങ്ങനെയുണ്ടു്‌? ഖുര്‍ ആന്‍ മുഴുവന്‍ ആധുനികശാസ്ത്രമാണെന്ന കാര്യത്തില്‍ സംശയമുണ്ടോ?

തങ്ങളുടെ ദൈവത്തിനും മതത്തിനും അതിലെ വിശ്വാസങ്ങള്‍ക്കും ശാസ്ത്രീയമായ അടിത്തറയുണ്ടെന്നു്‌ സ്ഥാപിക്കാന്‍ ശ്രമിക്കുന്നവര്‍ ആരായാലും അതിനായി അവര്‍ സ്വീകരിക്കുന്ന മാര്‍ഗ്ഗങ്ങള്‍ കളവിന്റെയും വഞ്ചനയുടെയും മാത്രമാണു്‌. ശാസ്ത്രം എന്നാല്‍ എന്തെന്നു്‌ അറിയാന്‍ മാത്രം വെളിവു്‌  അവര്‍ക്കുണ്ടായിരുന്നെങ്കില്‍ അവര്‍ ആദ്യം മനസ്സിലാക്കുന്നതു്‌ പ്രപഞ്ചരഹസ്യങ്ങളെപ്പറ്റി അവരുടെ ഗ്രന്ഥത്തില്‍ ഒരു ചുക്കും എഴുതിയിട്ടില്ല എന്ന സത്യമായിരുന്നേനെ. അവര്‍ വിശ്വസിക്കുന്ന തരത്തില്‍ ഒരു ദൈവം ഉണ്ടായിരുന്നെങ്കില്‍, ആ ദൈവത്തില്‍ നീതിബോധത്തിന്റെ ഒരംശമെങ്കിലും ഉണ്ടായിരുന്നെങ്കില്‍ മനുഷ്യവര്‍ഗ്ഗത്തെ ഇതുപോലുള്ള വ്യാജവ്യാഖ്യാനങ്ങളിലൂടെ വഞ്ചിക്കാന്‍ ശ്രമിച്ചതിനു്‌ ആ ദൈവത്തിനു്‌ നല്‍കാന്‍ കഴിയുന്നതില്‍ ഏറ്റവും വലിയ നരകശിക്ഷ നല്‍കിയായിരിക്കും അവന്‍ അവരെ ശിക്ഷിക്കുക.

Advertisements
 
14അഭിപ്രായങ്ങള്‍

Posted by on ഫെബ്രുവരി 16, 2012 in പലവക

 

മുദ്രകള്‍: , ,

ഖുര്‍ആനിലെ ബ്ലാക്ക് ഹോള്‍

ചിത്രത്തിലെ ഖുര്‍‌ആന്‍ വാക്യം രണ്ടുവട്ടം വായിക്കുക: “മനുഷ്യാ നീ ചിന്തിക്കുന്നതുപോലെയല്ല, ഞാന്‍ സത്യം ചെയ്യുന്നു, നക്ഷത്രങ്ങള്‍ പതിക്കുന്ന (വീഴുന്ന, അ’സ്ഥ’മിക്കുന്ന) ഒരു സ്ഥാനത്തെ ചൊല്ലി ഞാന്‍ സത്യം ചെയ്യുന്നു. (v:qur an:su: waqia)”

ഇനി, ഖുര്‍ആനിലെ Surah No.56 Waqia-ല്‍ ആ വാക്യം (75) ശ്രദ്ധിക്കുക. അതിങ്ങനെ: “അല്ല, നക്ഷത്രങ്ങളുടെ അസ്തമനസ്ഥാനങ്ങളെക്കൊണ്ടു്‌ ഞാന്‍ സത്യം ചെയ്തു്‌ പറയുന്നു.”

വാക്യത്തില്‍ നിന്നും ഒട്ടും മുറിച്ചുമാറ്റിയിട്ടില്ല എന്നറിയാനായി അതിനു്‌ മുന്‍പും പിന്‍പുമുള്ള ഓരോ വാക്യങ്ങള്‍ കൂടി: “ആകയാല്‍ നിന്റെ മഹാനായ രക്ഷിതാവിന്റെ നാമത്തെ നീ പ്രകീര്‍ത്തിക്കുക(74)”. “തീര്‍ച്ചയായും നിങ്ങള്‍ക്കറിയാമെങ്കില്‍, അതൊരു വമ്പിച്ച സത്യം തന്നെയാണു്‌ (76)”.

നക്ഷത്രങ്ങളുടെ അസ്തമനസ്ഥാനങ്ങളെ ‘ബ്ലാക്ക് ഹോള്‍’ ആക്കി മാറ്റി ഖുര്‍ആന്‍ ശാസ്ത്രീയമാണെന്നു്‌ വരുത്താന്‍ വ്യാഖ്യാതാവു്‌ പെടുന്ന പാടുകള്‍! ‘ദൈവത്തിന്റെ’ ഭാഷയില്‍ നക്ഷത്രങ്ങളുടെ “അസ്തമനസ്ഥാനങ്ങള്‍” ആയതിനെ വ്യാഖ്യാതാവിന്റെ വക്രബുദ്ധി “നക്ഷത്രങ്ങള്‍ പതിക്കുന്ന (വീഴുന്ന, അ’സ്ഥ’മിക്കുന്ന) ‘ഒരു സ്ഥാനം'” ആക്കി മാറ്റുന്നു. നക്ഷത്രങ്ങള്‍ ചെന്നു്‌ പൊത്തോന്നു്‌ വീഴുന്ന കുഴിയും ചിത്രത്തില്‍ അടയാളപ്പെടുത്താന്‍ ചങ്ങാതി ശ്രദ്ധിച്ചിട്ടുണ്ടു്‌. വിശ്വാസികള്‍ യുക്തിപൂര്‍വ്വം ചിന്തിക്കുന്നവരാണെന്നതിനാല്‍ ഹൈഡ്രജനും ഹീലിയവും തീര്‍ന്നു്‌ കാറ്റുപോയ ബലൂണ്‍ പോലെ ചുരുങ്ങിപ്പോകുന്ന നക്ഷത്രങ്ങള്‍ ആകാശത്തുള്ള ഏതു്‌ അ’ഗാത’മായ കുഴിയിലേക്കാണു്‌ ചെന്നു്‌ വീഴുന്നതു്‌/പതിക്കുന്നതു്‌/അ’സ്ഥ’മിക്കുന്നതു്‌  എന്നു്‌ ചോദിക്കാതിരിക്കില്ലല്ലോ. വ്യാഖ്യാതാക്കള്‍ അല്ലാഹുവിനെപ്പോലെതന്നെ വളരെ ദീര്‍ഘവീക്ഷണം ഉള്ളവരും മുന്‍കൂട്ടി ചിന്തിക്കുന്നവരുമാണു്‌.

