RSS

Monthly Archives: ജനുവരി 2008

സൂരജിനു് ഒരു മറുപടി

പ്രിയ സൂരജ്‌,

താരാപഥത്തിന്റെ കമന്റിലെ രണ്ടും മൂന്നും പോയിന്റുകളുടെ എന്റെ മറുപടിക്കു് (മനുഷ്യരുടെ പെരുമാറ്റം, മരണം മുതലായവയെ സംബന്ധിച്ചവ) താങ്കള്‍ നല്‍കിയ അനുബന്ധങ്ങള്‍ യുക്തമാണു്. അവയെ അതേപടി അംഗീകരിച്ചുകൊണ്ടു്, കാര്യകാരണങ്ങളെ സംബന്ധിച്ച ഒന്നാമത്തെ പോയിന്റിനു് നല്‍കിയ മറുപടിയില്‍ എനിക്കുള്ള അല്പം വ്യത്യസ്തമായ കാഴ്ച്ചപ്പാടുകള്‍ ഇവിടെ സൂചിപ്പിക്കട്ടെ. കമന്റിന്റെ ചെറിയ frame-ല്‍ ഒതുക്കാന്‍ മാത്രം ചെറുതല്ലാത്തതിനാലാണു്‍ പോസ്റ്റുന്നതു്.

ultimate reality എന്നതു് മതങ്ങളുടെ ഭാഷയില്‍ ദൈവമാണു്. മതങ്ങളുടെ ഭാഷ ഇവിടെ ആദ്യമേ ഒഴിവാക്കുന്നു. ഭൗതികതയുടെ ഭാഷയിലെ ultimate reality വിശദീകരിക്കാന്‍ ഇതുവരെ ശാസ്ത്രത്തിനു് കഴിഞ്ഞിട്ടില്ല. Mathematical Induction പോലെ, ഒന്നിനു് പുറകെ ഒന്നായി ‘ചെറിയ ചെറിയ’ reality-കള്‍ അറിയാന്‍ കഴിയുമ്പോള്‍, അതിലും ആഴമേറിയ, ഭൗതികമായ ഒരു reality ഉണ്ടാവാം എന്നു് ഊഹിക്കുകയും, അതിനോടു് സാവകാശം സമീപിക്കാന്‍ ശ്രമിക്കുകയും മാത്രമാണു് ശാസ്ത്രം ഇതുവരെ ചെയ്തതും, ഇപ്പോഴും ചെയ്ത്കൊണ്ടിരിക്കുന്നതും. ultimate reality യില്‍ നിന്നും നമ്മള്‍ വളരെ അകലെയാണെന്നും, ഒരുപക്ഷേ എന്നും ആയിരിക്കുമെന്നും ഉള്ളതിനു് ഏറ്റവും നല്ല ഉദാഹരണമാണു് dark matter, dark energy മുതലായവ. ‘ഭാരമേറിയ’ 30000 കോടി ‘സൂര്യന്മാര്‍’ മണിക്കൂറില്‍ എട്ടു് ലക്ഷം കിലോമീറ്റര്‍ വേഗതയില്‍ കറങ്ങുന്ന ഒരു ഗാലക്സി, സത്യത്തില്‍ കോടാനുകോടി കഷണങ്ങളായി ചിതറിത്തെറിക്കേണ്ടതാണു്. പക്ഷേ അതു് സംഭവിക്കുന്നില്ല. അതു് നിയന്ത്രിക്കുന്ന ശക്തികളാവാന്‍ സാദ്ധ്യതയുള്ളവയാണു് dark matter, gravitational lens മുതലായവ. പ്രപഞ്ചത്തിന്റെ 85 ശതമാനം വരുന്ന ഈ പ്രതിഭാസങ്ങളെപ്പറ്റി പഠിക്കാന്‍ കഴിഞ്ഞാല്‍ അതുവഴി ശാസ്ത്രം കൈവരിക്കുന്നതു് ഒരു വലിയ നേട്ടമായിരിക്കും. അറിവിന്റെ ലോകത്തില്‍ അതു് വരുത്തുന്ന മൗലികമായ മാറ്റത്തെ പണ്ടു് ഗലീലിയുടെ കാലത്തു് സൂര്യനല്ല, ഭൂമിയാണു് ‘കറങ്ങുന്നതെന്ന’ കണ്ടുപിടുത്തത്തിന്റെ വിപ്ലവാത്മകതയുമായി മാത്രമേ താരതമ്യം ചെയ്യാനാവൂ.

നമുക്കു് പരിചിതമായ ഒരു ലളിത atom മാതൃക എടുക്കാം. പ്രോട്ടോണും, ന്യൂട്രോണും അടങ്ങുന്ന കേന്ദ്രവും, അതിനെ ‘ചുറ്റുന്ന’ എലക്ട്രോണുകളും. സ്കൂള്‍ പുസ്തകങ്ങളില്‍ പലപ്പോഴും അര പേജു് നിറച്ചു് വരച്ചുകാണിക്കുന്ന മാതൃക! (ഒരു മില്ലീമീറ്റര്‍ അളവിനുള്ളില്‍ ഒതുങ്ങുന്നതു് ഏകദേശം ഒരുകോടി atom ആണെന്ന വസ്തുത മനസ്സിലാക്കാന്‍ ആ മാതൃക സഹായിക്കുന്നില്ലതാനും.) കേന്ദ്രത്തിലെ അണുഘടകങ്ങളുടെ ഭാരവും, എലക്ട്രോണുകളുടെ അവയില്‍നിന്നുള്ള അകലവും, ഭാരവും സംഖ്യാപരമായി ‘കാണുവാന്‍’ കഴിഞ്ഞാലേ ഒരു ആറ്റത്തില്‍ ദ്രവ്യം എന്നു് പറയാവുന്നതു് നിസ്സാരമായ ഒരംശം മാത്രമാണെന്നും, അധികപങ്കും ശൂന്യതയാണെന്നും മനസ്സിലാക്കാനാവൂ. അതായതു്, ഈ ‘ശൂന്യതയെ’ ഒഴിവാക്കാന്‍ കഴിഞ്ഞാല്‍, അതുവഴി രൂപമെടുക്കുന്ന ‘പുതിയ’ ഭൂമി ‘കയ്യിലൊതുങ്ങുന്ന’ വ്യാപ്തത്തിലേക്കു് ചുരുങ്ങും. ഈ ‘പുതിയ’ ദ്രവ്യത്തിന്റെ ഭാരം ഒരു ലിറ്റര്‍ വെള്ളത്തിന്റേതു് പോലെ ഒരു കിലോഗ്രാമല്ല, എത്രയോ കോടി കിലോഗ്രാം ആയിരിക്കുമെന്നു് മാത്രം. ലോകത്തില്‍ ദ്രവ്യം എന്നു് നമ്മള്‍ മനസ്സിലാക്കുന്ന വസ്തുക്കളിലും, യഥാര്‍ത്ഥത്തില്‍, ദ്രവ്യമല്ല ‘ശൂന്യത’ ആണു് കൂടുതലും! എന്താണു് ഈ ശൂന്യത? അതു് തികച്ചും ‘ശൂന്യം’ ആണോ?

മുകളില്‍ സൂചിപ്പിച്ച ‘നിസ്സാരമായ’ അളവു് മൂലം ഒരു ആറ്റത്തിന്റെ ആന്തരജീവിതം പരിശോധിക്കാന്‍ ഇതുവരെയുള്ള ഉപകരണങ്ങളും മാര്‍ഗ്ഗങ്ങളും അപര്യാപ്തമായിരുന്നു. ഈ കുറവു് പരിഹരിക്കാനുതകുന്ന ഒരു ഉപകരണം ഏതാണ്ടു് പൂര്‍ത്തിയായിക്കഴിഞ്ഞു. ഈ ഉപകരണത്തിന്റെ ആറ്റോസെക്കന്റ്‌ മേഖലയിലെ X-ray ‘ഫ്ലാഷുകള്‍’ ഉപയോഗിച്ചു് പ്രകാശതരംഗങ്ങളുടെ മാത്രമല്ല, ആറ്റത്തിന്റെ ഉള്ളിലെയും ‘ഫോട്ടോ എടുക്കാന്‍’ സാധിക്കും. ഒരു ആറ്റോ സെക്കന്റ്‌ (as) = 0,000 000 000 000 000 001 സെക്കന്റ്‌! ഒരു ആറ്റോ സെക്കന്റും ഒരു സെക്കന്റും തമ്മിലുള്ള അനുപാതം, ഏകദേശം ഒരു സെക്കന്റും പ്രപഞ്ചത്തിന്റെ പ്രായവും തമ്മിലേതിനു് തുല്യമാണു്! ഈ വസ്തുതകളെല്ലാം വെളിപ്പെടുത്തുന്നതു് ultimate reality-യില്‍ നിന്നും നമ്മള്‍ വളരെ അകലെയാണെന്നല്ലേ? ultimate reality വിശദീകരിക്കാന്‍ ശാസ്ത്രത്തിനാവുമെന്നു് പറയാറായിട്ടില്ലെന്നു് സൂചിപ്പിക്കാനാണു് ഞാന്‍ ശ്രമിച്ചതു്. എല്ലാം അറിയാം എന്നു് അവകാശപ്പെടാനുള്ള ധൈര്യം മതങ്ങള്‍ക്കേ ഉള്ളൂ. അവര്‍ക്കു് കൂട്ടിനു് ചോദ്യം ചെയ്യപ്പെടാന്‍ പാടില്ലാത്ത ദൈവവുമുണ്ടുതാനും.

ദൈനംദിനജീവിതത്തിലും, ശാസ്ത്രത്തിലും കാര്യകാരണബന്ധം നിലനില്‍ക്കുന്ന പ്രതിഭാസങ്ങളുണ്ടു്. ന്യൂട്ടോണിയന്‍ ഫിസിക്സിലും, കെമിസ്ട്രിയിലുമൊക്കെ അവയ്ക്കു് ഉദാഹരണങ്ങളുമുണ്ടു്. പക്ഷേ അതു് “ഏതു് ‘A’-യില്‍ നിന്നും ഒരു ‘B’ ഉണ്ടാവുന്നു” എന്നതിനു് നീതീകരണമായി ഉപയോഗിക്കാവുന്നതല്ല. തന്റെ Uncertainty Priciple-നു് ഫിസിക്സ്‌ നോബല്‍പ്രൈസ്‌ നേടിയവനും തത്വചിന്തകനുമായിരുന്ന വെര്‍ണര്‍ ഹൈസെന്‍ബെര്‍ഗ്‌ പറയുന്നു: “പിണ്ഡം, ഊഷ്മാവു്, സ്ഥാനം മുതലായവയുടെ നിലവിലിരിക്കുന്ന പ്രത്യേക നിബന്ധനകളുടെ അടിസ്ഥാനത്തില്‍, സ്ഥല-കാലങ്ങളില്‍ തുടരുന്നതും അടുത്തതുമായ അവസ്ഥകളെ കണക്കു് കൂട്ടി പ്രവചിക്കാന്‍ കഴിയുന്നതാണു് causality എന്നതു്. അങ്ങനെയുള്ള ഒരു പ്രവചനം അസാദ്ധ്യമായ പ്രപഞ്ചത്തില്‍ causality അടിസ്ഥാനരഹിതമാണു്. അവിടെ statistical നിയമങ്ങളേ ഉള്ളൂ. വ്യക്തമായ നിയമങ്ങള്‍ അനിവാര്യമായ causality അവിടെ അസ്ഥാനത്താണു്.” quantum physics-ല്‍ elementary particles-ന്റെ സ്വയം രൂപമെടുക്കലിലും നശീകരണത്തിലും ഈ വസ്തുത ദര്‍ശിക്കാന്‍ കഴിയും. Kant, Hume, Helmholts, Comte, Mach, Hegel, Einstein തുടങ്ങി എത്രയോ പേര്‍ വ്യത്യസ്ത നിലപാടുകളില്‍ നിന്നുകൊണ്ടു് പൊരുതിയ ഒരു വിഷയമാണിതു്. എഴുതപ്പെട്ട പുസ്തകങ്ങളും കുറവല്ല.

അതുപോലെ സൂരജ്‌ സൂചിപ്പിച്ച Metric tensor-ലെ two dimensions നമുക്കു് പരിചിതമായ നീളം, വീതി എന്ന രണ്ടു് ഡൈമെന്‍ഷനുകളുമായി തത്തുല്യമല്ല. Riemann surface is a multilayered surface on which a multivalued function of a complex variable can be interpreted as a single-valued function. നമുക്കു് അനുഭവമായ മൂന്നു് ഡൈമെന്‍ഷനുകള്‍ മാത്രമല്ല, എണ്ണമറ്റ ഡൈമെന്‍ഷനുകള്‍ താത്വികമായി ഗണിതശാസ്ത്രത്തില്‍ സാദ്ധ്യമാണെന്നറിയാമല്ലോ. പ്രപഞ്ചവികാസം സംബന്ധിച്ച മറ്റഭിപ്രായങ്ങളോടു് യോജിക്കുന്നു.

Big-bang എന്നാല്‍ പള്ളിപ്പെരുന്നാളുകളിലേതിനേക്കാള്‍ ഇത്തിരി വലിയ ഒരു ‘കതിനവെടി’ എന്നു് കരുതുന്നവര്‍ പ്രപഞ്ചവികാസം എന്നാല്‍ ഒരു ‘ബലൂണ്‍ വീര്‍ക്കല്‍’ ആണെന്നും കരുതും, അത്രതന്നെ. പ്രപഞ്ചത്തിനു് അതില്‍ത്തന്നെ വികസിക്കാനാവുമെന്നും, പ്രപഞ്ചം അതില്‍ത്തന്നെ അതിര്‍ത്തിയും ഉള്ളടക്കവുമാവാമെന്നുമൊക്കെ മനസ്സിലാക്കാന്‍ അത്ര എളുപ്പമല്ല. അതിരും പരിധിയുമൊന്നുമില്ലാത്ത പ്രപഞ്ചം എന്തു് പ്രപഞ്ചം!? നമ്മെ സംബന്ധിച്ചു് ഇന്നും സൂര്യന്‍ കിഴക്കുദിച്ചു് പടിഞ്ഞാറു് അസ്തമിക്കുകയല്ലാതെ ഭൂമി പടിഞ്ഞറുനിന്നും കിഴക്കോട്ടു് കറങ്ങുകയല്ലല്ലോ! “ആദിസ്ഫോടനം ഉണ്ടാവാന്‍ അന്നു് oxygen ഉണ്ടായിരുന്നോ?” എന്നു് ചോദിച്ച ഒരു പുരോഹിതനെ എനിക്കു് പരിചയപ്പെടേണ്ടി വന്നിട്ടുണ്ടു്! തന്റെ അറിവു് ഖണ്ഡിക്കപ്പെടാവുന്നതല്ല എന്ന പൂര്‍ണ്ണവിശ്വാസവും, ‘പുരോഹിതന്‍’ എന്ന പദവിയുടെ തലക്കനവും, ദൈവത്തിന്റെ പിന്‍ബലം തനിക്കുണ്ടെന്ന ഉറപ്പുമെല്ലാം മൂലം അധികാരത്തിന്റെ പ്രത്യേകതയായ ഒരുതരം പുച്ഛസ്വരത്തിലായിരുന്നു അദ്ദേഹത്തിന്റെ ഈ വിഡ്ഢിത്ത വിളംബരം!

സാമാന്യബുദ്ധിക്കു് ഭ്രാന്തു് എന്നു് തോന്നുന്ന പലതും ശാസ്ത്രത്തിന്റെ കയ്യില്‍ പണിയായുധങ്ങള്‍ ആവാറുണ്ടെന്നതു് ശരിതന്നെ. ഉദാഹരണത്തിനു് minus one (-1) ന്റെ വര്‍ഗ്ഗമൂലം. ശാസ്ത്രത്തില്‍ പലപ്പോഴും നേരിടേണ്ടിവരുന്ന complex numbers ‘ആവിഷ്കരിക്കാന്‍ ‘ ഉപയോഗിക്കുന്ന ‘imaginary’! ഇങ്ങനെ ഒരു ‘അസാദ്ധ്യതയുടെ’ സഹായമില്ലാതെ ഉന്നത ഗണിതശാസ്ത്രത്തിലെയോ, Electrical Engineering-ലെയോ സങ്കീര്‍ണ്ണമായ പ്രശ്നങ്ങള്‍ പരിഹരിക്കാനാവുമായിരുന്നോ? longitude-ഉം latitude-ഉം ഭൂമിയില്‍ കാണാനാവില്ലല്ലോ! ഉണ്ടായതെല്ലാം സ്വയമേവ ഉണ്ടായി. ഉണ്ടാക്കിയതെല്ലാം മനുഷ്യന്റെ കൈവേലയും!

 

മുദ്രകള്‍: ,

താരാപഥത്തിനു് ഒരു മറുപടി

‘ദൈവവിശ്വാസവും സ്വതന്ത്ര ഇച്ഛാശക്തിയും’ എന്ന എന്റെ ഒരു പോസ്റ്റില്‍ താരാപഥം ഇട്ട ഒരു കമന്റിനു് മറുപടി എഴുതി വന്നപ്പോള്‍ കുറച്ചു് നീണ്ടുപോയി എന്നു് തോന്നിയതിനാല്‍ അല്‍പം വിപുലീകരിച്ചു് ഒരു പോസ്റ്റാക്കുന്നു.

താരാപഥത്തിന്റെ കമന്റ്‌:

താരാപഥം said…

വായിക്കുന്നുണ്ട്‌. ചില കാര്യങ്ങള്‍ യോജിക്കാന്‍ ബുദ്ധിമുട്ടു തോന്നുന്നു. അത്‌ താങ്കളുടെ കാഴ്ചപ്പാട്‌ എനിക്ക്‌ ഇല്ലാത്തതുകൊണ്ടാവാം.
(1) കാര്യകാരണങ്ങളെക്കുറിച്ച്‌ പറയുമ്പോള്‍, അതിനെ ഒരു നിയമവും ഭരിക്കുന്നില്ല എന്നു പറയുന്നുണ്ട്‌. പരിവര്‍ത്തനം നടന്നുകൊണ്ടിരിക്കുന്ന ഒരു വസ്തു ഒരേ സമയം കാരണവുമാണ്‌, കാര്യവുമാണ്‌. അതുകൊണ്ട്‌ മാറ്റിനിര്‍ത്തുന്നത്‌ യുക്തിയല്ല എന്നു തോന്നുന്നു.
(2) മനുഷ്യരുടെ പെരുമാറ്റരീതികളുടെ അടിസ്ഥാനം ജനനം മുതല്‍ തലച്ചോറിലെത്തുന്ന ഓര്‍മ്മസമ്പത്താണ്‌ എന്ന് പറയുന്നതിനോടും യോജിക്കാന്‍ കഴിയുന്നില്ല. ഒരേ തരത്തിലുള്ള കാര്യങ്ങള്‍ കേട്ടും കണ്ടും പഠിച്ചും വളരാന്‍ മാത്രം അനുവദിച്ചിട്ടുള്ള കുട്ടികളില്‍ നിന്ന് ഒരേതരത്തിലുള്ള പെരുമാറ്റവും എന്തെങ്കിലും പ്രവര്‍ത്തിക്കുന്നതില്‍ ഒരേ തീരുമാനവും പ്രതീക്ഷിക്കാമോ. ചില കാര്യങ്ങള്‍ കണ്ടീഷ്യന്‍ ചെയ്തെടുക്കാം എന്നല്ലാതെ.
(3) ദൈവത്തിന്‌ മരണം ഒഴിവാക്കാന്‍ കഴ്യാതെവരുമ്പോള്‍ വിശ്വാസി നിരീശ്വരവാദിയാകും എന്നു പറയുന്നതിനോടും യോചിക്കാന്‍ കഴിയുന്നില്ല. ജനനവും മരണവും അനിവാര്യമായതാണ്‌ എന്ന് പഠിപ്പിക്കുന്ന ദര്‍ശ്ശനങ്ങള്‍ നിരവധിയുണ്ടല്ലോ ഭാരതത്തില്‍. അതിനോടെല്ലാം നിഷേധാത്മകമായ നിലപാടാണെങ്കില്‍ എല്ലാ വാദവും പിന്നാലെ വന്നുകൊള്ളും. ( ഭ.ഗീ. 2-22 ഉം, 2-27 ഉം ശ്ലോകം താങ്കള്‍ക്കും അറിയാമെന്നു തോന്നുന്നു.)

മറുപടി:

(1) ‘കാര്യവും കാരണവും’ എല്ലാം ഒരു സുപ്രഭാതത്തില്‍ ലോകത്തില്‍ രൂപമെടുത്ത ആശയങ്ങളല്ല. ‘സ്വയം ചലിക്കാതെ ചലിപ്പിക്കുന്നവന്‍’ എന്ന ചിന്ത അരിസ്റ്റോട്ടിലിന്റേതായിരുന്നു. അവിടെനിന്നും, “അചഞ്ചലനായ ദൈവം, നിമിത്തങ്ങള്‍ക്കു് നിമിത്തമാവാന്‍ സ്വയം നിമിത്തം ആവശ്യമില്ലാത്ത ഒരു ആദ്യനിമിത്തം” മുതലായ ദൈവാസ്തിത്വത്തിന്റെ അഞ്ചു് തെളിവുകളിലെത്തിച്ചേരാന്‍ തോമാസ്‌ അക്വീനാസിനു് കഴിഞ്ഞതു് ഏകദേശം 1750 വര്‍ഷങ്ങള്‍ക്കു് ശേഷമാണു്. പക്ഷേ, കത്തോലിക്കാസഭ അക്വീനാസിന്റെ തത്വങ്ങള്‍ ഔദ്യോഗികമായി അംഗീകരിക്കുന്നതു് അതിനും എത്രയോ നൂറ്റാണ്ടുകള്‍ക്കു് ശേഷം മാത്രം! ‘അക്വീനാസിന്റെ അഞ്ചു് അന്തഃകരണങ്ങള്‍’ എന്ന എന്റെ ഒരു പഴയ പോസ്റ്റില്‍ ഇതു് കുറച്ചുകൂടി വിശദമായി ഞാന്‍ വിവരിച്ചിട്ടുണ്ടു്. ദൈവികമെന്നും പൂര്‍ണ്ണമെന്നും മതങ്ങള്‍ പഠിപ്പിക്കുന്ന കാര്യങ്ങള്‍ ചരിത്രത്തില്‍ എത്രയോ പ്രാവശ്യം മനുഷ്യബുദ്ധിക്കു് വേണ്ടി തിരുത്തപ്പെടേണ്ടിവന്നു. ദൈവവചനങ്ങള്‍ കാലാകാലങ്ങളില്‍, മനുഷ്യബുദ്ധിയുടെ വളര്‍ച്ചക്കനുസരിച്ചു്, ഗത്യന്തരമില്ലാതെ മതാധികാരികള്‍ക്കു് തിരുത്തേണ്ടി വരുന്നു എന്നതു്, തിരുത്താന്‍ കഴിയുന്നു എന്നതു്, ദൈവത്തിനുമേലുള്ള മനുഷ്യരുടെ നിയന്ത്രണാധികാരത്തിന്റെ തെളിവല്ലാതെ മറ്റെന്താണു്? താരാപഥം സൂചിപ്പിച്ചതുപോലെ, പരിവര്‍ത്തനം നടന്നുകൊണ്ടിരിക്കുന്ന ഒരു വസ്തു, (അല്ലെങ്കില്‍ സ്വയം പരിണമിച്ചുകൊണ്ടിരിക്കുന്ന ഒരു പ്രപഞ്ചം) ഒരേസമയം കാരണവും കാര്യവുമാവുമ്പോള്‍ ആ വസ്തുവിന്റേതു് ഏതെങ്കിലും അര്‍ത്ഥത്തിലുള്ള ബാഹ്യസ്വാധീനത്തില്‍നിന്നും സ്വതന്ത്രമായ ഒരു അവസ്ഥയാണു്. അവിടെ ഒരു ദൈവമെവിടെ? എന്തിനു്? അവിടെ ദേവാലയങ്ങള്‍ക്കു് എന്തര്‍ത്ഥം? പ്രാര്‍ത്ഥനയും ഉപവാസവുമെല്ലാം അവിടെ സ്വന്തം വിധിയുടെ അനിശ്ചിതത്വത്തില്‍നിന്നും മോചനം നേടാനുള്ള തികച്ചും മനഃശാസ്ത്രപരമായ പരിശ്രമങ്ങള്‍ മാത്രമല്ലേ? മനുഷ്യരുടെ ഈ ബലഹീനത ഒരു ബിസിനസ്‌ ആശയമായി മാറുന്നതല്ലേ മതങ്ങളും, ദേവാലയങ്ങളും? ബുദ്ധന്റെ പ്രതിമ തീര്‍ത്തു് സ്വര്‍ണ്ണം പൂശി ക്ഷേത്രം പണിതു് അതില്‍ കുടിയിരുത്തുന്നതു് ബുദ്ധനോ, അതോ ബുദ്ധമതവിശ്വാസികളോ? ലോകത്തിലെ തിന്മയുടെ കാരണവും പരിഹാരവും തേടിയ ബുദ്ധന്‍ അതുപോലൊരവസ്ഥ സ്വപ്നം പോലും കണ്ടിരിക്കാന്‍ ഇടയില്ല. ഗണിതശാസ്ത്രം എന്തെന്നറിയാത്ത ഒരാള്‍ പ്രാര്‍ത്ഥിച്ചതുകൊണ്ടു് vector algebra മനസ്സിലാക്കാനാവുമോ? ചെലവാവുമെന്നുണ്ടെങ്കില്‍ അതുപോലുള്ളതോ, അതില്‍ കൂടുതലോ ഒക്കെ ‘ദൈവത്തിനു് എല്ലാം സാദ്ധ്യം’ എന്ന label-ല്‍ ചെലവാക്കാന്‍ മടിക്കാത്തവരല്ലേ അധികപങ്കു് ‘ദൈവത്തിന്റെ വക്കീലന്മാരും’? ജന്മവൈകല്യങ്ങള്‍ വരെ ‘ദൈവികമാക്കി’ വിറ്റു് കാശാക്കാന്‍ മടിക്കാത്ത മനുഷ്യരുടെ നാട്ടിലല്ലേ നമ്മള്‍ ജീവിക്കുന്നതു്?

(2) ‘ഒരേതരത്തിലുള്ള കാര്യങ്ങള്‍’ കണ്ടും കേട്ടും പഠിച്ചും കുട്ടികളെ വളരാന്‍ അനുവദിക്കുക എന്നതു് ഒരുതരം Utopia എന്നേ പറയാനാവൂ. neuro-science വെളിപ്പെടുത്തുന്ന തലച്ചോറിന്റെ സങ്കീര്‍ണ്ണത ഇതിനു് തെളിവാണു്. ഒരു മനുഷ്യന്റെ സ്വഭാവരൂപീകരണം എന്നതു് ഒരു പരിധിവരെ ജീവിതകാലം മുഴുവന്‍ നീണ്ടുനില്‍ക്കുന്ന ഒരു പ്രക്രിയയാണു്. അതിന്റെ ഭീമമായ പങ്കും സംഭവിക്കുന്നതു് ബാല്യകാലത്തിലാണു് എന്നതിനാല്‍, പില്‍ക്കാലജീവിതത്തില്‍ അതിനുള്ള പങ്കും അതിനനുസരി‍ച്ചു് ഏറിയിരിക്കും. കുറ്റവാളികളില്‍ പലരേയും മാനസിക ചികിത്സ വഴി സാമൂഹികജീവിതത്തിലേക്കു് തിരിച്ചുകൊണ്ടുവരാന്‍ കഴിയുന്നുണ്ടെന്നതു് ഇതിനു് തെളിവാണു്. ഒന്നിനുമേല്‍ ഒന്നെന്ന രീതിയില്‍ ‘നെയ്തെടുക്കുന്ന’ പതിനായിരക്കണക്കിനു് അനുഭവപാഠങ്ങളുടെ ലോകം ‘ഒരുപോലെ’ വളര്‍ത്തിയെടുക്കാവുന്നതല്ല. അതുകൊണ്ടുതന്നെ, ഒരേ കാഴ്ച കാണുന്നവര്‍ അതു് ഒരേ രീതിയില്‍ മനസ്സിലാക്കിക്കൊള്ളണമെന്നുമില്ല. കാര്യങ്ങള്‍ അത്ര എളുപ്പമായിരുന്നെങ്കില്‍ ഐന്‍സ്റ്റൈനെ ക്ലോണ്‍ ചെയ്തു് ഇഷ്ടം പോലെ ‘ഐന്‍സ്റ്റെനുകളെ’ ഉണ്ടാക്കാമായിരുന്നല്ലോ! കുഞ്ഞുങ്ങളുടെ വളര്‍ത്തല്‍ എത്ര ശ്രദ്ധാപൂര്‍വ്വം ചെയ്യേണ്ട കാര്യമാണെന്നതിലേക്കാണു് ഇതു് വിരല്‍ ചൂണ്ടുന്നതു്.

(3) മരണം പോലുള്ള അനുഭവങ്ങള്‍ ഒഴിവാക്കാന്‍ കഴിയാതെ വരുമ്പോള്‍ നിരീശ്വരവാദികള്‍ ദൈവവിശ്വാസികളാവുന്നതും, വിശ്വാസികള്‍ നിരീശ്വരവാദികളാവുന്നതും അനുഭവങ്ങളുടെ തീവ്രത മനുഷ്യരുടെ ജീവിതത്തില്‍ മൗലികമായ മാറ്റങ്ങള്‍ക്കു് നിദാനമാവാം എന്നതിനു് ഉദാഹരണമായി സൂചിപ്പിച്ചതാണു്. അല്ലാതെ, എപ്പോഴും അങ്ങനെ സംഭവിക്കും എന്ന അര്‍ത്ഥത്തിലല്ല. പാമ്പുവിഷമേറ്റു് ആശുപത്രിയില്‍ കഴിഞ്ഞിരുന്ന നിരീശ്വരവാദിയായിരുന്ന എന്റെ ഒരു സഹപാഠി അവന്റെ വാപ്പയും ഉമ്മയും നിറുത്താതെ കെഞ്ചിയിട്ടും മരണസമയത്തുപോലും തന്റെ നിലപാടില്‍നിന്നും വ്യതിചലിക്കാന്‍ തയ്യാറാവാതിരുന്ന ഒരനുഭവം എനിക്കു് നേരിട്ടു് ഉണ്ടായിട്ടുണ്ടു്. അതുപോലെതന്നെ, “ദൈവേഷ്ടം അങ്ങനെയെങ്കില്‍ അങ്ങനെയാവട്ടെ” എന്നു് സ്വയം ആശ്വസിപ്പിച്ചു് കഷ്ടകാലത്തിലും ദൈവവിശ്വാസത്തില്‍ മുറുകെപ്പിടിക്കുന്നവരും തീര്‍ച്ചയായും ഉണ്ടു്. ഇവയൊക്കെ, എത്ര സങ്കീര്‍ണ്ണമാണു് മനുഷ്യമനസ്സു് എന്നതിന്റെ തെളിവുകളാണു് നമുക്കു് നല്‍കുന്നതു്.