എന്തിനു്‌ ഈ വളഞ്ഞ വഴികള്‍? അതും നീതിമാന്‍ എന്നു്‌ വിശേഷിപ്പിക്കപ്പെടുന്ന ഒരു ദൈവത്തിന്റെ നാമത്തില്‍? ഇത്തരം വഴികളിലൂടെ നടക്കുന്നവര്‍ സ്വര്‍ഗ്ഗത്തില്‍ എത്തിച്ചേരുമെന്നാണോ? ഇക്കൂട്ടരാണു്‌ സ്വര്‍ഗ്ഗത്തില്‍ വസിക്കുന്നതെങ്കില്‍ തീര്‍ച്ചയായും നരകം തന്നെയാണു്‌ ഭേദം.

വേദഗ്രന്ഥത്തില്‍ ബിഗ് ബാംഗും ബ്ലാക്ക് ഹോളും ഒക്കെയുണ്ടെന്നു്‌ വ്യാഖ്യാനിച്ചൊപ്പിക്കാന്‍ നടക്കുന്നവര്‍ അതിലെ സാമാന്യബുദ്ധിക്കുപോലും മനസ്സിലാക്കാന്‍ പ്രയാസമില്ലാത്ത വൈരുദ്ധ്യങ്ങളും വിഡ്ഢിത്തങ്ങളും കാണുന്നില്ലെന്നുണ്ടോ?

Surah No.56 Waqia തുടങ്ങുന്നതിങ്ങനെയാണു്‌:  “ആ സംഭവം സംഭവിച്ചുകഴിഞ്ഞാല്‍ അതിന്റെ സംഭവ്യതയെ നിഷേധിക്കുന്ന ആരും ഉണ്ടായിരിക്കുകയില്ല.”

ന്ന്വച്ചാല്‍, ഏതെങ്കിലുമൊരു സംഭവം സംഭവിച്ചുകഴിഞ്ഞാല്‍ അതിന്റെ സംഭവ്യതയെ, അതായതു്‌, അതു്‌ സംഭവിക്കാനുള്ള സാദ്ധ്യതയെ, നിഷേധിക്കുന്ന ആരും ഉണ്ടാവില്ല എന്നു്‌! കൊണ്‍ക്രീറ്റ് ആയി പറഞ്ഞാല്‍, ഒരു കെട്ടിടം വീണു്‌ തകര്‍ന്നുകഴിഞ്ഞാല്‍ അതു്‌ വീണു്‌ തകരാനുള്ള സാദ്ധ്യതയെ നിഷേധിക്കുന്ന ആരും ഉണ്ടാവില്ലെന്നു്‌! ബ്ലാക്ക് ഹോള്‍ പോലെ അ’ഗാത’മായ ഈ സത്യം പറയുന്നതു്‌ മറ്റാരുമല്ല, ദൈവമാണു്‌.

ദൈവം ബ്ലാക്ക് ഹോള്‍ രഹസ്യം വെളിപ്പെടുത്തിയ ഈ അദ്ധ്യായത്തില്‍ എഴുതിയിരിക്കുന്ന മറ്റു്‌ കാര്യങ്ങള്‍ കൂടി വായിച്ചാല്‍ ഇത്തരം ശാസ്ത്രരഹസ്യങ്ങള്‍ വെളിപ്പെടുത്താന്‍ എന്തുകൊണ്ടും യോഗ്യനായ ഒരു ദൈവം തന്നെയാണു്‌ അവന്‍ എന്ന കാര്യത്തില്‍ ആര്‍ക്കും സംശയമുണ്ടാവാന്‍ വഴിയില്ല. വലതുപക്ഷക്കാര്‍, ഇടതുപക്ഷക്കാര്‍, (സത്യവിശ്വാസത്തിലും സല്‍പ്രവര്‍ത്തികളിലും) മുന്നേറി പരലോകത്തിലും മുന്നോക്കക്കാരായി ‘സാമീപ്യം’ നേടിയെടുത്തവര്‍. പൂര്‍വ്വികന്മാരില്‍ നിന്നു്‌ ഒരു വിഭാഗവും പില്‍ക്കാലക്കാരില്‍ നിന്നു്‌ കുറച്ചുപേരും അടങ്ങുന്ന ഇവരാണു്‌ സ്വര്‍ഗ്ഗത്തില്‍ സുഖിക്കാന്‍ പോകുന്നതു്‌! സ്വര്‍ണ്ണനൂലുകൊണ്ടു്‌ മെടഞ്ഞുണ്ടാക്കപ്പെട്ട കട്ടിലുകള്‍, കോപ്പകളും കൂജകളും ശുദ്ധമായ ഉറവുജലം നിറച്ച പാനപാത്രവുമായി ചുറ്റിനടക്കുന്ന നിത്യജീവിതം നല്‍കപ്പെട്ട ബാലന്മാര്‍, പഴവര്‍ഗ്ഗങ്ങള്‍, പക്ഷിമാംസം, വിശാലമായ നയനങ്ങളുള്ള “വെളുത്ത” തരുണികള്‍, ചിപ്പികളില്‍ ഒളിച്ചുവയ്ക്കപ്പെട്ട മുത്തു്‌ പോലെയുള്ളവര്‍ ….