ഭഗവദ്‌ ഗീതയിലെ രണ്ടു് ശ്ലോകങ്ങളെപറ്റി. ഒന്നാമത്തെ ശ്ലോകം: (2-22):
‘ഒരു മനുഷ്യന്‍ പഴയ വസ്ത്രങ്ങള്‍ അഴിച്ചുമാറ്റി പുതിയ വസ്ത്രങ്ങള്‍ ധരിക്കുന്നപോലെ, പഴകി ഉപയോഗശൂന്യമായ ശരീരത്തെ ഉപേക്ഷിച്ചു് ആത്മാവു് പുതിയ ശരീരം സ്വീകരിക്കുന്നു.’

രണ്ടു് കാരണങ്ങള്‍ കൊണ്ടു് ഈ ശ്ലോകം അംഗീകരിക്കാന്‍ എനിക്കു് ബുദ്ധിമുട്ടുണ്ടു്. ഒന്നു്, പുനര്‍ജ്ജന്മം എന്ന ആഴമേറിയ ഒരു വിഷയത്തെ വെറുമൊരു വസ്ത്രം മാറല്‍ പോലെ ലഘുതരമായ ഒരു ഉപമകൊണ്ടു് സ്ഥാപിക്കാന്‍ ശ്രമിച്ചതു്. സാമാന്യജനങ്ങള്‍ക്കു് മനസ്സിലാവുക എന്നതാണു് അതുകൊണ്ടു് ലക്‍ഷ്യമാക്കിയതു് എന്ന വാദമുഖം ബലഹീനമാണു്. കാരണം, ഗീതയെ വ്യാഖ്യാനിക്കേണ്ടവര്‍, പൊരുള്‍ തിരിക്കേണ്ടവര്‍ അതിനായി പ്രത്യേകം തെരഞ്ഞെടുക്കപ്പെട്ടവരാണെന്നതുതന്നെ. രണ്ടാമത്തെ കാരണം കൂടുതല്‍ പ്രാധാന്യം അര്‍ഹിക്കുന്നതാണു്. ആത്മാവു് എന്ന ‘മനുഷ്യനിര്‍മ്മിത’ വാക്കിനു് അക്കാലത്തെ അര്‍ത്ഥം നല്‍കുവാന്‍ ഇന്നത്തെ അറിവിന്റെ നിലയിലുള്ള ബുദ്ധിമുട്ടാണതു്. ആത്മാവു് എന്നതു് മരണസമയത്തു് ശരീരത്തെ ഉപേക്ഷിക്കാവുന്ന, ഭൗതികശരീരത്തില്‍ നിന്നും ‘വേര്‍പെട്ടു്’ നിലനില്‍പുള്ള എന്തോ ഒന്നു് ആവാന്‍ കഴിയില്ല. രോഗമോ, അപകടങ്ങളോ വഴി മനുഷ്യനു് ഓര്‍മ്മശക്തി നഷ്ടപ്പെടാം, താന്‍ ആരാണെന്ന ബോധം ഇല്ലാതാവാം, വികാരങ്ങള്‍ പ്രകടിപ്പിക്കാനുള്ള കഴിവു് ഇല്ലാതാവാം. പക്ഷേ മറ്റു് കഴിവുകള്‍ ഉണ്ടായിരിക്കുകയും ചെയ്യാം. അതായതു്, അതുവഴി മനുഷ്യന്‍ മരിക്കുന്നില്ല, അവന്‍ അവനല്ലാതാവുന്നുമില്ല. കയ്യോ കാലോ മുറിച്ചുമാറ്റപ്പെട്ട ഒരു ശരീരം ഒരു അപൂര്‍ണ്ണമനുഷ്യശരീരമാണു്. എങ്കില്‍, ശാരീരികാവയവങ്ങള്‍ എല്ലാം ഉണ്ടെങ്കിലും, ‘ആത്മാവിന്റേതായ’ ചില കഴിവുകള്‍ ഇല്ലാതാവുമ്പോള്‍ ആത്മാവു് ‘അപൂര്‍ണ്ണ ആത്മാവു്’ ആവേണ്ടതല്ലേ? ‘ആത്മാവും ജീവിതവും’ എന്ന ഒരു പോസ്റ്റില്‍ ഞാന്‍ ഈ വിഷയം കുറച്ചുകൂടി വിശദമായി സൂചിപ്പിച്ചിരുന്നു.

രണ്ടാമത്തെ ശ്ലോകം: (2-27‍):
‘ജനിച്ചവനു് മരണം നിശ്ചയം, മരിച്ചവനു് ജനനം നിശ്ചയം. അതിനാല്‍, ഒഴിവാക്കാനാവാത്ത കാര്യങ്ങളെപ്പറ്റി നീ പരാതിപ്പെടരുതു്.’

‘ജനിച്ചവനു് മരണം നിശ്ചയം’ എന്നതു് ഇന്നത്തെ അറിവില്‍ ശരിതന്നെ. പക്ഷേ, ആയിരം വര്‍ഷങ്ങള്‍ക്കു് ശേഷവും അങ്ങനെതന്നെ ആയിരിക്കും എന്നു് തീര്‍ത്തു് പറയാന്‍ കഴിയുമോ? ‘മരിച്ചവനു് ജനനം നിശ്ചയം’ ആണോ എന്നറിയില്ല എന്നു് പറയാനേ എനിക്കു് കഴിയൂ. ‘ഒഴിവാക്കാനാവാത്ത കാര്യങ്ങളെപ്പറ്റി നീ പരാതിപ്പെടരുതു്’ എന്നതു്, അവ വിധിവിഹിതമോ, അതോ ചിലര്‍ മറ്റുചിലരില്‍ മനഃപൂര്‍വ്വം അടിച്ചേല്‍പ്പിച്ചതോ എന്നതില്‍ ആശ്രയിച്ചിരിക്കുന്ന കാര്യമാണെന്നു് തോന്നുന്നു.

വിധിവൈപരീത്യം മൂലം സംഭവിക്കുന്ന (ഉദാ: വേണ്ടപ്പെട്ടവരുടെ മരണവും മറ്റും!) ഒഴിവാക്കാനാവാത്ത കാര്യങ്ങളെ സഹിക്കാന്‍ തയ്യാറാവുക എന്നൊരു ഉപദേശം ‘How to Stop Worrying and Start Living’ എന്ന പുസ്തകത്തില്‍ Dale Carnegie നല്‍കുന്നുണ്ടു്.

അഭൗതിക വൈജ്ഞാനികശാഖകളിലെ പ്രതിഭാസങ്ങളും നിയമങ്ങളും ഇന്നത്തെ ഭൗതികശാസ്ത്രത്തിലെ പ്രതിഭാസങ്ങളുടെയും നിയമങ്ങളുടെയും ചട്ടക്കൂടുകളില്‍ ഒതുക്കി വിശദീകരിക്കാനാവണമെന്നതു് ഒരു ശാസ്ത്രീയമായ നിലപാടല്ല. അങ്ങനെ ആയിരിക്കണമെന്നതു് ഒരു mythological നിലപാടാണു്. അങ്ങനെ ഒരു വിശദീകരണം സാദ്ധ്യമാവില്ല എന്നു് മനസ്സിലാക്കാന്‍ സാമാന്യബോധം മതി താനും. സാങ്കല്‍പികലോകം പ്രായോഗികലോകത്തിലേക്കു് ലഘൂകരിക്കപ്പെടാവുന്നതല്ല. പുരാണം ശാസ്ത്രമല്ല, സാങ്കല്‍പികമാണു്, ഭാവനാസൃഷ്ടിയാണു്. അവിടെ സൂര്യനെ പാമ്പിനു് വിഴുങ്ങാനാവും. അവിടെ യോനാപ്രവാചകനു് മൂന്നുരാവും മൂന്നുപകലും ഒരു മത്സ്യത്തിന്റെ വയറ്റില്‍ ശ്വാസോച്ഛ്വാസം പോലും ചെയ്യാതെ ജീവിക്കാനും, മൂന്നാം ദിവസം മത്സ്യം ഛര്‍ദ്ദിക്കുമ്പോള്‍ ‘മണിമണിയായി’ യാതൊരു പരിക്കുമില്ലാതെ പുറത്തുവരാനും സാധിക്കും. ചോദ്യം ചെയ്യാന്‍ ആരുമില്ലാതിരുന്ന കാലങ്ങളില്‍ ഇവ അക്ഷരം പ്രതി ശരിയാണെന്നു് പഠിപ്പിക്കപ്പെട്ടിരുന്നു. പിന്നീടു്, സംശയാലുക്കള്‍ ഉണ്ടായപ്പോള്‍ അവ പ്രതീകാത്മകമോ, സാദാ ജനങ്ങള്‍ക്കു് മനസ്സിലാവാത്ത ‘രഹസ്യങ്ങളോ’ ഒക്കെയായി വിവക്ഷിക്കപ്പെട്ടു. ഈദൃശ കെട്ടുകഥകള്‍ക്കു് ശാസ്ത്രീയമായ വിശദീകരണം നല്‍കാനുള്ള കഴിവോ, ബാദ്ധ്യതയോ ശാസ്ത്രത്തിനില്ല. ബുദ്ധിയുടെയും, യുക്തിയുടെയും അടിസ്ഥാനത്തിലുള്ള പ്രായോഗികചിന്തയാണു് ശാസ്ത്രത്തിന്റെ ലോകം. ഭാവനാസൃഷ്ടികളെയും, സങ്കല്‍പകഥകളേയും യുക്തിയുടെ വെളിച്ചത്തില്‍ അപഗ്രഥിച്ചു് മനസ്സിലാക്കാന്‍ ശ്രമിച്ചു് നൂറ്റാണ്ടുകളാണു് മനുഷ്യബുദ്ധി നഷ്ടപ്പെടുത്തിയതു്. യേശുവിന്റെ ദൈവത്വവും, മനുഷ്യത്വവും, ഏകദൈവത്തിന്റെ ത്രിത്വവും മറ്റും സംബന്ധിച്ചു് നടന്ന ചൂടുപിടിച്ച ചര്‍ച്ചകളുടെ ചരിത്രം ഇന്നു് ഹാസ്യരസത്തോടെയല്ലാതെ വായിക്കാന്‍ നിഷ്പക്ഷമതികള്‍ക്കു് കഴിയുകയില്ല. അര്‍ത്ഥശൂന്യമായ, പണ്ടത്തെ ‘ബാര്‍ബര്‍ഷോപ്പിലെ’ ചര്‍ച്ചകളേക്കാള്‍ ആവേശമേറിയ വാദപ്രതിവാദങ്ങള്‍! ന്യായപൂര്‍ണ്ണമായ വാദമുഖങ്ങളെക്കാള്‍, ഭരണാധികാരികളെ വശത്താക്കാന്‍ കഴിയുന്ന പക്ഷത്തിനായിരുന്നു മിക്കവാറും എല്ലായ്പോഴും വിജയവും. ശാസ്ത്രലോകം കൈക്കൊണ്ട തീരുമാനങ്ങളില്‍ ഏറ്റവും ഉചിതവും, ലോകത്തിനു് ഏറ്റവും കൂടുതല്‍ പ്രയോജനപ്രദവുമായതു് ദൈവത്തേയും, പിശാചിനേയും, സ്വര്‍ഗ്ഗത്തേയും നരകത്തേയുമൊക്കെ പള്ളിക്കു് വിട്ടുകൊടുത്തതായിരുന്നു. അങ്ങനെ മനുഷ്യരുടെ പ്രശ്നങ്ങള്‍ പഠിക്കാനും, അവയ്ക്കു് പരിഹാരം തേടാനും ശാസ്ത്രജ്ഞര്‍ക്കു് സമയം ലഭിച്ചു.

പുരാതനമനുഷ്യര്‍ അവരുടെ പരിധികള്‍ക്കുള്ളില്‍ നിന്നുകൊണ്ടു് കാര്യങ്ങള്‍ മനസ്സിലാക്കാന്‍ ശ്രമിക്കുകയായിരുന്നു. അവര്‍ തീര്‍ച്ചയായും ബഹുമാനം അര്‍ഹിക്കുന്നു. പക്ഷേ, ആധുനിക ശാസ്ത്രവിജ്ഞാനം extrapolate ചെയ്തുകൊണ്ടുള്ള പുരാണവ്യാഖ്യാനം തെറ്റായ രീതിയാണു്. കാലഹരണപ്പെട്ടവയെ നീതീകരിക്കാനുള്ള ശ്രമം പുറകോട്ടു് നടക്കുന്നതിനു് തുല്യമേ ആവൂ. അക്ഷരങ്ങള്‍ മനുഷ്യനിര്‍മ്മിതമാണു്, ആത്യന്തികമല്ല. പരിശോധിക്കാന്‍ കഴിയുന്ന, തെളിയിക്കാന്‍ കഴിയുന്ന വസ്തുതകളിലൂടെ യാഥാര്‍ത്ഥ്യങ്ങളോടു് പടിപടിയായി അടുക്കുന്നതാണു് ശാസ്ത്രം. മനുഷ്യരുടെ, സമൂഹത്തിന്റെ പ്രശ്നങ്ങള്‍ പഠിക്കുക, അവയ്ക്കു് പരിഹാരം തേടുക ഇവയ്ക്കൊക്കെയാണു് മുന്‍ഗണന നല്‍കേണ്ടതു്. മനുഷ്യരുടെ ഗത്യന്തരമില്ലായ്മയില്‍ അവര്‍ ‘അത്ഭുതസങ്കേതങ്ങള്‍’ തേടിച്ചെല്ലുന്നതു് സ്വാഭാവികമാണു്. സ്വന്തം ശോചനീയാവസ്ഥ മെച്ചപ്പെടുത്താന്‍ എന്തെങ്കിലും ചെയ്യണമെന്ന ആഗ്രഹമാണു് അതിനുപിന്നില്‍. അതിനവരെ കുറ്റപ്പെടുത്താനാവില്ല. അതുവഴി ഒന്നും നേടാന്‍ അവര്‍ക്കാവില്ലെന്നും, അവര്‍ ബലിയാടുകളോ, ഉപകരണങ്ങളോ ആക്കപ്പെടുകയാണെന്നുമുള്ള വസ്തുത സാവകാശമെങ്കിലും അവരെ മനസ്സിലാക്കിക്കൊടുക്കേണ്ടതു് ഒരു സാമൂഹികചുമതലയാണു്. പക്ഷേ, ഈ ചുമതല ഏറ്റെടുക്കേണ്ടവരാണു് ജനങ്ങളുടെ ദുരവസ്ഥയില്‍നിന്നു് എറ്റവും കൂടുതല്‍ മുതലെടുക്കുന്നതെങ്കില്‍, അവര്‍ അതിനു് തയ്യാറാവുമോ? ഭൂമികുലുക്കമോ, വെള്ളപ്പൊക്കമോ അല്ല, മനുഷ്യരുടെ ഗതികേടു് മതപരമോ, രാഷ്ട്രീയമോ, വ്യക്തിപരമോ ആയ താല്‍പര്യസംരക്ഷണത്തിനു് അനുയോജ്യം എന്നു് കരുതുന്ന നേതൃത്വമാണു് ഒരു സമൂഹത്തിനു് നേരിടേണ്ടിവരുന്നതില്‍ ഏറ്റവും വലിയ catastrophe.

 

മുദ്രകള്‍: ,

വിശുദ്ധപൗലോസിന്റെ സ്ത്രീവിരോധം

മതങ്ങളില്‍ പൊതുവേയും, കത്തോലിക്കാസഭയില്‍ പ്രത്യേകിച്ചും, സ്ത്രീകള്‍ ‘വിലകുറഞ്ഞ’ മനുഷ്യരായി വീക്ഷിക്കപ്പെടുന്നു. പ്രാര്‍ത്ഥിക്കാനും, നോമ്പുനോക്കാനും, കുമ്പസാരിക്കാനും, അടുക്കളപ്പണിയും തോട്ടപ്പണിയും ചെയ്യാനുമൊക്കെ സ്ത്രീകള്‍ക്കു് ഇഷ്ടംപോലെ സ്വാതന്ത്ര്യമുണ്ടു്. പക്ഷേ വിശ്വാസിസമൂഹത്തിന്റെ നേര്‍പകുതിയായ സ്ത്രീവര്‍ഗ്ഗത്തിനു് പൗരോഹിത്യം സ്വീകരിക്കുന്നതിനോ, സഭയിലെ നയരൂപീകരണപ്രക്രിയയില്‍ സജീവമായി പങ്കെടുക്കുന്നതിനോ അര്‍ഹതയില്ല. patriarchal society-കളില്‍ രൂപമെടുത്ത മതങ്ങളില്‍ മറ്റൊരു നിലപാടു് പ്രതീക്ഷിക്കുന്നതിലും വലിയ കാര്യമൊന്നുമില്ല. കാണാനും, തിന്നാനും നല്ലതെന്നു് തിരിച്ചറിഞ്ഞ പഴം സദുദ്ദേശത്തില്‍ പുരുഷനു് നല്‍കി അവനെ സന്തോഷിപ്പിക്കാന്‍ ശ്രമിക്കുന്ന സ്ത്രീ പോലും അവിടെ പാപിഷ്ഠയായെ വിവക്ഷിക്കപ്പെടുകയുള്ളു. അതാണു് ദൈവവിശ്വാസം തലയില്‍ കയറിയാല്‍ പുരുഷനു് സംഭവിക്കുന്ന metamorphosis! (അതുകൊണ്ടു് സ്ത്രീകള്‍ക്കു് religious mania ഉണ്ടാകാറില്ല എന്നര്‍ത്ഥമില്ല.) ഇതൊക്കെയാണെങ്കിലും, അല്ലെങ്കില്‍ അതുകൊണ്ടുതന്നെ, ബൈബിളിലെ വിവരണത്തിന്റെ അടിസ്ഥാനത്തില്‍, ക്രിസ്തുമതത്തിന്റെ അടിസ്ഥാനമായ യേശുക്രിസ്തുവും, ക്രിസ്തുമതം യഥാര്‍ത്ഥത്തില്‍ ലോകത്തില്‍ സ്ഥാപിച്ചവനായ വിശുദ്ധ പൗലോസും സ്ത്രീയുടെ സമൂഹത്തിലെ സ്ഥാനത്തെ സംബന്ധിച്ചു് ഏകാഭിപ്രായം പുലര്‍ത്തുന്നവരല്ല എന്നു് മനസ്സിലാക്കേണ്ടിവരുമ്പോള്‍, ബൈബിളിലെ മറ്റു് പല കാര്യങ്ങളിലുമെന്നപോലെതന്നെ, നിഷ്പക്ഷമതികളായ അന്വേഷകര്‍ക്കു് അത്ഭുതപ്പെടേണ്ടിവരുന്നു.

വിശുദ്ധ പൗലോസ്‌ കല്‍പിക്കുന്നു: “സ്ത്രീയെ തൊടാതിരിക്കുന്നതു് ‘മനുഷ്യനു്’ നല്ലതു്. എങ്കിലും ദുര്‍ന്നടപ്പുനിമിത്തം ഓരോരുത്തനു് സ്വന്തം ഭാര്യയും, ഓരോരുത്തിക്കു് സ്വന്ത ഭര്‍ത്താവും ഉണ്ടായിരിക്കട്ടെ.” – (1. കൊരിന്ത്യര്‍ 7: 2) വിശുദ്ധ പൗലോസിന്റെ അഭിപ്രായത്തില്‍, ലൈംഗികജീവിതത്തിന്റെ ലക്‍ഷ്യം മനുഷ്യരാശിയുടെ നിലനില്‍പ്പല്ല, പുരുഷനും സ്ത്രീയും വഴിപിഴച്ചുപോകാതിരിക്കാനുള്ള ഒരു കുറുക്കുവഴി മാത്രമാണു്! അദ്ദേഹം ജീവിച്ചിരുന്ന കാലഘട്ടത്തില്‍ ടെസ്റ്റ്‌ ട്യൂബ്‌ വഴി വംശം വര്‍ദ്ധിപ്പിക്കുന്നതിനുള്ള ശാസ്ത്രീയ-സാങ്കേതികവിദ്യകള്‍ മനുഷ്യന്‍ കണ്ടുപിടിച്ചിട്ടില്ലായിരുന്നു. അതിനാല്‍, വംശം നിലനിര്‍ത്താന്‍ പുരുഷനും സ്ത്രീയും പരസ്പരം ‘തൊടുകയല്ലാതെ’ മറ്റു് വഴിയൊന്നുമുണ്ടായിരുന്നില്ല. ഇനി, പൗലോസിന്റെ ആഗ്രഹം പോലെ, സകല മനുഷ്യരും ക്രിസ്ത്യാനികളാവുകയും, അവര്‍ എല്ലാവരും ‘ദുര്‍ന്നടപ്പു്’ എന്ന ഏര്‍പ്പാടു് ഉപേക്ഷിക്കുകയും ചെയ്തു എന്നു് കരുതിയാലോ? ‘തൊടൂല്ല നിന്നെ ഞാന്‍’ എന്നു് പുരുഷന്മാരും, ‘തൊട്ടുപോകരുതു് എന്നെ’ എന്നു് സ്ത്രീകളും കടുംപിടുത്തം പിടിക്കുന്ന ഒരവസ്ഥ!? പണ്ടു് ആദാമും ഹവ്വായും ദൈവകല്‍പന അക്ഷരം പ്രതി അനുസരിക്കുകയും, പാമ്പു് പറിച്ചുകൊടുത്ത പഴം തിന്നാതിരിക്കാന്‍ തീരുമാനിക്കുകയും ചെയ്തിരുന്നെങ്കിലത്തെ അവസ്ഥയുമായി ഇതൊന്നു് താരതമ്യം ചെയ്തുനോക്കുന്നതു് നന്നായിരിക്കും! അവര്‍ അനുസരണശീലരായിരുന്നെങ്കില്‍ ഇന്നു് മനുഷ്യലോകം ഉണ്ടാവുമായിരുന്നോ? വിശുദ്ധന്മാരായാലും സഹജീവികളോടു് പറയാവുന്നതിന്റെയും, ആവശ്യപ്പെടാവുന്നതിന്റെയും പരിധി എന്തു് എന്നു് അറിഞ്ഞിരിക്കുന്നതുകൊണ്ടു് വലിയ തെറ്റില്ലെന്നു് തോന്നുന്നു. സ്വന്തം അമ്മയുടെ വയറ്റില്‍ പത്തുമാസം കഴിഞ്ഞതിനുശേഷമാണു് താനും ഈ ഭൂമിയുടെ വെളിച്ചം കണ്ടതെന്ന സാമാന്യസത്യം മറന്നുകൊണ്ടല്ലാതെ ‘സ്ത്രീയെ തൊടാതിരിക്കുന്നതു് മനുഷ്യനു് നല്ലതു്’ എന്നും മറ്റുമുള്ള ‘മതതത്വശാസ്ത്രങ്ങള്‍’ വിളമ്പാന്‍ ആര്‍ക്കെങ്കിലും കഴിയുമോ?

അതേസമയം, ഉഭയസമ്മതപ്രകാരം ‘പെണ്ണിനെ ആണൊന്നു് തൊട്ടാലോ, പെണ്ണൊന്നു് ആണിനെ തൊട്ടാലോ’ അത്ര വലിയ ഭൂകമ്പം ഒന്നും ഉണ്ടാവാനില്ല എന്ന നിലപാടാണു് യേശു സ്വീകരിച്ചു് കാണുന്നതു്. ഒരു പെണ്ണിന്റെ ദുഃഖത്തില്‍ അല്‍പം കരയേണ്ടിവരുന്നതും അത്ര വലിയ ഒരു പ്രശ്നമായി യേശു കരുതുന്നില്ല. ബേഥാന്യാക്കാരനായ ലാസറിനെ ഉയിര്‍പ്പിച്ച ഭാഗം ബൈബിളില്‍ വായിച്ചിട്ടില്ലേ? ലാസര്‍ മാര്‍ത്തയുടെയും മറിയയുടെയും സഹോദരനായിരുന്നു. യേശു അവരെ വളരെ സ്നേഹിച്ചിരുന്നു. (ഈ മറിയയാണു് യേശുവിനെ പരിമളതൈലം പൂശി, തലമുടികൊണ്ടു് അവന്റെ കാല്‍ തുടച്ചതു്.) ലാസര്‍ രോഗം പിടിപെട്ടു് കിടക്കുന്നു എന്നു് ആളയച്ചു് പറഞ്ഞിട്ടും യേശു ബേഥാന്യായിലേക്കു് രണ്ടു് ദിവസം കഴിഞ്ഞാണു് പോകുന്നതു്. കാരണം, “അവന്റെ ദീനം മരിക്കാനല്ല, ദൈവപുത്രന്‍ മഹത്വപ്പെടേണ്ടതിനായിട്ടാണു്” എന്നു് യേശുവിനു് അറിയാമായിരുന്നു. ലാസറിനെ കല്ലറയില്‍ വച്ചു് നാലു് ദിവസം കഴിയുമ്പോള്‍ അവിടെ എത്തുന്ന യേശുവിനെ സ്വീകരിക്കാന്‍ ഗ്രാമവാതില്‍ക്കലേക്കു്‍ മാര്‍ത്ത ഒറ്റയ്ക്കാണു് ഓടിച്ചെല്ലുന്നതു്. സഹോദരന്‍ ഉയിര്‍ത്തെഴുന്നേല്‍ക്കുമെന്ന വാഗ്ദാനം അവള്‍ക്കു് നല്‍കുന്നതല്ലാതെ യേശു ഗ്രാമത്തിലേക്കു് കടക്കുന്നില്ല. മാര്‍ത്ത തിരിച്ചുചെന്നു് “ഗുരു വന്നിട്ടുണ്ടെന്നും, നിന്നെ വിളിക്കുന്നു” എന്നും രഹസ്യമായി മറിയയോടു് പറയുന്നു. അതുകേട്ട മറിയ യേശുവിന്റെ അരികിലെത്തി കാല്‍ക്കല്‍ വീണു് കരയുമ്പോള്‍ യേശുവും ‘ഉള്ളം നൊന്തു് കലങ്ങി’ കരയുന്നു. ‘Jesus wept’ (യേശു കണ്ണുനീര്‍ വാര്‍ത്തു) എന്ന ഇംഗ്ലീഷ്ബൈബിളിലെ ഏറ്റവും നീളം കുറഞ്ഞ വാക്യം പ്രതിഷ്ഠിക്കപ്പെട്ടിരിക്കുന്നതു് ഇവിടെയാണെന്നതു് ഒരു accidental coincidence മാത്രമാവാം! – (യോഹന്നാന്‍ 11: 1 – 44)

മറിയ യേശുവിനെ മുന്നൂറിലേറെ വെള്ളിക്കാശു് വിലയുള്ള ‘സ്വച്ഛജടാമാംസി’ തൈലം പൂശുമ്പോള്‍ “അതു് വിറ്റു് ദരിദ്രരെ സഹായിക്കാമായിരുന്നില്ലേ” എന്നു് ചോദിക്കുന്നവരുടെ മുന്‍പിലും യേശു അവളെ ന്യായീകരിക്കുന്നു: “ദരിദ്രര്‍ എല്ലായ്പ്പോഴും നിങ്ങളുടെ അടുക്കല്‍ ഉണ്ടല്ലോ. ഇച്ഛിക്കുമ്പോള്‍ അവര്‍ക്കു് നന്മ ചെയ്യാന്‍ നിങ്ങള്‍ക്കു് കഴിയും. ഞാനോ എല്ലായ്പോഴും നിങ്ങളോടു് കൂടെ ഇരിക്കയില്ല. കല്ലറയിലെ അടക്കത്തിനായി എന്റെ ദേഹത്തിനു് മുന്‍പുകൂട്ടി അവള്‍ തൈലം തേച്ചു.” – (മര്‍ക്കോസ്‌ 14: 3 – 9)

മറ്റൊരവസരത്തില്‍, യേശു മാര്‍ത്തയുടെയും മറിയയുടെയും വീട്ടില്‍ ആയിരുന്നപ്പോള്‍ ശുശ്രൂഷയാല്‍ കുഴങ്ങിയ മാര്‍ത്ത, തന്നെ ജോലിയില്‍ സഹായിക്കാതെ അവന്റെ അടുത്തിരുന്നു് വചനം കേള്‍ക്കുന്ന മറിയയെ പറ്റി പരാതി പറയുമ്പോഴും യേശു മറിയയുടെ ‘പക്ഷം’ ചേരുന്നു. “മാര്‍ത്തയേ, നീ പലതിനെച്ചൊല്ലി വിചാരപ്പെട്ടും, മനം കലങ്ങിയുമിരിക്കുന്നു. എന്നാല്‍ അല്‍പമേ വേണ്ടൂ; അല്ല, ഒന്നുമതി. മറിയ നല്ല അംശം തെരഞ്ഞെടുത്തിരിക്കുന്നു; അതു് ആരും അവളോടു് അപഹരിക്കയുമില്ല.” – (ലൂക്കോസ്‌ 10: 38 – 42) ചിലരോടു് ആര്‍ക്കും ഒരു പ്രത്യേക താല്‍പര്യം തോന്നും. അതു് സൗന്ദര്യം മൂലമോ, ശാരീരിക chemistry യുടെ പൊരുത്തം മൂലമോ ഒക്കെയാവാം. അതില്‍ എന്തോ വലിയ കുഴപ്പമുണ്ടെന്നു് കരുതുന്നതാണു് കുഴപ്പം.

വ്യഭിചാരക്കുറ്റം ചുമത്തിയ ഒരു സ്ത്രീയുടെ പുറകെ ‘മുണ്ടും മടക്കിക്കുത്തി’ കല്ലെറിയാന്‍ എത്തുന്ന സദാചാരവക്കീലന്മാരില്‍നിന്നും അവളെ രക്ഷിക്കാന്‍ ശ്രമിക്കുന്ന യേശു ഒരു സ്ത്രീവിരോധി ആവുമോ? അന്നത്തെ മനുഷ്യര്‍ക്കു് മനസ്സാക്ഷി ഉണ്ടായിരുന്നു – അതുകൊണ്ടു് മനസ്സാക്ഷിക്കുത്തും. തന്മൂലം, “നിങ്ങളില്‍ പാപമില്ലാത്തവന്‍ ഇവളെ ഒന്നാമതു് കല്ലെറിയട്ടെ” എന്ന വാചകം അവരില്‍നിന്നും അവളെ രക്ഷിക്കുവാന്‍ യേശുവിനു് അന്നു് ധാരാളം മതിയായിരുന്നു. ഇന്നാണെങ്കില്‍ ആദ്യം കല്ലേറു് കൊള്ളുന്നതു് യേശുവിനു് തന്നെയായിരിക്കും. അതിനുശേഷമേ അവര്‍ അവളെ എറിയൂ. അവളെ ആദ്യം എറിയുന്നവന്റെ ശരീരത്തിനു് അവള്‍ തലേന്നു് പുരട്ടിയിരുന്ന സുഗന്ധത്തിന്റെ ഗന്ധവുമായിരിക്കും.