“അപ്പോള്‍ നിങ്ങള്‍ സ്രവിക്കുന്ന ശുക്ലത്തെപ്പറ്റി നിങ്ങള്‍ ചിന്തിച്ചു്‌ നോക്കിയിട്ടുണ്ടോ? നിങ്ങളാണോ അതു്‌ സൃഷ്ടിച്ചുണ്ടാക്കുന്നതു്‌? അതല്ല, നാമാണോ  സൃഷ്ടികര്‍ത്താവു്‌?” (58, 59)

“എന്നാല്‍ നിങ്ങള്‍ കൃഷി ചെയ്യുന്നതിനെപ്പറ്റി നിങ്ങള്‍ ചിന്തിച്ചുനോക്കിയിട്ടുണ്ടോ? നിങ്ങളാണോ അതു്‌ മുളപ്പിച്ചു്‌ വളര്‍ത്തുന്നതു്‌? അതല്ല നാമാണോ, അതു്‌ മുളപ്പിച്ചു്‌ വളര്‍ത്തുന്നവന്‍?” (63, 64)

“ഇനി, നിങ്ങള്‍ കുടിക്കുന്ന വെള്ളത്തെപ്പറ്റി …..” (68, 69, 70). “നിങ്ങള്‍ ഉരസിക്കത്തിക്കുന്നതായ തീയിനെപ്പറ്റി ….” (71, 72)

ദൈവത്തിന്റെ ഇതിലും അ’ഗാത’വും രസകരവുമായ മറ്റു്‌ ജ്ഞാനങ്ങള്‍ വേറെയുമുണ്ടു്‌ ധാരാളം. അതെല്ലാം മനസ്സിലാക്കുവാന്‍ വിശ്വാസി വായിക്കുന്ന രീതിക്കു്‌ നേരെ വിപരീതമായ രീതിയില്‍ ആ ഗ്രന്ഥം വായിക്കുക.

ഇത്രയൊക്കെ ചെയ്തിട്ടും ബ്ലാക്ക് ഹോള്‍ പോലുള്ള പ്രപഞ്ചരഹസ്യങ്ങള്‍ വെളിപ്പെടുത്താനുള്ള ദൈവത്തിന്റെ യോഗ്യത മനസ്സിലാക്കാന്‍ കഴിയുന്നില്ലെങ്കില്‍ എനിക്കൊന്നും ചെയ്യാന്‍ കഴിയില്ല – നിങ്ങളായി, നിങ്ങളുടെ സ്വര്‍ഗ്ഗമായി.

 

 
4അഭിപ്രായങ്ങള്‍

Posted by on ഫെബ്രുവരി 13, 2012 in പലവക

 

മുദ്രകള്‍: , ,

വെളുത്ത വാമനനും ചുവന്ന രാക്ഷസനും (White dwarf and Red giant)

‘ശാസ്ത്രനിലാവില്‍ ഗീത’ എന്ന തലക്കെട്ടില്‍ 16.10.2011-ലെ വാരാന്ത്യകൗമുദിയില്‍ പ്രസിദ്ധീകരിച്ച ഒരു ഇന്റര്‍വ്യൂവില്‍ ശ്രീ സി. രാധാകൃഷ്ണന്‍ പ്രകടിപ്പിച്ച പല അഭിപ്രായങ്ങളുടെയും ശാസ്ത്രീയമായ അടിസ്ഥാനരാഹിത്യം കുറച്ചുനാള്‍ മുന്‍പു്‌ നാലു്‌ ലേഖനങ്ങളിലൂടെ വ്യക്തമാക്കാന്‍ ഞാന്‍ ശ്രമിച്ചിരുന്നു. “ആപേക്ഷികതാസിദ്ധാന്തം ന്യൂക്ലിയര്‍ സ്കെയിലില്‍ മൈക്രോസ്കോപ്പിക് ആയി അളക്കാന്‍ ആവില്ല. ക്വാണ്ടം മെക്കാനിക്സില്‍ മാക്രോസ്കോപ്പിക് അളവുകളും സാദ്ധ്യമല്ല” എന്നൊരഭിപ്രായവും ശ്രീ രാധാകൃഷ്ണന്‍ തന്റെ ഇന്റര്‍വ്യൂവില്‍ പറഞ്ഞിരുന്നു. അളവായാലും തൂക്കമായാലും, മൈക്രോസ്കോപ്പിക് ലോകവും മാക്രോസ്കോപ്പിക് ലോകവും പരസ്പരം എത്രമാത്രം ബന്ധപ്പെട്ടു്‌ കിടക്കുന്നു എന്നു്‌ സൂചിപ്പിക്കുകയാണു്‌ ഈ ലേഖനത്തിന്റെ ലക്ഷ്യം.