മഹാപുരോഹിതന്മാരോടും ജനത്തിന്റെ മൂപ്പന്മാരോടും യേശു പറയുന്നു: “ചുങ്കക്കാരും വേശ്യമാരും നിങ്ങള്‍ക്കു് മുന്‍പായി ദൈവരാജ്യത്തില്‍ കടക്കുന്നു.” – (മത്തായി 21: 31)

യോഹന്നാന്റെ സുവിശേഷപ്രകാരം, ഉയിര്‍ത്തെഴുന്നേറ്റ യേശു ആദ്യം പ്രത്യക്ഷപ്പെടുന്നതുതന്നെ മഗ്ദലക്കാരത്തി മറിയക്കാണു്. അല്ലാതെ, തന്റെ ‘പള്ളി പണിയേണ്ട പാറയായ’ പത്രോസിനോ, മറ്റു് ശിഷ്യന്മാര്‍ക്കോ അല്ല. – (യോഹന്നാന്‍ 20: 1 – 18) ഇങ്ങനെയൊക്കെയാണെങ്കിലും, ക്രിസ്തുമതത്തില്‍ സ്ത്രീകള്‍ രണ്ടാം കിടക്കാര്‍! ‘സ്ത്രീകളും വേശ്യകളുമൊക്കെ വേണമെങ്കില്‍ ദൈവരാജ്യത്തില്‍ കടന്നോട്ടെ. അതിനാര്‍ക്കു് പരാതി? ഇവിടെ പെണ്ണുങ്ങള്‍ അത്ര കേമികളാവണ്ട.’ എന്നതാവാം പിതാക്കന്മാരുടെ നിലപാടു്!

“സ്ത്രീകളെ തൊടാതിരിക്കൂ” എന്നു് വിശുദ്ധ പൗലോസ്‌. “വിശ്വാസികളേ! നിങ്ങള്‍ ഗര്‍ഭനിരോധനമാര്‍ഗ്ഗങ്ങള്‍ ഉപേക്ഷിക്കൂ, അഥവാ കുഞ്ഞുങ്ങളെ എത്രവേണമെങ്കിലും ജനിപ്പിക്കൂ” എന്നു് ആധുനിക മതാധികാരികള്‍! ഈവിധ ഉപദേശവൈരുദ്ധ്യങ്ങള്‍ക്കു് നടുവില്‍ കുറേ വിശ്വാസിസമൂഹങ്ങളും! സ്വന്തം സൃഷ്ടി സ്വയം നശിപ്പിച്ചു്, ഭൂമുഖത്തുനിന്നും അപ്രത്യക്ഷമാവാന്‍ ഇടയാക്കുന്ന ഉപദേശങ്ങള്‍ ഒരു ദൈവത്തില്‍ നിന്നും ഏതായാലും ഉണ്ടാവുമെന്നു് തോന്നുന്നില്ല. ജനപ്പെരുപ്പം മൂലം സാമൂഹികഭദ്രത തന്നെ അപകടത്തിലാവുന്നു എന്നറിഞ്ഞുകൊണ്ടു്, തുടര്‍ന്നും പെറ്റുപെരുകൂ എന്നു് അവരെ ഉത്ബോധിപ്പിക്കാനും മനുഷ്യസ്നേഹമോ സാമാന്യബോധമോ ഉള്ള ഒരു ദൈവം തയ്യാറാവുകയില്ല. ജനപ്പെരുപ്പം സ്ഫോടകാത്മകമായ അവസ്ഥയിലേക്കു് നീങ്ങുന്നതു് കാണുമ്പോള്‍ അതു് നിയന്ത്രിക്കുവാന്‍ അനുയോജ്യമായ ശാസ്ത്രീയവിജ്ഞാനം ഉപയോഗപ്പെടുത്തുവാനുള്ള കടപ്പാടു് ഏതൊരു സമൂഹത്തിനുമുണ്ടു്. അങ്ങനെയുള്ള ശ്രമങ്ങള്‍ക്കു് നേരെ കണ്ണടക്കുകയോ, തുരങ്കം വയ്ക്കുകയോ ചെയ്യുന്നവര്‍ ആരുതന്നെ ആയാലും, അവര്‍ ചെയ്യുന്നതു് സമൂഹദ്രോഹമാണു്.

 

മുദ്രകള്‍: , ,

ഒറ്റമൂലി ഇരട്ടമൂലി ഇത്യാദി….

താമസിച്ചാണു് സൂരജിന്റേയും, അതുവഴി സുമേഷ്‌ ചന്ദ്രന്റെയും പോസ്റ്റുകള്‍ കണ്ടതു്. അവയ്ക്കു് നേരിട്ടുള്ള കമന്റല്ല ഇതു്. എങ്കിലും അതിനോടു് കൂട്ടിച്ചേര്‍ത്തു് വായിക്കാമെന്നു് തോന്നുന്നു. എനിക്കു് നേരിട്ടു് മനസ്സിലാക്കാന്‍ കഴിഞ്ഞിട്ടുള്ള ചില കാര്യങ്ങളാണു് ഇവ.

ഒരു B.Sc.(zoology) final year വിദ്യാര്‍ത്ഥിയെ പെസഹാരാത്രിയില്‍ പള്ളിയിലേക്കു് പോകുന്ന വഴി ഒരു പട്ടി കടിക്കുന്നു. തന്നെ കടിച്ചതു് അയല്‍വാസിയുടെ പട്ടി തന്നെയാണെന്നു് പൂര്‍ണ്ണ സാമ്യം മൂലം അതിരാവിലെ തന്നെ എഞ്ചിനിയറിംഗ്‌ ബിരുദധാരിയായ സഹോദരനോടൊപ്പം പട്ടിയെ നേരിട്ടു് കണ്ടു് അവന്‍ സ്ഥിരീകരിക്കുന്നു. (വിദ്യാഭ്യാസയോഗ്യത പറയാന്‍ കാരണം അവര്‍ അജ്ഞരായിരുന്നില്ല എന്നു് അറിഞ്ഞിരിക്കാനാണു്.) അത്ര ഉറപ്പായതിനാല്‍ കുടുംബസുഹൃത്തായ ഡോക്ടര്‍ പോലും vaccination-ന്റെ ആവശ്യമില്ലെന്നു് ഉപദേശിക്കുന്നു. താമസിയാതെ ഈ കഥ തന്നെ എല്ലാവരും മറക്കുന്നു. 80 ദിവസങ്ങള്‍ക്കു് ശേഷം പെട്ടെന്നു് ഒരു പനി വരുമ്പോള്‍ rabies എന്നൊരു സംശയം ആര്‍ക്കുമുണ്ടാവുന്നില്ല. പനിയുമായി ആശുപത്രിയില്‍ ചെന്നപ്പോള്‍ ഗുളികക്കൊപ്പം കുടിക്കാന്‍ കൊടുത്ത വെള്ളത്തിനു് നേരേ അവന്‍ ഭയം പ്രകടിപ്പിക്കുന്നതു് (hydrophobia) കണ്ട ഡോക്ടര്‍ “ഇവനെ എന്നെങ്കിലും പട്ടി കടിച്ചിരുന്നോ?” എന്നു് ചോദിച്ചപ്പോഴാണു് ആ കഥ വീണ്ടും ഓര്‍മ്മയിലെത്തുന്നതു്. ഡോക്ടറുടെ നിര്‍ദ്ദേശപ്രകാരം അവനെ കോട്ടയം മെഡിക്കല്‍ കോളേജ്‌ ഹോസ്പിറ്റലിലേക്കു് മാറ്റി. ലോകത്തിലിന്നോളം പേപ്പട്ടിവിഷബാധ രോഗലക്ഷണം തുടങ്ങിയതിനുശേഷം ഭേദമാക്കാന്‍ കഴിഞ്ഞിട്ടില്ല എന്നും ഇനി ആകെ ചെയ്യാന്‍ കഴിയുന്നതു് അവന്‍ violent ആകാതിരിക്കാന്‍ കൃത്യമായ interval-ല്‍ sedate ചെയ്തുകൊണ്ടിരിക്കുക മാത്രമാണെന്നും chief doctor നേരിട്ടു് അറിയിച്ചപ്പോള്‍ അവന്റെ കുടുംബത്തിനും സുഹൃത്തുക്കള്‍ക്കും തകര്‍ന്നതു് ഒരു ലോകമായിരുന്നു. ഇടയ്ക്കിടെ പൂര്‍ണ്ണബോധം! വീണ്ടും അബോധാവസ്ഥ! മരുന്നിന്റെ ശക്തികൊണ്ടു് violent ആവുന്നില്ലെന്നു് മാത്രം! അസഹ്യവും ക്രൂരവുമായ കാഴ്ച്ച! ആശുപത്രിയിലെത്തി രണ്ടാം ദിവസം അവന്‍ മരിച്ചു.

കട്ടിലില്‍ നിന്നു് താഴെ വീഴാനുള്ള സാദ്ധ്യത ഉള്ളതുകൊണ്ടു് തറയില്‍ ഒരു mattress-ല്‍ കിടത്തിയിരുന്ന ആ ഇരുപത്തൊന്നു് വയസ്സുകാരന്റെ മുറിക്കു് വെളിയില്‍ ജീവച്ഛവങ്ങളെപ്പോലെ കാത്തിരിക്കുന്ന ബന്ധുമിത്രാദികള്‍! അപ്പോള്‍ ദാ വരുന്നു, ഒരു ഒറ്റമൂലിക്കാരന്‍! ലുങ്കി, ബനിയന്‍, തലയില്‍ കെട്ടു്, കയ്യില്‍ എന്തിനെന്നറിയില്ല, കുത്തിപ്പിടിക്കാന്‍ മാത്രം ബലമില്ലാത്ത ഒരു വടിയും! “ചെറുനാരങ്ങാനീരില്‍” ഒരു ചെയ്ത്തുണ്ടത്രേ! ചെറുനാരങ്ങയും പേപ്പട്ടിവിഷവും പൊരുത്തപ്പെടുകയില്ലെന്നു് പണ്ടേ കേട്ടിട്ടുണ്ടു്. അതു് നേരാണോ എന്നറിയില്ല. പക്ഷേ, വെള്ളത്തെ ഭയക്കുന്ന രോഗമുള്ള ഒരു രോഗിയെ നാരങ്ങാനീരു് കുടിപ്പിക്കുന്നതെങ്ങനെ? ബലം പ്രയോഗിച്ചു് കുടിപ്പിക്കണം എന്നായിരുന്നു ഗുരുവിന്റെ മറുപടി! അധികം അവിടെ നിന്നാല്‍ തടി കേടാവും എന്നു് തോന്നിയതുകൊണ്ടാവും, അത്ഭുതചികിത്സകന്‍ സ്ഥലം വിട്ടു. മറ്റു് മനുഷ്യരുടെ എത്ര ദയനീയമായ അവസ്ഥയും ചൂഷണം ചെയ്യാന്‍ മടിക്കാത്ത മനുഷ്യാധമന്മാര്‍ ലോകത്തിലുണ്ടെന്നു് ഞാന്‍ ആദ്യം മനസ്സിലാക്കിയതു് അന്നായിരുന്നു. വേണ്ടപ്പെട്ടവരുടെ ജീവന്‍ രക്ഷിക്കാന്‍ മനുഷ്യര്‍ പലപ്പോഴും യുക്തിഹീനമായ കാര്യങ്ങള്‍ക്കുപോലും അംഗീകാരം നല്‍കും. അവര്‍ അജ്ഞരാണെങ്കില്‍ പ്രത്യേകിച്ചും ! ഇവിടെ പറഞ്ഞ അതേ സാഹചര്യത്തില്‍, അയാളുടെ ഒറ്റമൂലിപ്രയോഗത്തിനു് സമ്മതം മൂളുന്നവരും ഉണ്ടാവാം. മനുഷ്യരുടെ ഈ ബലഹീനതയെപ്പറ്റിയുള്ള “അറിവാണു്” അത്യാഹിതസമയത്തു് അന്യരെ ലജ്ജയില്ലാതെ സമീപിക്കുവാനുള്ള ധൈര്യം അയാള്‍ക്കു് നല്‍കുന്നതു്.

കോളേജിലേക്കു് പോകുന്ന വഴി വെളിപാടുണ്ടായി “സിദ്ധന്‍” ആയിത്തീര്‍ന്ന ഒരുവനെപ്പറ്റി കേട്ടിട്ടുണ്ടു്. സിദ്ധന്‍ പ്രസിദ്ധന്‍ ആയതോടെ തമിഴ്‌നാട്ടില്‍നിന്നുവരെ luxury coach-കളില്‍ രോഗികള്‍ എത്തിയിരുന്നു അയാളുടെ വീടിനു് മുന്നില്‍. ഒരു miniature പോട്ട! ഒരിക്കല്‍ അവിടെ ചികിത്സയ്ക്കു് പോയ എന്റെ ഒരു നാട്ടുകാരി വൃദ്ധ അവര്‍ക്കു് സിദ്ധന്റെ ചികിത്സ വളരെ ഫലം ചെയ്തു എന്നെന്നോടു് പറയുകയുണ്ടായി. നല്ലകാര്യം! ഞാന്‍ കരുതി. “എന്തു് മരുന്നാണു് സിദ്ധന്‍ നല്‍കിയതു്?” ഞാന്‍ അന്വേഷണകുതുകിയായി. “അയലത്തല തേക്കിന്റെ ഇലയില്‍ പൊതിഞ്ഞു് അടുപ്പിലിട്ടു് ചുട്ടു് ദിവസം രണ്ടുനേരം സേവിക്കുക.” മേമ്പൊടി ചേര്‍ക്കണമോ എന്നു് ഞാന്‍ ചോദിച്ചില്ല.

ആ സ്ത്രീക്കു് അഞ്ചു് പെണ്മക്കളായിരുന്നു. അവരെല്ലാവരും ഒറ്റയടിക്കു് എന്നപോലെ വിവാഹപ്രായത്തില്‍ എത്തിയപ്പോള്‍ അവരുടെ വിവാഹപ്രശ്നം പരിഹരിക്കാന്‍ മദ്യപാനമാണു് ഏറ്റവും എളുപ്പവഴി എന്നു് അവരുടെ കെട്ട്യോനു് തോന്നി. കുടിച്ചുകഴിഞ്ഞാല്‍ മുഴുവനും പെണ്മക്കളായതു് കെട്ട്യോളുടെ കുറ്റം കൊണ്ടാണെന്നും, അതു് ഭാര്യയെ ഇത്തിരി ഉറക്കെ പറഞ്ഞു് മനസ്സിലാക്കണമെന്നും, എന്നിട്ടും മനസ്സിലാവുന്നില്ലെങ്കില്‍ അതു് അടിച്ചേല്‍പ്പിക്കണമെന്നും അങ്ങേര്‍ക്കു് തോന്നും. അതുവഴി ഭാര്യ രോഗിണി ആയി മാറി. ഭര്‍ത്താവിന്റെ ബഹളം അയല്‍ക്കാരുടെ ultimatum വഴിയും, ഭാര്യയുടെ രോഗം സിദ്ധചികിത്സ വഴിയും ഭേദമായി. എങ്ങനെ ആയാലെന്താ, സംഗതി കോമഡി ആയി അവസാനിച്ചാല്‍ മതിയല്ലോ!

പച്ച മരുന്നുകളിലും വേരുകളിലുമൊക്കെ രോഗപ്രതിരോധശേഷിയുള്ള ഘടകങ്ങള്‍ തീര്‍ച്ചയായും ഉണ്ടാവും. അവ പഠനവിധേയമാക്കണം. അവ വേര്‍തിരിച്ചു് സംഭരിച്ചാല്‍ ആപല്‍ഘട്ടങ്ങളില്‍ ഉപയോഗിക്കാന്‍ കഴിയും. കീഴാനെല്ലിയിലും, മത്തങ്ങയിലും, പപ്പായയിലുമൊക്കെ ഔഷധഗുണങ്ങളുണ്ടാവാം. ആയുര്‍വേദസസ്യങ്ങള്‍ എല്ലായിടത്തും എല്ലാക്കാലത്തും വളരുന്നവയാവണമെന്നില്ല. പച്ചമരുന്നു് കിട്ടാനില്ലാത്തതുകൊണ്ടു് രോഗി ചത്തോട്ടെ എന്നതു് ആയുര്‍വ്വേദത്തിന്റെയും നിലപാടാവാനാവില്ലല്ലോ. ഒറ്റമൂലികൊണ്ടു് ഒരു രോഗം സുഖപ്പെട്ടാല്‍ നല്ല കാര്യം. പക്ഷേ, അതൊരു “ലോട്ടറി” അടിച്ചതോ, അതോ യഥാര്‍ത്ഥത്തില്‍ അതിനു് പിന്നില്‍ വസ്തുതകള്‍ ഉണ്ടോ എന്നറിയേണ്ടതു് പൊതുനന്മക്കു് ആവശ്യമാണെന്നു് തോന്നുന്നു. ഗവേഷണം ഏതു് ശാസ്ത്രത്തിന്റെയും വളര്‍ച്ചക്കു് ആവശ്യമാണു്. പേപ്പട്ടിവിഷത്തിനും, മസൂരിക്കും, ക്ഷയത്തിനുമൊക്കെ പരിഹാരം കണ്ടെത്തിയ മഹാത്മാക്കളും ഗവേഷണത്തിലൂടെ, അന്വേഷണത്തിലൂടെ ആണു് അതൊക്കെ നേടിയെടുത്തതു്. മാനവരാശിയുടെ നിലനില്‍പ്പു് തന്നെ അവരെപ്പോലുള്ളവര്‍ ഇല്ലായിരുന്നെങ്കില്‍ അപകടത്തിലാവുമായിരുന്നു എന്ന സത്യം മറക്കാതിരിക്കാനുള്ള പ്രാഥമികബാദ്ധ്യത നമുക്കുണ്ടു്.

ആയുര്‍വേദചികിത്സാരീതികളെ ആധുനിക മെഡിസിനേയും, ശാസ്ത്രത്തെയും മാതൃകയാക്കി നവീകരിക്കാനുള്ള യാതൊരു ശ്രമവും നടത്താന്‍ അതുമായി ബന്ധപ്പെട്ടവര്‍ തയ്യാറാവാതിരുന്നതുമൂലം, വൈദ്യന്‍ എന്ന പേരില്‍ ആര്‍ക്കും അതില്‍ കയറി നിരങ്ങാന്‍ കഴിയുന്ന ഒരവസ്ഥ സംജാതമാവുകയായിരുന്നു. സംസ്കൃതശ്ലോകങ്ങള്‍ വളരെ ശ്രദ്ധാപൂര്‍വ്വം വിവക്ഷിച്ചില്ലെങ്കില്‍ ഗൗരവതരമായ അര്‍ത്ഥവ്യത്യാസം വരാമെന്നതിനാല്‍ ആയുര്‍വേദപുസ്തകങ്ങള്‍ അതു് ആദ്യം ഭാഷാപരമായിത്തന്നെ സംശയത്തിനു് ഇടനല്‍കാത്തവിധത്തില്‍ പുനരാവിഷ്കരിക്കപ്പെടണം. അച്ഛനില്‍നിന്നും മകനിലേക്കു് പകര്‍ന്നുകൊണ്ടു് ഒരു ശാസ്ത്രത്തിനും അധികം വളരാന്‍ ആവില്ല.

ഗുരുവിന്റെ പ്രതിമയ്ക്കു് മുന്നില്‍ നിന്നു് അസ്ത്രവിദ്യ ശീലിച്ചു് അര്‍ജ്ജുനനേക്കാള്‍ കേമനായതിനു് ഏകലവ്യനോടു് ദ്രോണര്‍ ചോദിച്ച ഗുരുദക്ഷിണ അവന്റെ വലതുകയ്യുടെ തന്നെ പെരുവിരലായിരുന്നു! അതാണു് നമ്മുടെ പാരമ്പര്യം! തീര്‍ച്ചയായും ദ്രോണരുടെ പ്രവൃത്തി നീതീകരിക്കുന്നവരുണ്ടാവും. ഏതു് നിലപാടിനും അതിന്റേതായ ന്യായവാദങ്ങള്‍ കണ്ടെത്താന്‍ കഴിയുമെന്നതാണല്ലോ മനുഷ്യജീവിതത്തിന്റെ ഒരു പ്രത്യേകത! പക്ഷേ മനുഷ്യരില്‍ അന്തര്‍ലീനമായ കഴിവുകള്‍ പ്രോത്സാഹിപ്പിക്കപ്പെടണം. അല്ലെങ്കില്‍ വെറുതെ സിനിമയും സ്വപ്നവും കണ്ടു് ജന്മം പാഴാക്കുന്നതു് നൂറുകോടിയില്‍ മീതെ ജനങ്ങളായിരിക്കും.

 
 

മുദ്രകള്‍: , , ,

ദൈവവിശ്വാസവും, സ്വതന്ത്ര ഇച്ഛാശക്തിയും

ദൈവമുണ്ടോ? എനിക്കറിയില്ല. ദൈവമില്ലേ? അതുമറിയില്ല. അതു് എനിക്കു് ഒരു തലവേദനയേ അല്ല എന്നതാണു് കൂടുതല്‍ സത്യം. ദൈവമേ, നീയുണ്ടെങ്കില്‍, നീയുണ്ടെന്നു് മനുഷ്യര്‍ അറിയണമെന്നു് നിനക്കുണ്ടെങ്കില്‍ അതു് അവരെ അറിയിക്കേണ്ടതു് നിന്റെ ചുമതലയാണു്. നീയില്ലെങ്കില്‍ അതവരെ അറിയിക്കാന്‍ നിനക്കൊട്ടാവുകയുമില്ല! സര്‍വ്വശക്തനെ സഹായിക്കാന്‍ ഞാന്‍ ഒരു വിശ്വാസിയോ, “വിശുദ്ധ പീലാത്തോസോ” ഒന്നുമല്ല. എന്റെ വിശപ്പിനു് പരിഹാരം കാണാന്‍ തന്നെ ഞാന്‍ നന്നായി ബുദ്ധിമുട്ടുന്നുണ്ടു്. അതുതന്നെ താങ്ങാന്‍ എനിക്കാവുന്നുമില്ല. അപ്പോള്‍ പിന്നെ, സ്വര്‍ഗ്ഗത്തിലെ “ഒടുക്കത്തെ” കല്യാണവിരുന്നിലെ വീഞ്ഞു് ഫ്രാന്‍സിലെയോ, സൗത്താഫ്രിക്കയിലേയോ “പരംതീര്‍ന്ന” ഒരു വേനല്‍ക്കാലവര്‍ഷത്തിലെ വിളവെടുപ്പിന്റെ മുന്തിരിച്ചാറില്‍ നിന്നും ഉണ്ടാക്കിയതാണോ, സ്വര്‍ഗ്ഗീയതീന്മേശയിലെ വിളമ്പുകാരികള്‍ “അനാഘ്രാതകുസുമങ്ങളാണോ”, അവര്‍ “ഏതാഹാരത്തിനു് ഏതു് വീഞ്ഞു്” അനുയോജ്യം എന്നു് ശുപാര്‍ശ ചെയ്യാന്‍ പ്രാപ്തരാണോ എന്നൊക്കെ അന്വേഷിക്കാന്‍ ദിവസത്തില്‍ ഇരുപത്തിനാലു് മണിക്കൂറും സമയവും, അതിനൊക്കെ അത്യാവശ്യം വേണ്ടതില്‍ കൂടുതല്‍ ചില്ലറ പോക്കറ്റിലുമുള്ള ആത്മീയപിതാക്കളേപ്പോലെ എനിക്കെവിടെ നേരവും താല്പര്യവും? പക്ഷേ ഒന്നെനിക്കറിയാം. സ്വയംഭൂവായ ഒരു ദൈവമാണു് മനുഷ്യനെ സൃഷ്ടിച്ചതെങ്കില്‍ അങ്ങേര്‍ പണ്ടേ സ്വയം കഴുത്തു് ഞെരിച്ചു് ചത്തിട്ടുണ്ടാവും! ദൈവനാമത്തില്‍ പരസ്പരം കൊല്ലുന്ന മനുഷ്യരുടെ രൂപം തന്റെ പ്രതിരൂപമാണെന്ന തിരിച്ചറിയല്‍ സഹിക്കാന്‍ സാക്ഷാല്‍ ദൈവത്തിനു് പോലുമാവില്ല എന്നാണെന്റെ വിശ്വാസം. ദൈവത്തിന്റെ ഈ ആത്മഹത്യ തിരിച്ചറിഞ്ഞ ഒരു ചിന്തകന്‍ ഏതാണ്ടു് ഒരു നൂറ്റാണ്ടു് മുന്‍പേ വിളിച്ചുപറഞ്ഞിരുന്നു: “ദൈവം ചത്തു.” – (Friedrich Nietzsche). പക്ഷെ ശവമടക്കാന്‍ ആരും തയ്യാറായില്ല. കച്ചവടം അത്ര കേമമായിരുന്നു. പൊരിഞ്ഞ വില്‍പന നടക്കുന്ന ആത്മീയതെരുവുകളില്‍ നിന്നും അല്‍പം മാറിനില്‍ക്കുന്നവര്‍ ദൈവത്തിന്റെ ശവം ചീയുന്ന ദുര്‍ഗന്ധം മൂലം സ്ഥിരം മൂക്കുപൊത്താന്‍ തുടങ്ങിയിട്ടും ശവം സംസ്കരിക്കാനായി വിട്ടുകൊടുക്കാന്‍ അവര്‍ തയ്യാറില്ലായിരുന്നു. പ്രേമത്തിനു് കണ്ണിലെന്നു് മാത്രമല്ല, വിശ്വാസത്തിനു് മൂക്കില്ലെന്നുമുള്ള അറിവിന്റെ അടിത്തറയിലായിരുന്നു അവരുടെ ബാബേല്‍ ഗോപുരങ്ങള്‍ പണിതുയര്‍ത്തപ്പെട്ടിരുന്നതു്.

“ദൈവം!” ആ വാക്കിനു് ഇന്നു് എന്തെങ്കിലും ഒരര്‍ത്ഥമുണ്ടോ? പന്നിയുടെ മുന്നില്‍ മുത്തുകള്‍ വിതറരുതെന്നു് പണ്ടു് യേശു പറഞ്ഞു. “കുരങ്ങിന്റെ കയ്യില്‍ പൂമാല കൊടുക്കരുതു്” എന്നു് കാരണവാന്മാരും. ദൈവത്താല്‍ സ്ഥാപിക്കപ്പെട്ടതു് എന്നു് അവകാശപ്പെടുന്ന ഒരു മതത്തില്‍ ആദര്‍ശങ്ങളുടെയോ, വിശ്വാസങ്ങളുടേയോ (പണത്തിന്റേയോ, അധികാരത്തിന്റേയോ എന്നു് തിരുത്തി വായിക്കുക!) പേരില്‍ മറ്റൊരു വിഭാഗം രൂപമെടുക്കുന്ന അതേ നിമിഷത്തില്‍ ആ മതത്തിന്റെ എല്ലാ ദൈവികതയും എന്നേക്കുമായി നഷ്ടപ്പെടുകയാണു് ചെയ്യുന്നതു്. കാരണം, ദൈവത്തിന്റെ സമ്പൂര്‍ണ്ണത, അപ്രമാദിത്വം മുതലായ ചോദ്യം ചെയ്യപ്പെടാനാവാത്തതെന്നു് തലമുറകളിലൂടെ പഠിപ്പിക്കപ്പെട്ട ഗുണങ്ങളാണു് അവിടെ മറുപടിയില്ലാതെ പ്രതിക്കൂട്ടില്‍ നിന്നു് വിയര്‍ക്കേണ്ടി വരുന്നതു്.

ഒരു വ്യവസ്ഥയെ (system) അതിനുള്ളില്‍ നിന്നുകൊണ്ടു് പൂര്‍ണ്ണമായി അപഗ്രഥിക്കാനാവില്ല എന്നു് ശാസ്ത്രവുമായി ബന്ധപ്പെട്ടവര്‍ക്കറിയാം. അതിനു് ആ വ്യവസ്ഥക്കുള്ളിലെ മാനദണ്ഡങ്ങള്‍ മാത്രമേ ലഭ്യമാവൂ എന്നതാണു് അതിനു് കാരണം. മനുഷ്യര്‍ ഈ പ്രപഞ്ചത്തിന്റെ ഒരു ഭാഗം മാത്രമാണു്. നമ്മള്‍ സ്ഥാപിക്കാന്‍ ആഗ്രഹിക്കുന്ന ദൈവം അതേസമയം, നിര്‍വ്വചനപ്രകാരം ഈ പ്രപഞ്ചത്തെ വേണമെങ്കില്‍ അമ്മാനമാടാന്‍ വരെ കഴിയുന്ന എന്തോ ആണുതാനും. അതായതു്, സകല പ്രപഞ്ചങ്ങള്‍ക്കും അതീതമായ എന്തോ ഒരു കുന്ത്രാണ്ടം! വ്യത്യസ്തമായ ഈ രണ്ടു് തലങ്ങളെ ഭാവനയില്‍, സങ്കല്‍പ്പത്തില്‍ പരസ്പരം ബന്ധിപ്പിക്കുവാന്‍ കഴിയും. പക്ഷേ, ബുദ്ധിയുടെ പണിയായുധമായ യുക്തിയുടെ ഭാഷ അവിടെ അസ്ഥാനത്തായിരിക്കും. യുക്തിസഹമായ ഏതൊരു അപഗ്രഥനത്തിനും നമുക്കു് ഈ ലോകത്തിന്റെ അളവുകോലുകള്‍ മാത്രമേ ഉള്ളു. അവ ഉപയോഗിച്ചു് പ്രപഞ്ചത്തിനും അതീതമായ എന്തോ ഒന്നു് ഉണ്ടെന്നോ ഇല്ലെന്നോ “തെളിയിക്കാന്‍” ആവില്ല. അതിനാല്‍ ഈ ലോകത്തില്‍ ശരിയെന്നും നീതിയുക്തമെന്നും അറിയാവുന്ന കാര്യങ്ങള്‍ ദൈവാസ്തിത്വം “തെളിയിക്കാനോ നിരാകരിക്കാനോ” ആയി ഉദാഹരണങ്ങളാക്കുന്നതില്‍ യാതൊരു അര്‍ത്ഥവുമില്ല. “ദൈവം” എന്നതുകൊണ്ടു് ഇവിടെ ഉദ്ദേശിക്കുന്നതു് പ്രപഞ്ചം ഇതുവരെ പിന്നിട്ട വഴികളിലേക്കു് തിരിഞ്ഞുനോക്കാന്‍ ശ്രമിക്കുന്ന സാമാന്യവിദ്യാഭ്യാസവും പൊതുവിജ്ഞാനവുമുള്ള ഒരു മനുഷ്യന്‍ വഴിമുട്ടിനില്‍ക്കേണ്ടിവരുന്ന ഒരു cosmogonic ബിന്ദുവിന്റെ നീതീകരണമായേക്കാവുന്ന എന്തോ ഒന്നിനെയാണു്. അല്ലാതെ, വിജനമായ ഏതോ മരുഭൂമിയില്‍ ഒറ്റയ്ക്കു് ആടുകളെ മേയ്ക്കുന്ന ഒരു ആട്ടിടയനു് പ്രത്യക്ഷപ്പെടുമ്പോള്‍ സ്വയം അശുദ്ധനാവാതിരിക്കാന്‍ അവനോടു് ചെരിപ്പു് അഴിച്ചു് മാറ്റൂ എന്നു് കല്‍പ്പിക്കുന്ന ഒരു ദൈവത്തെയല്ല.