ആദിസ്ഫോടനത്തിനുശേഷം വികസിക്കാനും തണുക്കാനും ആരംഭിച്ച പ്രപഞ്ചം അനുയോജ്യമായ ഊഷ്മാവില്‍ എത്തിയപ്പോള്‍ ന്യൂക്ലിയര്‍ സിന്തെസിസ് വഴി രൂപമെടുത്ത, ‘സ്റ്റേബിള്‍’ എന്നു്‌ കഷ്ടിച്ചു്‌ വിശേഷിപ്പിക്കാവുന്ന ഹൈഡ്രജനായിരുന്നു ദ്രവ്യത്തിന്റെ ആദ്യരൂപം. പ്രപഞ്ചം പൂര്‍ണ്ണമായും ഹോമോജീനിയസ് അല്ലാതിരുന്നതിനാല്‍ അവിടവിടെയായി ഹൈഡ്രജന്‍ ധൂമപടലങ്ങള്‍ കേന്ദ്രീകരിക്കപ്പെടുകയും, അവയില്‍ അതുവഴി സംജാതമായ ഗ്രാവിറ്റേഷന്‍ മൂലം കൂടുതല്‍ കൂടുതല്‍ കണികകള്‍ അങ്ങോട്ടേയ്ക്കു്‌ ആകര്‍ഷിക്കപ്പെടുകയും ചെയ്തു. ഈ പ്രക്രിയ അനവരതം തുടര്‍ന്നതിന്റെ ഫലമായി ദ്രവ്യത്തിന്റെ അളവും, ഹൈഡ്രജന്‍ ധൂമപടലത്തിന്റെ സാന്ദ്രതയും, ഗ്രാവിറ്റേഷന്റെ ശക്തിയും സ്വാഭാവികമായും പെരുകിക്കൊണ്ടിരുന്നു. അണുകേന്ദ്രത്തിലെ പോസിറ്റീവ് ഇലക്ട്രിക് ചാര്‍ജ്ജുള്ള പ്രോട്ടോണുകളുടെ വികര്‍ഷണശക്തിമൂലമുള്ള പ്രതിരോധം ഇല്ലായിരുന്നെങ്കില്‍ ഈ പ്രക്രിയ അനിയന്ത്രിതമായി തുടരാന്‍ ഗ്രാവിറ്റേഷന്റെ പക്ഷത്തുനിന്നും തടസ്സമൊന്നും ഉണ്ടായിരുന്നില്ല. ആണവതലത്തിലെ (മൈക്രോസ്കോപ്പിക് തലത്തിലെ) കണങ്ങളുടെ വികര്‍ഷണശക്തിയെ കീഴ്പ്പെടുത്താന്‍ ഗ്രാവിറ്റേഷണല്‍ ഫോഴ്സിനു്‌ കഴിയാത്തവിധം നിലവിലിരിക്കുന്ന ഈ സംതുലിതാവസ്ഥയാണു്‌ ഭൂമിയെപ്പോലുള്ള ഗ്രഹങ്ങളുടെ നിലനില്‍പു്‌ സാദ്ധ്യമാക്കുന്നതു്‌. പക്ഷേ, ഗ്രഹങ്ങളില്‍ ഹൈഡ്രജന്‍ മാത്രമല്ല മറ്റു്‌ മൂലകങ്ങളും ഈ ശക്തിമത്സരത്തില്‍ പങ്കാളികളാവുന്നു. ഒരു അണുകേന്ദ്രത്തെയും അതിനെ ചുറ്റുന്ന ഇലക്ട്രോണുകളെയും ഏകദേശം ഒരു ഫുട്ബോള്‍ ഗ്രൗണ്ടിന്റെ നടുവില്‍ സ്ഥിതി ചെയ്യുന്ന പന്തിനോടും അതിനെ സ്റ്റേഡിയത്തിന്റെ അതിരിലൂടെ ചുറ്റുന്ന ധാന്യമണികളോടും താരതമ്യം ചെയ്യാമെന്നതിനാല്‍, ഒരു മൂലകത്തിന്റെ ഭീമമായ പങ്കും ശൂന്യസ്ഥലമാണെന്നു്‌ പറയുന്നതില്‍ തെറ്റില്ല. അതിനാല്‍, കേന്ദ്രത്തിലേക്കു്‌ ഗ്രാവിറ്റേഷന്‍ മൂലം തള്ളിക്കയറി പിണ്ഡം വര്‍ദ്ധിപ്പിക്കാന്‍ ആവശ്യമായ ദ്രവ്യത്തിന്റെ അഭാവവും ഈ സംതുലിതാവസ്ഥയെ തകര്‍ച്ചയില്ലാതെ നിലനിര്‍ത്താന്‍ സഹായിക്കുന്നു.

അതേസമയം, പ്രപഞ്ചത്തില്‍ സാന്ദ്രീകരിക്കപ്പെട്ടുകൊണ്ടിരുന്ന ഹൈഡ്രജന്‍ ധൂമപടലങ്ങളുടെ ചുറ്റുപാടുകളില്‍ ധാരാളം കണികകള്‍ ലഭ്യമായിരുന്നു എന്നതിനാല്‍, ഗ്രാവിറ്റേഷന്‍ വഴി പിണ്ഡവും സാന്ദ്രതയും തുടര്‍ന്നും വര്‍ദ്ധിച്ചുകൊണ്ടിരുന്നു – അതിനൊപ്പം ഗ്രാവിറ്റേഷനും! സാന്ദ്രത കൂടുന്നതിനനുസരിച്ചു്‌ ഹൈഡ്രജന്റെ ന്യൂക്ലിയസിലെ കണികകള്‍ തമ്മിലുള്ള അകലം കുറയുകയും, അതു്‌ കണികകള്‍ (രണ്ടു്‌ പ്രോട്ടോണുകള്‍) തമ്മില്‍ വളരെ അടുത്തു്‌ വരാന്‍ കാരണമാവുകയും ചെയ്യുന്നു. തത്ഫലമായി സംഭവിക്കുന്ന അറ്റോമിക്  റിയാക്ഷന്‍ വഴി ആ പ്രോട്ടോണുകളിലൊന്നു്‌ ഒരു ന്യൂട്രോണും, ഇലക്ട്രോണിന്റെ ആന്റിപാര്‍ട്ടിക്കിള്‍ ആയ പോസിട്രോണും, ഒരു ന്യൂട്രീനൊയും ആയി രൂപാന്തരപ്പെടുന്നു. ഈ ന്യൂട്രോണ്‍ അവശേഷിക്കുന്ന പ്രോട്ടോണും ഹൈഡ്രജന്റെ ഷെല്ലുകളില്‍ ഉണ്ടായിരുന്ന രണ്ടു്‌ ഇലക്ട്രോണുകളില്‍ ഒന്നുമായി സംയോജിച്ചു്‌ ഒരു ഡ്യുറ്റീറിയം ആറ്റത്തിനു്‌ ജന്മം നല്‍കുന്നു. പോസിട്രോണ്‍ രണ്ടാമത്തെ ഇലക്ട്രോണുമായി ചേര്‍ന്നു്‌ നശിക്കുന്നു. ന്യൂട്രീനൊ പതിവുപോലെ രൂപമെടുത്ത ഉടനെതന്നെ സംഭവസ്ഥലം വിട്ടുപോകുന്നു. ഇതിനെല്ലാമുപരിയായി ഈ റിയാക്ഷന്‍ വഴി എനര്‍ജിയും സ്വതന്ത്രമാവുന്നു. ഈ എനര്‍ജിയാണു്‌ മിക്കവാറും എല്ലാ നക്ഷത്രങ്ങളുടെയും പ്രകാശമടക്കമുള്ള റേഡിയേഷനു്‌ കാരണമാവുന്നതു്‌.