നഗ്നമായ നേത്രങ്ങള്‍ കൊണ്ടു് നമുക്കു് കാണാന്‍ കഴിയുന്ന light spectrum ചുവപ്പു് മുതല്‍ വയലറ്റ്‌ വരെയുള്ളതു് മാത്രമാണു്. ചുവപ്പിനു് താഴേക്കും, വയലറ്റിനു് മുകളിലേക്കുമുള്ള എത്രയോ തരംഗങ്ങളെ ഉപകരണസഹായമില്ലാതെ “കാണാന്‍” നമുക്കു് കഴിയില്ല. (ചില ജീവികള്‍ക്കു് അതിലൊരംശം കാണാന്‍ കഴിയും. തന്മൂലം, ഈ ഒരു കാര്യത്തില്‍ അവ മനുഷ്യരെക്കാള്‍ “മെച്ചമാണെന്നു്” വേണമെങ്കില്‍ പറയാം.) X-ray നമ്മള്‍ കാണുന്നില്ല. പക്ഷേ അവ ചികിത്സാരംഗത്തു് നല്‍കുന്ന സേവനം മറക്കാനാവുമോ? നിലനില്‍ക്കുന്നു എന്നു് ശാസ്ത്രീയ ഉപകരണങ്ങള്‍ വഴി മനുഷ്യര്‍ തന്നെ തെളിയിച്ച വസ്തുതകള്‍ ഇന്നു് ഏറെയാണു്. വെറും മുന്നൂറു് വര്‍ഷങ്ങള്‍ക്കു് മുന്‍പു് ജീവിച്ചിരുന്ന മനുഷ്യരുടെ ലോകത്തില്‍ “ഇല്ലാതിരുന്ന” പലതും ഇന്നത്തെ ലോകത്തില്‍ “ഉണ്ടു്”. ഞാന്‍ ഇതെഴുതുന്ന ഈ നിമിഷത്തില്‍ ലോകത്തില്‍ എവിടെയെങ്കിലും ഒരു ഭൂകമ്പം ഉണ്ടാവാം. അടുത്ത ഏതാനും ദിവസങ്ങളില്‍ മാധ്യമലോകവുമായി ബന്ധപ്പെടാതിരുന്നാല്‍ ആ വിവരം ഒരുപക്ഷേ ഒരിക്കലും ഞാന്‍ അറിയണമെന്നില്ല. ലോകത്തിലെ വിവിധ കോണുകളില്‍ ദിനംപ്രതി നടക്കുന്ന, എനിക്കു് അപ്രധാനമെങ്കിലും, ബന്ധപ്പെട്ടവരുടെ ജീവിതവുമായി വേര്‍പെടുത്താനാവാത്തവിധം കെട്ടുപിണഞ്ഞുകിടക്കുന്ന, ജനനമോ, മരണമോ, വിവാഹമോ പോലുള്ള കാര്യങ്ങള്‍ ഒരിക്കലും “എന്റെ ലോകത്തിലേക്കു്” പ്രവേശിക്കുന്നില്ല. മറ്റു് വാക്കുകളില്‍ പറഞ്ഞാല്‍, എന്റെ reality എന്നതു് വളരെ പരിമിതമാണു്. പുരാതനകാലങ്ങളില്‍ തത്വചിന്തകനും, ശാസ്ത്രജ്ഞനും, വൈദ്യനും ഒക്കെ പലപ്പോഴും ഒരാള്‍ തന്നെയായിരുന്നു. ബൌദ്ധികലോകം ഇന്നു് വളരെയേറെ വളര്‍ന്നുകഴിഞ്ഞു. വൈജ്ഞാനികവിഷയങ്ങളിലെ specialization മൂലം അവയുമായി ബന്ധപ്പെടുന്നവര്‍ പോലും മനസ്സിലാക്കുന്നതു് അവയിലെ വളരെ ചെറിയ ഒരംശം മാത്രമാണു്. ഇതൊക്കെയാണു് “അറിവു്” സംബന്ധിച്ച നമ്മുടെ അവസ്ഥ! എന്നിട്ടും, “ലോകാരംഭത്തിനു്” മുന്‍പും പിന്‍പുമുള്ള സകല “മുടിനാരിഴകളുടെയും” ഗതിയും, വിഗതിയും, വിധിയും നിര്‍ണ്ണയിക്കുന്ന ഒരു ദൈവത്തിന്റെ രൂപവും, മുഖച്ഛായയും, മനസ്സിലിരുപ്പും അറിയാമെന്നു് അവകാശപ്പെടാന്‍ എത്രമാത്രം അജ്ഞതയും, അഹംഭാവവും, അതിലുപരി തൊലിക്കട്ടിയും ഉണ്ടായാലാണു് സാധിക്കുക എന്നു് ചിന്തിച്ചാല്‍ മതി – ചിന്തിക്കാന്‍ കഴിയുമെങ്കില്‍!

ദൈവനാമം സംരക്ഷിക്കാനുള്ള പടപ്പുറപ്പാടുകള്‍ കാണുമ്പോള്‍ ഈ ലോകത്തില്‍ മാനുഷികമായ മറ്റു് പ്രശ്നങ്ങള്‍ ഒന്നുമില്ലേ എന്നു് സംശയിച്ചുപോകുന്നു. ഇവിടെ ദാരിദ്ര്യമുണ്ടു്, രോഗങ്ങളുണ്ടു്, അജ്ഞതയുണ്ടു്, ഉച്ചനീചത്വങ്ങളുണ്ടു്‍….. അവയൊന്നും പരിഹരിക്കാന്‍ ദൈവത്തിനു് കഴിവില്ല എന്നതിനു് ആയിരക്കണക്കിനു് വര്‍ഷങ്ങളിലെ ലോകചരിത്രം നമുക്കു് തെളിവു് നല്‍കുന്നുമുണ്ടു്. ഈ ദുരവസ്ഥയ്ക്കു് ലോകത്തില്‍ എവിടെയെങ്കിലും എന്തെങ്കിലും പരിഹാരം കാണാന്‍ കഴിഞ്ഞിട്ടുണ്ടെങ്കില്‍ അതു് മനുഷ്യപ്രയത്നം കൊണ്ടു് മാത്രം സാധിച്ചിട്ടുള്ളതാണു്. വിശ്വാസം കൊണ്ടുമാത്രം ഭൂമിയിലെ പ്രശ്നങ്ങള്‍ പരിഹരിക്കപ്പെടുകയില്ല എന്നു് മനസ്സിലാക്കുന്നതുതന്നെ ഒരു വലിയ ചുവടു് മുന്നോട്ടു് വയ്ക്കുന്നതിനു് തുല്യമാണു്.

നമ്മുടെ ഇച്ഛാശക്തി സ്വതന്ത്രമാണോ(free will)? തന്റെ പ്രവൃത്തികളുടെ ലക്‍ഷ്യം നിശ്ചയിക്കാനുള്ള സ്വാതന്ത്ര്യം മനുഷ്യന്റെ ഇച്ഛാശക്തിക്കുണ്ടോ? ഇച്ഛാശക്തിയുടെ പൂര്‍ണ്ണസ്വാതന്ത്ര്യം അവകാശപ്പെടുന്നതാണു് libertinism. അതേസമയം determinism മനുഷ്യരുടെ പ്രവൃത്തികള്‍ മുന്‍കൂട്ടി നിശ്ചയിക്കപ്പെട്ട കാരണങ്ങളാല്‍ സംഭവിക്കുന്നു എന്നു് വാദിക്കുന്നു. ethical determinism, theological determinism, cosmological determinism, historical determinism മുതലായ ഡിറ്റര്‍മിനിസത്തിന്റെ വിവിധ വകഭേദങ്ങള്‍ എല്ലാം ലോകത്തിലെ വസ്തുക്കളും സംഭവങ്ങളും അപവാദമെന്യേ അന്യോന്യമായ ആശ്രയത്തില്‍ പരസ്പരം ബന്ധിതമാണെന്ന അടിസ്ഥാനപരമായ ആശയത്തില്‍ അധിഷ്ഠിതമാണു്.

സ്വതന്ത്ര ഇച്ഛാശക്തിയെപ്പറ്റി നീറ്റ്‌സ്ഷെ പറയുന്നു: “free will എന്ന പ്രസിദ്ധ പദം തന്റെ തലയില്‍ നിന്നും തുടച്ചു് മാറ്റാന്‍ ആഗ്രഹിക്കുന്ന “പച്ചപ്പരമാര്‍ത്ഥി” ഒരുപടികൂടി മുന്നോട്ടുപോയി, അതിന്റെ വിപരീതമായ “unfree will” കൂടി സ്വന്തം തലയില്‍നിന്നും തുടച്ചുമാറ്റണം എന്നാണെന്റെ അപേക്ഷ. … കാരണവും കാര്യവും (cause and effect) ശുദ്ധമായ പദങ്ങളായി, അഥവാ നാമകരണത്തിനും, ആശയവിനിമയത്തിനുമുള്ള conventional fiction ആയി മാത്രമാണു്, അല്ലാതെ വ്യാഖ്യാനത്തിനായിട്ടല്ല ഉപയോഗപ്പെടുത്തേണ്ടതു്. “അതില്‍ തന്നെ” (“as such”) എന്നതില്‍ “ഹേതുകസമിതികളോ”, “അനിവാര്യതയോ”, “മനഃശാസ്ത്രപരമായ അസ്വാതന്ത്ര്യമോ” ഒന്നുമില്ല, അവിടെ “കാര്യം കാരണത്തെ” പിന്‍തുടരുന്നില്ല, അതിനെ ഒരു നിയമവും ഭരിക്കുന്നില്ല. കാരണവും, ക്രമാനുക്രമവും, പരസ്പരത്വവും, ആപേക്ഷികതയും, നിര്‍ബന്ധവും, സംഖ്യയും, നിയമവും, സ്വാതന്ത്ര്യവും, അടിസ്ഥാനവും ലക്‍ഷ്യവുമെല്ലാം കണ്ടുപിടിച്ചതു് നമ്മള്‍ മാത്രമാണു്, മറ്റാരുമല്ല. ചിഹ്നങ്ങളുടെ ആ ലോകത്തെ നമ്മള്‍ “as such” ആക്കി വസ്തുക്കളിലേക്കു് ആലേഖനം ചെയ്താല്‍, മിശ്രണം ചെയ്താല്‍, അതുവഴി നമ്മള്‍ ചെയ്യുന്നതു് നമ്മള്‍ എപ്പോഴും ചെയ്തുപോന്ന “mythology” തന്നെയായിരിക്കും. unfree will എന്നതു് mythology ആണു്.”

സ്വതന്ത്ര ഇച്ഛാശക്തിയെ ആധുനിക neuro-science-ഉം നിഷേധിക്കുന്നു. അതിന്‍പ്രകാരം, മനുഷ്യരുടെ പ്രവൃത്തികളുടെ autonomy വ്യക്തിനിഷ്ഠമായി അനുഭവപ്പെടുന്ന ഇച്ഛാശക്തിയിലല്ല, പ്രത്യുത ആന്തരിക പ്രേരകശക്തിയുടെ അടിസ്ഥാനത്തില്‍ പ്രവര്‍ത്തിക്കുവാനുള്ള തലച്ചോറിന്റെ കഴിവിലാണു് സ്ഥാപിതമായിരിക്കുന്നതു്. തലച്ചോറു്, അഥവാ പൂര്‍ണ്ണമായ മനുഷ്യനാണു് autonomous system, അനുഭവിക്കുന്ന “ഞാന്‍” അല്ല. താന്‍ ചെയ്യുന്ന കാര്യങ്ങള്‍ മുഴുവന്‍ തലച്ചോറിലെ limbic system വഴി വിലയിരുത്തപ്പെട്ടശേഷം അതിന്റെ ഫലം ഓര്‍മ്മയില്‍ (memory) നിക്ഷേപിക്കപ്പെടുന്നു. ഈ രണ്ടു് കേന്ദ്രങ്ങളും പ്രവൃത്തികളെ സംബന്ധിച്ചു് ബോധപൂര്‍വ്വമായ തീരുമാനം എടുക്കുന്ന കേന്ദ്രവുമായി (prefrontal cortex) ബന്ധപ്പെട്ടുകൊണ്ടു് നമ്മുടെ പെരുമാറ്റരീതികളുടെ നിയന്ത്രണം ഏറ്റെടുക്കുന്നു. ഈ മൂന്നു് കേന്ദ്രങ്ങളും വിവിധ സബ്കോര്‍ട്ടിക്കല്‍ കേന്ദ്രങ്ങളുമായി ബന്ധപ്പെട്ടതിനുശേഷം മാത്രമാണു് നമ്മുടെ യഥാര്‍ത്ഥ പെരുമാറ്റം എന്താവണമെന്ന തീരുമാനം അവിടെ രൂപമെടുക്കുന്നതു്. ശരീരഭാഗങ്ങളുടെ അനിയന്ത്രിത ചലനങ്ങള്‍ പലതും സംഭവിക്കുന്നതിനു് എത്രയോ മില്ലിസെക്കന്റുകള്‍ക്കു് മുന്‍പേ തന്നെ ആ ചലനവുമായി ബന്ധപ്പെട്ട തലച്ചോറിന്റെ ഭാഗങ്ങള്‍ active ആവുന്നുണ്ടു്. (ആ ചലനങ്ങളുടെ കാരണം പക്ഷേ ഈ activity അല്ല. വളരെ സങ്കീര്‍ണ്ണമായ ആ പ്രക്രിയ ഈ കുറിപ്പിന്റെ പരിധിക്കു് അതീതമായതിനാല്‍ ഇവിടെ ഒഴിവാക്കുന്നു.) ജന്മം മുതല്‍ (ഒരു ചെറിയ അംശം അതിനു് മുന്‍പും!) പിന്‍‌തുടരപ്പെടുന്ന ഈ പ്രക്രിയമൂലം തലച്ചോറിലെ memory-യില്‍ ഭീമമായ അനുഭവസമ്പത്തു് ശേഖരിക്കപ്പെടുന്നു. തികച്ചും ജന്മസിദ്ധമായ ചുരുക്കം ചില പെരുമാറ്റരീതികള്‍ ഒഴിവാക്കിയാല്‍, അനുഭവാധിഷ്ഠിതമായ “ഓര്‍മ്മസമ്പത്താണു്” മനുഷ്യരുടെ പെരുമാറ്റരീതികളുടെ അടിസ്ഥാനം. അതിന്റെ വെളിച്ചത്തില്‍, ഒരേ സാമൂഹികപരിതസ്ഥിതിയില്‍, ഭാഗികമായിട്ടെങ്കിലും വ്യത്യസ്തമായി പ്രതികരിക്കാന്‍ നമുക്കു് കഴിയുന്നു.