ഗ്രാവിറ്റേഷന്റെ ശക്തി പിന്നെയും മുന്നിട്ടു്‌ നില്‍ക്കുമ്പോള്‍ ഡ്യുറ്റീറിയവും അവശേഷിക്കുന്ന ഹൈഡ്രജനും തമ്മില്‍ വീണ്ടും കൂടുതല്‍ അടുത്തുവരാന്‍ ഇടയാവുകയും അതു്‌ മറ്റൊരു അറ്റോമിക് റിയാക്ഷനു്‌ കാരണമാവുകയും ചെയ്യുന്നു. അതിന്റെ ഫലമായി, ഒരു പ്രോട്ടോണും ഒരു ന്യൂട്രോണും ഒരു ഇലക്ട്രോണുമുള്ള ഡ്യുറ്റീറിയത്തിന്റെ രണ്ടു്‌ കണങ്ങള്‍ ചേര്‍ന്നു്‌ രണ്ടു്‌ പ്രോട്ടോണുകളും, ഒന്നോ രണ്ടോ ന്യൂട്രോണുകളും രണ്ടു്‌ ഇലക്ട്രോണുകളുമുള്ള ഒരു ഹീലിയം ആറ്റം രൂപമെടുക്കുന്നു. മാത്രവുമല്ല, അതുവഴി ഡ്യുറ്റീറിയം ഫൊര്‍മേഷനിലേതിനേക്കാള്‍ കൂടുതല്‍ എനര്‍ജിയും സ്വതന്ത്രമാവുന്നു. ഈ എനര്‍ജി വഴി നക്ഷത്രത്തിന്റെ ഉള്ളിലെ ഊഷ്മാവും മര്‍ദ്ദവും വര്‍ദ്ധിക്കുകയും അതു്‌ ഗ്രാവിറ്റേഷനെതിരെ കൂടുതല്‍ ശക്തമായ പ്രതിരോധത്തിനു്‌ സഹായകമാവുകയും ചെയ്യുന്നതിനാല്‍ സൂര്യനെപ്പോലുള്ള നക്ഷത്രങ്ങള്‍ക്കു്‌ ദീര്‍ഘകാലം ഗ്രാവിറ്റേഷനെതിരെ പിടിച്ചുനില്‍ക്കാന്‍ കഴിയുന്നു.

ഈ റിയാക്ഷനുകളിലെ ഇന്ധനങ്ങളായ ഹൈഡ്രജനും ഡ്യുറ്റീറിയവും കാലക്രമേണ ‘എരിഞ്ഞു്‌’ തീരാന്‍ തുടങ്ങുകയും, അതുവഴി ആണവതലങ്ങളില്‍ നിന്നുണ്ടായിരുന്ന പ്രതിരോധശേഷി കുറയുകയും ചെയ്യുമ്പോള്‍ ഗ്രാവിറ്റേഷനു്‌ വീണ്ടും മേല്‍ക്കോയ്മ ലഭിക്കുന്നു. തത്ഫലമായി പരസ്പരം അടുത്തുവരുന്ന കണങ്ങള്‍ തമ്മിലുള്ള റിയാക്ഷന്‍ മൂലം ഹീലിയത്തിന്റെ ന്യൂക്ലിയസില്‍ കൂടുതല്‍ പ്രോട്ടോണുകളും ന്യൂട്രോണുകളും കൂട്ടിച്ചേര്‍ക്കപ്പെടുകയും, അതുവഴി കാര്‍ബണ്‍, ഓക്സിജന്‍, ഇരുമ്പു്‌, നിക്കല്‍ മുതലായ ഭാരമേറിയ മൂലകങ്ങള്‍ രൂപമെടുക്കുകയും ചെയ്യുന്നു. അതോടെ ഒരു നക്ഷത്രത്തിലെ മിക്കവാറും എല്ലാ ഫ്യൂഷന്‍ റിയാക്ഷനുകളും അവസാനിക്കുന്നു. അവയില്‍ ചില നക്ഷത്രങ്ങള്‍ ‘സ്യുപ്പര്‍നോവ’ എന്ന പൊട്ടിത്തെറിയിലൂടെ ഭാരമേറിയ ഇത്തരം മൂലകങ്ങളെ ശൂന്യാകാശത്തില്‍ ചിതറിത്തെറിപ്പിക്കുന്നു. ഈ എലമെന്റുകള്‍ ആദിപ്രപഞ്ചത്തിലെ ഹൈഡ്രജന്‍ എന്നപോലെ അവിടവിടെയായി കേന്ദ്രീകരിക്കപ്പെടുകയും അവ കാലാന്തരത്തില്‍ സൂര്യനും ഗ്രഹങ്ങളും ഉപഗ്രഹങ്ങളുമൊക്കെയായി രൂപാന്തരപ്പെടുകയും ചെയ്യുന്നു.

ഇന്ധനങ്ങള്‍ തീരാന്‍ തുടങ്ങുന്നതോടെ നക്ഷത്രത്തിന്റെ കേന്ദ്രത്തില്‍ നിന്നും അറ്റോമിക് ഫ്യൂഷന്‍ പുറം പാളികളിലേക്കു്‌ വ്യാപിക്കുന്നു. ആ റേഡിയേഷന്റെ മര്‍ദ്ദത്തില്‍ പുറംതോടിനു്‌ വികാസം സംഭവിക്കുന്നതിനാല്‍ അതു്‌ നക്ഷത്രത്തിന്റെ ഡയമീറ്ററില്‍ നൂറിരട്ടിവരെയുള്ള വര്‍ദ്ധനവിനു്‌ കാരണമാവുന്നു. ചുവപ്പുനിറം പ്രസരിപ്പിക്കുന്നതിനാല്‍ ‘ചുവന്ന രാക്ഷസര്‍’ (Red giants) എന്നു്‌ വിളിക്കപ്പെടുന്ന ഈ നക്ഷത്രങ്ങളുടെ അവസ്ഥ ഏകദേശം അഞ്ഞൂറുകോടി വര്‍ഷങ്ങള്‍ക്കുശേഷം നമ്മുടെ സൂര്യനും നേരിടേണ്ടിവരുമെന്നും, അതോടനുബന്ധിച്ചു്‌ ഭൂമിയെ സൂര്യന്‍ ‘വിഴുങ്ങുമെന്നും’ കണക്കാക്കപ്പെടുന്നു.

അങ്ങനെ ഒരു നക്ഷത്രത്തിലെ മുഴുവന്‍ ഇന്ധനവും അവസാനിച്ചു്‌ കഴിയുമ്പോഴും ഗ്രാവിറ്റേഷന്‍ പഴയപടി തന്റെ ‘ജോലി’ തുടര്‍ന്നുകൊണ്ടിരിക്കും. ചെറിയ നക്ഷത്രങ്ങളില്‍ ഗ്രാവിറ്റേഷനെ ചെറുത്തു്‌ നില്‍ക്കാന്‍, ഗ്രഹങ്ങളില്‍ എന്നപോലെ, ദ്രവ്യത്തിന്റെ മര്‍ദ്ദം മതിയാവുമ്പോള്‍, വലിയ നക്ഷത്രങ്ങളുടെ പിണ്ഡത്തെ നേരിടാന്‍ അവ പോരാതെ വരുന്നു. ഹൈഡ്രജന്റെ കാര്യത്തില്‍ നമ്മള്‍ മുകളില്‍ കണ്ടതുപോലെ മൈക്രോസ്കോപ്പിക് തലത്തിലെ, അഥവാ, ക്വാണ്ടം മെക്കാനിക്സിന്റെ ലോകത്തിലെ തന്നെ Pauli exclusion principle എന്നറിയപ്പെടുന്ന, Wolfgang Pauli എന്ന ഓസ്ട്രിയന്‍ ഫിസിസിസ്റ്റ് 1925-ല്‍ കണ്ടെത്തിയ ഒരു തത്വം മൂലമുള്ള വികര്‍ഷണശക്തിയാണു്‌ ഇവിടെ ഗ്രാവിറ്റേഷനെ നേരിടുന്നതു്‌. അതിന്‍പ്രകാരം, ഐഡന്റിക്കല്‍ ആയ രണ്ടു്‌ ഫെര്‍മിയനുകള്‍ക്കു്‌ (ഉദാ. ഇലക്ട്രോണ്‍, പ്രോട്ടോണ്‍) ഒരേസമയം ഒരേ ക്വാണ്ടം അവസ്ഥ സ്വീകരിക്കാനാവില്ല. ഈ കണങ്ങള്‍ തമ്മിലുള്ള അകലം അങ്ങേയറ്റം ചെറുതാവുമ്പോള്‍ മാത്രമേ ഈ തത്വം വഴിയുള്ള അവയുടെ വികര്‍ഷണം ആക്റ്റീവ് ആവുകയുള്ളു എന്നതിനാല്‍, അപ്പോഴേക്കും ഗ്രാവിറ്റേഷന്‍ മൂലമുള്ള ദ്രവ്യത്തിന്റെ കൊളാപ്സ് അവയെ തമ്മില്‍ അത്രയേറെ അടുപ്പിച്ചിട്ടുണ്ടാവണം. തന്മൂലം അങ്ങനെ സ്റ്റെബിലൈസ് ചെയ്യപ്പെടുന്ന നക്ഷത്രങ്ങള്‍ വളരെ ചെറുതായിരിക്കും. മുഴുവന്‍ ഇന്ധനവും ഉപയോഗിച്ചു്‌ കഴിഞ്ഞശേഷം ശക്തമായ ഗ്രാവിറ്റേഷന്റെ ഫലമായി സാന്ദ്രീകരിക്കപ്പെടുന്ന ഇത്തരം നക്ഷത്രങ്ങളാണു്‌ ‘വെളുത്ത വാമനന്മാര്‍’ (White dwarfs). സോളര്‍ മാസിന്റെ ആയിരത്തിലൊന്നു്‌ മുതല്‍ ഏകദേശം ഒന്നര മടങ്ങില്‍ താഴെ വരെ മാത്രം പിണ്ഡമുള്ള ഇവയുടെ സാന്ദ്രത സാധാരണ നക്ഷത്രങ്ങളുടേതിനേക്കാള്‍ ഒരുലക്ഷം മടങ്ങു്‌ കൂടുതലും, ഏകദേശവ്യാസം വ്യാഴഗ്രഹത്തിന്റേതിലും കുറവുമായിരിക്കും. (White dwarfs മലയാളത്തില്‍ ‘വെളുത്ത വാമനന്മാര്‍’ എന്നാണോ വിളിക്കപ്പെടുന്നതെന്നു്‌ അറിയില്ല. അല്ലെങ്കില്‍ ഇതു്‌ എന്റെ സംഭാവന.)

വൈറ്റ് ഡ്വാര്‍ഫുകളുടെ പിണ്ഡം Chandrasekhar limit  എന്നറിയപ്പെടുന്ന (ഏകദേശം) 1.38 സോളര്‍ മാസിലും കൂടുതലായാല്‍ അവയ്ക്കു്‌ സ്റ്റേബിള്‍ ആയി നിലനില്‍ക്കാന്‍ ആവില്ല. അപ്പോള്‍ അവയില്‍ ഗ്രാവിറ്റേഷന്റെ ഫലമായി പ്രോട്ടോണുകളും ഇലക്ട്രോണുകളും വീണ്ടും വളരെ അടുത്തുവരുന്നു. പൗളി എക്സ്ക്ലൂഷന്‍ പ്രിന്‍സിപ്പിള്‍ വ്യത്യസ്ത കണങ്ങള്‍ക്കു്‌ ബാധകവുമല്ല. അതിന്റെ ഫലമായി പ്രോട്ടോണും ഇലക്ട്രോണും തമ്മില്‍ ഒരു റിയാക്ഷന്‍ വഴി സംയോജിച്ചു്‌ ഒരു ന്യൂട്രോണും ഒരു ന്യൂട്രീനൊയും രൂപമെടുക്കുന്നു. ന്യൂട്രീനൊ എപ്പോഴത്തെയും പോലെ സ്ഥലം കാലിയാക്കി രക്ഷപെടുന്നു. ഈ റിയാക്ഷന്‍ ആ നക്ഷത്രത്തിലെ എല്ലാ പ്രോട്ടോണുകളെയും ഇലക്ട്രോണുകളെയും തമ്മില്‍ സംയോജിപ്പിച്ചു്‌ ന്യൂട്രോണുകളാക്കി മാറ്റാന്‍ പര്യാപ്തമായതിനാല്‍ അതുവഴി അതിനു്‌ വീണ്ടും സങ്കോചിക്കാനും അതുവഴി എനര്‍ജി സ്വതന്ത്രമാക്കാനും കഴിയുന്നു. ഒരു പ്രോട്ടോണും ഇലക്ട്രോണും ചേര്‍ന്ന ഒരു കണികയ്ക്കു്‌ സ്ഥിതി ചെയ്യാന്‍ ആവശ്യമായത്ര സ്ഥലം ഒരു ന്യൂട്രോണ്‍ മാത്രമാവുമ്പോള്‍ ആവശ്യമില്ലല്ലോ. ഈ റിയാക്ഷന്‍ വഴി രൂപമെടുക്കുന്ന ന്യൂട്രീനൊകളുടെ ‘മിന്നല്‍പ്രവാഹത്തിന്റെ’ അകമ്പടിയോടെയും, ഭീമമായ എനര്‍ജി സ്വതന്ത്രമാക്കിക്കൊണ്ടും സംഭവിക്കുന്ന ഈ സ്യുപ്പര്‍നോവ വഴി ആ നക്ഷത്രത്തിന്റെ ബാഹ്യഭാഗങ്ങളുടെ നല്ലൊരംശം ശൂന്യാകാശത്തിലേക്കു്‌ ചിതറപ്പെടുന്നു. അങ്ങനെ അവശേഷിക്കുന്നന്യൂട്രോണ്‍ സ്റ്റാറില്‍ ന്യൂട്രോണുകള്‍ മാത്രമായതിനാല്‍ എലക്ട്രിക് ചാര്‍ജ്ജ് മൂലമുള്ള ശക്തികളൊന്നും അതിലില്ല. ഗ്രാവിറ്റേഷന്റെ ശക്തിയെ നേരിടാനും അതുവഴി ആ നക്ഷത്രത്തെ സ്റ്റെബിലൈസ് ചെയ്യാനുമായി ആകെയുള്ളതു്‌ പൗളി എക്സ്ക്ലൂഷന്‍ പ്രിന്‍സിപ്പിള്‍ അനുസരിച്ചു്‌ ന്യൂട്രോണുകള്‍ തമ്മിലുള്ള വികര്‍ഷണശക്തി മാത്രം. ന്യൂട്രോണ്‍ സ്റ്റാറിന്റെ തരത്തില്‍ പെട്ട ദ്രവ്യത്തിന്റെ ഒരു ക്യുബിക് സെന്റിമീറ്ററിന്റെ പിണ്ഡം 500 മീറ്റര്‍ മുതല്‍ 1400 മീറ്റര്‍ വരെ വശനീളമുള്ള ഇരുമ്പു്‌ ചതുരക്കട്ടകളുടെ പിണ്ഡത്തിനു്‌ തുല്യമാവാം. സൂര്യന്റെ രണ്ടിരട്ടി വരെ ഭാരമുണ്ടാകാവുന്ന അവയുടെ വ്യാസം ഏകദേശം ഇരുപതു്‌ കിലോമീറ്റര്‍ മാത്രമാവാമെന്നതില്‍ നിന്നും അതിന്റെ സാന്ദ്രത എത്ര ഭീമമാണെന്നു്‌ ഊഹിക്കാവുന്നതേയുള്ളു.

അവിടെയും അവസാനിക്കുന്നില്ല ഗ്രാവിറ്റേഷന്റെ ശക്തി. കൃത്യമായ കണക്കുകള്‍ ലഭ്യമല്ലെങ്കിലും, സൂര്യന്റെ ഏകദേശം രണ്ടിരട്ടി ഭാരം വരുന്ന ന്യൂട്രോണ്‍ സ്റ്റാറുകളുടെ കാര്യത്തില്‍ Pauli exclusion principle-നു്‌ പോലും ഗ്രാവിറ്റേഷനെ തടഞ്ഞുനിര്‍ത്താന്‍ ആവില്ല. അതുപോലൊരു സാഹചര്യത്തില്‍ അനിയന്ത്രിതമായ ഗ്രാവിറ്റേഷന്റെ ഫലമായി ദ്രവ്യത്തിന്റെ അന്തിമമായ ഒരു കൊളാപ്സിലൂടെ ന്യൂട്രോണ്‍ സ്റ്റാര്‍ ഒരു ബ്ലാക്ക് ഹോള്‍ ആയി രൂപാന്തരം പ്രാപിക്കുന്നു.

ആണവകണികകളുടെ മൈക്രോസ്കോപ്പിക് ലോകവും നക്ഷത്രങ്ങളുടെ മാക്രോസ്കോപ്പിക് ലോകവും തമ്മില്‍ നിലവിലിരിക്കുന്ന അടിസ്ഥാനപരമായ ബന്ധങ്ങളിലേക്കാണു്‌ ഈ വസ്തുതകള്‍ വിരല്‍ ചൂണ്ടുന്നതു്‌. ഈ രണ്ടു്‌ ലോകങ്ങളും തമ്മിലുള്ള ഇന്ററാക്ഷന്‍ ഇല്ലാതെ പ്രപഞ്ചത്തിന്റെ നിലനില്പു്‌ തന്നെ സാദ്ധ്യമല്ല എന്നാണല്ലോ ഇതില്‍ നിന്നും വ്യക്തമാവുന്നതു്‌. G+ ല്‍ നിന്നും ഞാന്‍ ഷെയര്‍ ചെയ്ത ഒരു ചിത്രത്തില്‍ കാണാനാവുന്നതുപോലെ, ആടിന്റെ കഴുത്തറുത്തു്‌ ചൂടോടെ രക്തം മോന്തിയാല്‍ കാളിയും ദൈവവുമൊക്കെ ആവാമെന്നു്‌ കരുതുന്ന മനുഷ്യരെ ക്വാണ്ടം മെക്കാനിക്സ് പറഞ്ഞു്‌ മനസ്സിലാക്കാനാവില്ല എന്നു്‌ എനിക്കുമറിയാം. കുരിശില്‍ മരിച്ചശേഷം കബറിടത്തില്‍ വച്ച യേശുവിന്റെ മൃതശരീരം ജീവന്‍ വച്ചു്‌ ഉയിര്‍ത്തെഴുന്നേറ്റു്‌ സ്വര്‍ഗ്ഗത്തിലേക്കു്‌ പോയി എന്നും, നല്ലവരെയും മോശക്കാരെയും തമ്മില്‍ വേര്‍തിരിച്ചു്‌ അവര്‍ക്കു്‌ യഥാക്രമം സ്വര്‍ഗ്ഗത്തിലേക്കും നരകത്തിലേക്കും വിസ നല്‍കാനായി അവന്‍ കാഹളനാദത്തോടെ മേഘത്തിലേറി താമസിയാതെ മടങ്ങിവരുമെന്നും കഴിഞ്ഞ രണ്ടായിരം വര്‍ഷങ്ങളായി വിശ്വസിച്ചു്‌ കാത്തിരിക്കുന്ന മനുഷ്യര്‍ പൗളി എക്സ്ക്ലൂഷന്‍ പ്രിന്‍സിപ്പിള്‍ എന്നു്‌ കേള്‍ക്കുമ്പോള്‍ ഹിന്ദു, മുസ്ലിം മുതലായ അന്യമതക്കാരെ എക്സ്ക്ലൂഡ് ചെയ്യാന്‍ കര്‍ത്താവു്‌ അവരോടു്‌ ആഹ്വാനം ചെയ്യുന്നതാണു്‌ വിഷയം എന്നു്‌ കരുതിക്കൂടായ്കയില്ല എന്നും ഊഹിക്കാവുന്നതേയുള്ളു. “ഇതെന്തു്‌ സാധനം” എന്നു്‌ അറിയാന്‍ പോയിട്ടു്‌ ആലോചിക്കാന്‍ പോലും പ്രായം ആവാത്ത ബാല്യത്തില്‍ത്തന്നെ മുറിച്ചുമാറ്റാനായി ലിംഗാഗ്രത്തില്‍ ചര്‍മ്മം വച്ചുപിടിപ്പിക്കുന്ന ഒരു ശുംഭനല്ലാതെ മറ്റു്‌ ദൈവങ്ങളൊന്നും ദൈവങ്ങളേ അല്ല എന്നു്‌ വിശ്വസിക്കുകയും, അവനെ ആരാധിക്കാത്തവര്‍ എല്ലാം മരണാര്‍ഹരായ ശൈത്താന്‍മാരാണെന്നു്‌ വിധിയെഴുതുകയും ചെയ്യുന്ന കൂട്ടരുടെ കാര്യം പറയാതിരിക്കുകയാണു്‌ ഭേദം. ഇവിടെ പ്രശ്നം അതിനെക്കാളൊക്കെ ഗുരുതരമാണു്‌. താന്‍ ഒരു ഫിസിസിസ്റ്റ് ആണെന്നു്‌ അവകാശപ്പെടുന്ന ഒരു വിദ്യാസമ്പന്നന്‍ ഫിസിക്സിനെത്തന്നെ തെറ്റായ വെളിച്ചത്തില്‍ നിര്‍ത്തി മനുഷ്യരെ വഴിതെറ്റിക്കുന്നതാണു്‌ വിഷയം. സമൂഹത്തില്‍ അതു്‌ നിരോധിക്കുന്ന നിയമങ്ങള്‍ നിലവിലില്ലാത്തിടത്തോളംകാലം ആടിന്റെ ചുടുരക്തം കുടിക്കേണ്ടവര്‍ക്കു്‌ കുടിക്കാം. ചോര്‍ന്നുപോകാതെ മേഘത്തില്‍ ഇരുന്നു്‌ ആകാശയാത്ര ചെയ്യാന്‍ കഴിയുന്ന ദൈവപുത്രന്റെ വരവിനുവേണ്ടി കാത്തിരിക്കുന്നവര്‍ക്കു്‌ അതു്‌ ചെയ്യാം. അഗ്രചര്‍മ്മം മുറിച്ചുമാറ്റി സ്വന്തം ദൈവത്തെ പ്രീതിപ്പെടുത്താന്‍ ശ്രമിക്കുന്നവര്‍ക്കു്‌ അതുമാവാം. പക്ഷേ, അത്തരം അന്ധവിശ്വാസികളെ അവര്‍ക്കു്‌ അവരുടെ അന്ധവിശ്വാസങ്ങള്‍ ന്യായീകരിക്കാന്‍ ഉതകുന്ന വിധത്തില്‍ ശാസ്ത്രത്തെ അവരുടെ മുന്നില്‍ തെറ്റായി വ്യാഖ്യാനിക്കാനും വളച്ചൊടിക്കാനും ഒരു ശാസ്ത്രജ്ഞന്‍ ശ്രമിക്കുമ്പോള്‍ അവന്‍ ചെയ്യുന്നതു്‌ ക്രിമിനല്‍ കുറ്റത്തിനു്‌ തുല്യമായ സമൂഹദ്രോഹമാണു്‌. ഹിന്ദുമതത്തെ വിമര്‍ശിക്കുമ്പോള്‍ “ഹായ് ഹായ്” വിളിക്കാന്‍ ഓടിയെത്തുന്ന മുസ്ലിമിനോടൊപ്പമോ, ഇസ്ലാമിനെ വിമര്‍ശിക്കുമ്പോള്‍ പിരി കയറ്റാന്‍ എത്തുന്ന ക്രിസ്ത്യാനിയോടൊപ്പമോ, ക്രിസ്ത്യാനിയെ വിമര്‍ശിക്കുമ്പോള്‍ കയ്യടിച്ചു്‌ പ്രോത്സാഹിപ്പിക്കാനെത്തുന്ന ഹിന്ദുവിനോടൊപ്പമോ, അതിനേക്കാളൊക്കെ വളരെ താഴെ എവിടെയോ ആണു്‌ ശാസ്ത്രത്തെ അടിസ്ഥാനരഹിതമായി കരിതേച്ചു്‌ കാണിക്കുകയും ഒറ്റിക്കൊടുക്കുകയും ചെയ്യുന്ന ശാസ്ത്രജ്ഞവേഷധാരിയുടെ സ്ഥാനം.

(അവലംബം: Martin Bojowald – Zurueck vor den Urknall)

 
3അഭിപ്രായങ്ങള്‍

Posted by on ഫെബ്രുവരി 2, 2012 in പലവക

 

മുദ്രകള്‍: , , ,