ചുരുക്കി പറഞ്ഞാല്‍, എന്തെങ്കിലും ചെയ്യുന്നതിനുള്ള യഥാര്‍ത്ഥ തീരുമാനം തലച്ചോറില്‍ രൂപമെടുക്കുന്നതു് ബോധപൂര്‍വ്വമല്ലാതെയാണു്. അതിനു് ആധാരമാവുന്നതു് ജനനം മുതല്‍ തലച്ചോറുതന്നെ സ്വയംപ്രേരിതമായി ശേഖരിക്കുന്ന അനുഭവസമ്പത്തും. ഏതെങ്കിലും വിധത്തില്‍ ഒരു വ്യക്തിയുടെ ജീവിതവുമായി ബന്ധപ്പെടാന്‍ എപ്പോഴെങ്കിലും ദൈവത്തിനു്, അഥവാ ദൈവചിന്തക്കു് കഴിഞ്ഞിട്ടുണ്ടെങ്കില്‍ തന്റെ “തീരുമാനങ്ങളില്‍” ആ ദൈവത്തിനു് കഴിഞ്ഞകാലങ്ങളില്‍ താന്‍ നല്‍കിയ “വിലയ്ക്കു്” അനുസൃതമായ ഒരു പങ്കു് തലച്ചോറു് നല്‍കിയിരിക്കും. ജീവനുതുല്യം സ്നേഹിക്കുന്നവരുടെ മരണം പോലുള്ള അനുഭവങ്ങള്‍ വളരെയേറെ പ്രാര്‍ത്ഥനകള്‍ക്കും യാചനകള്‍ക്കും ശേഷവും ഒഴിവാക്കാന്‍ കഴിയാതെ വരുമ്പോള്‍, ദൈവവിശ്വാസികള്‍ നിരീശ്വരവാദികളാവുന്നതും, നിരീശ്വരവാദികള്‍ ദൈവവിശ്വാസികളാവുന്നതും ഈ വസ്തുതകളുടെ വെളിച്ചത്തില്‍ മനസ്സിലാക്കാന്‍ ബുദ്ധിമുട്ടുണ്ടാവില്ല. മനുഷ്യന്റെ ദൈവമടക്കമുള്ള ലോകം അവന്റെ തലച്ചോറിന്റെ ഒരു നിര്‍മ്മിതി മാത്രമാണു്, മറ്റൊന്നുമല്ല.

 
8അഭിപ്രായങ്ങള്‍

Posted by on ജനുവരി 13, 2008 in മതം, ലേഖനം

 

മുദ്രകള്‍: , , , ,

സദാചാരത്തിനു് മതവിശ്വാസം വേണോ?

ഒരു സഹജീവി പ്രതിസന്ധിയെ നേരിടുമ്പോള്‍ അവനെ സഹായിക്കാന്‍ മനുഷ്യരെ പ്രേരിപ്പിക്കുന്ന അനുകമ്പ അല്ലെങ്കില്‍ സഹായസന്നദ്ധത ഒരു ജന്മവാസനയോ, അതോ മതവും ദൈവവിശ്വാസവുമൊക്കെ അതിനു് ആവശ്യമോ എന്നു് മനസ്സിലാക്കാന്‍ ബെര്‍ലിനിലെ ഒരു യൂണിവേഴ്സിറ്റിയില്‍ ഒരു പരീക്ഷണം നടത്തുകയുണ്ടായി. സജ്ജീകരണങ്ങള്‍ വളരെ ലളിതമാണു്. തനിയെ നടക്കാന്‍ ശീലിച്ചിട്ടു് അധികനാള്‍ ആയിട്ടില്ലാത്ത ഒരു കുഞ്ഞു് ഒരു മുറിയില്‍ കളിപ്പാട്ടങ്ങളുമായി കളിച്ചുകൊണ്ടിരിക്കുന്നു. മുറിയില്‍ ഒരു എഴുത്തു് മേശയും കസേരയും. അവിടെ ഇരുന്നു് ഒരാള്‍ (പിതാവോ, പരിചിതനോ ആവാം) എന്തോ എഴുതുന്നു. അല്‍പസമയത്തിനു് ശേഷം ആ കുഞ്ഞിനു് കാണത്തക്കവണ്ണം അയാള്‍ തന്റെ പെന്‍സില്‍ അബദ്ധത്തിലെന്നപോലെ തറയിലേക്കു് വീഴിക്കുന്നു. മേശയുടെ മുന്നിലായി വീഴുന്ന പെന്‍സില്‍ എഴുന്നേറ്റു് ചെന്നു് എടുക്കാതെ മേശയില്‍ കമിഴ്‌ന്നു് കിടന്നു് കൈനീട്ടി എടുക്കാന്‍ അയാള്‍ ശ്രമിക്കുന്നു. അതോടൊപ്പം, എത്ര ശ്രമിച്ചിട്ടും കൈ പെന്‍സിലിന്റെ അടുത്തു് എത്തുന്നില്ലാത്തപോലെ അയാള്‍ ഭാവിക്കുകയും ചെയ്യുന്നു. അയാളുടെ “നിസ്സഹായത” കാണുന്ന കുഞ്ഞു് അടുത്തുചെന്നു് പെന്‍സില്‍ എടുത്തു് അയാള്‍ക്കു് കൊടുക്കുന്നു!

ഏകദേശം ഒന്നര വയസ്സു് പ്രായമുള്ള ഒരു കുഞ്ഞിനു് മറ്റൊരാളുടെ നിസ്സഹായാവസ്ഥയില്‍ സഹായിക്കണമെന്നു് തോന്നുന്നതു് അതിനു് വേദോപദേശം ലഭിച്ചിട്ടുള്ളതുകൊണ്ടാവില്ല എന്നതു് എന്തായാലും തീര്‍ച്ചയാണു്. അങ്ങേയറ്റം ആ കുഞ്ഞു് അനുഭവം വഴി ഈ ദിശയില്‍ മനസ്സിലാക്കിയിട്ടുള്ള പാഠങ്ങള്‍, തന്റെ കളിപ്പാട്ടങ്ങളോ മറ്റോ താഴെ വീഴുമ്പോള്‍ മുതിര്‍ന്നവരില്‍നിന്നു് ലഭിച്ചിട്ടുള്ള സഹായങ്ങളിലൂടെ മനസ്സിലാക്കിയവ മാത്രമായിരിക്കും. മനുഷ്യര്‍ ദൈവവിശ്വാസികളല്ലാതായിത്തീര്‍ന്നാല്‍ ലോകത്തില്‍ സദാചാരബോധവും ധര്‍മ്മനീതിയും ഇല്ലാതായിത്തീരും, ഭൂമി പാപത്തില്‍ മുഴുകും മുതലായ മതാചാര്യന്മാരുടെ പതിവു് പല്ലവിയുടെ പൊള്ളത്തരത്തിലേക്കാണു് ഇതു് വിരല്‍ ചൂണ്ടുന്നതു്.

കുറ്റകൃത്യങ്ങളും അധര്‍മ്മവും ലോകത്തില്‍ എന്നുമുണ്ടായിരുന്നു, എന്നും ഉണ്ടായിരിക്കുകയും ചെയ്യും. (മഹാപ്രളയവും, തീമഴയുമൊക്കെ വേണ്ടപ്പോള്‍ വേണ്ടപോലെ സംഭവിപ്പിച്ചിട്ടും, ദൈവം പോലും തോറ്റു് പിന്‍വാങ്ങേണ്ടിവന്ന ഒരു മേഖലയാണതു്. ദൈവം തോല്‍ക്കുന്നിടത്തു് ഇടപെടാനാണു് മനുഷ്യന്‍ ഭൂമിയിലുള്ളതു്!) സമൂഹത്തിലെ സ്വൈര്യജീവിതത്തെ ഭീഷണിപ്പെടുത്തുന്ന പ്രവണതകളെ നേരിടാന്‍ പ്രതിരോധനടപടികളും, നിയമനിര്‍മ്മാണവും, ബോധവല്‍ക്കരണവുമൊക്കെയാണു് മാര്‍ഗ്ഗങ്ങള്‍. ബോധവത്കരിക്കപ്പെട്ട സമൂഹങ്ങളില്‍ പോലും മാനസികരോഗികളും, മതഭ്രാന്തന്മാരും ഇതൊക്കെയാണെങ്കിലും കുറ്റകൃത്യങ്ങള്‍ ചെയ്യാതിരിക്കുന്നുമില്ല. ഒരു പ്രളയം വഴി പ്രത്യുത്പാദനശേഷിയുള്ള “മൂന്നു് യുവവിശുദ്ധരേയും, മൂന്നു് യുവവിശുദ്ധകളെയും” മാത്രം രക്ഷപെടുത്തി ബാക്കി സകല “പാപികളേയും” മുക്കിക്കൊന്നാലും ഈ യുവവിശുദ്ധരൊ അവരുടെ സന്തതികളോ പാപം ചെയ്യാത്തവരായി തീരുമെന്നു് തോന്നുന്നില്ല. ഏറ്റവും ചുരുങ്ങിയതു് ആദ്യപാപമെങ്കിലും ആ വിശുദ്ധരും ചെയ്യേണ്ടിവരും. അല്ലാതെ കുഞ്ഞുങ്ങള്‍ ഉണ്ടാവില്ലല്ലോ! ലോകത്തില്‍ “പാപം” ഇല്ലാതിരിക്കാന്‍ ദൈവം മനുഷ്യരെ സൃഷ്ടിക്കാതിരുന്നാല്‍ മതിയായിരുന്നു. പക്ഷിമൃഗാദികള്‍ “തിന്നും തിന്നപ്പെട്ടും” അങ്ങനെയൊക്കെ അങ്ങു് ജീവിച്ചു് പോയേനെ. ഇനിയിപ്പോ പറഞ്ഞിട്ടു് ഒരു കാര്യവുമില്ല. ഒരബദ്ധം ദൈവത്തിനും പറ്റും എന്നു് കരുതി ആശ്വസിക്കാം. അല്ലാതെന്തു് ചെയ്യാന്‍?

ഒരുവിധത്തിലല്ലെങ്കില്‍ മറ്റൊരുവിധത്തില്‍ ദൈവവിശ്വാസവും, മതവിശ്വാസവും മനുഷ്യരുടെ ഇടയില്‍ പണ്ടുപണ്ടേ ഉണ്ടായിരുന്നു. അത്രയും പഴക്കം മറ്റു് യാതൊരു സാമൂഹികപ്രതിഭാസങ്ങള്‍ക്കും ഇല്ല എന്നുതന്നെ പറയാം. എന്നിട്ടും മനുഷ്യരെ നല്ലവരാക്കാന്‍ വിശ്വാസത്തിനു് ഇന്നോളം കഴിഞ്ഞില്ല. മനുഷ്യരിലെ പ്രകൃതിസഹജമായ വികാരങ്ങളെ പഴകി ദ്രവിച്ച ഏതെങ്കിലും വിശ്വാസപ്രമാണങ്ങളുടെ പേരില്‍ അടക്കാനും ഒതുക്കാനും നിര്‍ബന്ധിതരാവുന്നവരില്‍ അതേ വികാരങ്ങള്‍ പൊട്ടിത്തെറിക്കാനുള്ള സാദ്ധ്യത കൂടുതലായിരിക്കും. അതു് പലപ്പോഴും കുറ്റകൃത്യങ്ങളില്‍ അവസാനിക്കുകയും ചെയ്യും. അങ്ങനെയുള്ളവര്‍ സമൂഹത്തില്‍ പൊതുവേ ആസ്വദിക്കുന്ന “വിലയും നിലയും” മൂലം അവരുടെ യഥാര്‍ത്ഥ മുഖങ്ങള്‍ ജനങ്ങള്‍ക്കു് അജ്ഞാതമായിരിക്കും. അവരുടെ പീഡനങ്ങള്‍ക്കു് വിധേയരാവുന്നവര്‍ അധികവും സാമൂഹികമായി ബലഹീനരാണെന്നതിനാല്‍, സത്യം വെളിപ്പെടുത്തുന്നതില്‍ നിന്നും ഭയം അവരെ പലപ്പോഴും പിന്‍തിരിപ്പിക്കുന്നു. ഇനി ആരെങ്കിലും അതിനു് തന്റേടം കാണിച്ചാല്‍ സകല കുറ്റവും അവരില്‍ തന്നെ വച്ചുകെട്ടാനാവും സമൂഹത്തിലെ “കൊള്ളാവുന്നവരുടെ” ശ്രമം. ഏതെല്ലാമാണു് ഞാന്‍ ചെയ്യാന്‍ പാടില്ലാത്ത തെറ്റുകള്‍ എന്നു് എന്നെ പഠിപ്പിക്കുന്നവര്‍ അതേ തെറ്റുകള്‍ ചെയ്യുമ്പോള്‍ അവര്‍ കൂടുതല്‍ ശിക്ഷ അര്‍ഹിക്കുന്നു എന്ന സാമാന്യസത്യം അപ്പോള്‍ എന്തുകൊണ്ടോ വിസ്മരിക്കപ്പെടുന്നു. പീഡിപ്പിക്കപ്പെട്ടവരെ വിലകൊടുത്തു് വാങ്ങുന്നതും ഈ മേഖലയിലെ ഒരു “ബിസിനസ്‌” തന്ത്രമാണു്. അമേരിക്കയില്‍ കത്തോലിക്കാമതത്തിലെ പുരോഹിതരുടെ പീഡനങ്ങള്‍ക്കു് ബാല്യകാലത്തില്‍ വിധേയരാവേണ്ടി വന്നവര്‍ക്കു് സഭ ഈ അടുത്തയിട നഷ്ടപരിഹാരമായി കൊടുക്കേണ്ടിവന്നതു് നൂറുകണക്കിനു് കോടി ഡോളറാണു്! വര്‍ഷങ്ങള്‍ക്കു് ശേഷമാണെങ്കിലും അവര്‍ക്കു് കുറേ പണം ലഭിച്ചു എന്നതു് സത്യം. പക്ഷേ ലൈംഗികപീഡനം വഴി എന്നേക്കുമായി നശിപ്പിക്കപ്പെട്ടതു് അവരുടെ ജീവിതങ്ങളായിരുന്നു. ഇന്നും ആ trauma-യുമായി പൊരുതേണ്ടി വരുന്നവരാണു് അവരില്‍ പലരും!

ഒരു വിശ്വാസപ്രമാണത്തിനുള്ളില്‍ ഒതുക്കാവുന്നതാണോ മനുഷ്യരിലെ ഹോര്‍മോണിന്റെ പ്രേരണാശക്തി? വിവാഹിതരല്ലാത്ത, ആണും പെണ്ണുമായ എത്ര “ആത്മീയര്‍ക്കു്” നെഞ്ചില്‍ കൈവച്ചുകൊണ്ടു് പറയാന്‍ കഴിയും, തങ്ങള്‍ ലൈംഗികമായി “ശുദ്ധരാണെന്നു്”? അടിവസ്ത്രങ്ങള്‍ക്കു് സംസാരശേഷി ലഭിച്ചാല്‍ തീരുന്നതല്ലേ അവരുടെ സകല വിശുദ്ധിയും? മറ്റുള്ളവരുടെ മുന്നില്‍ നല്ലപിള്ള ചമയുന്ന ഈ കാപട്യം എന്തിനുവേണ്ടി? കുഴിയിലേക്കു് കാലുനീട്ടി കഴിഞ്ഞവരല്ലാത്ത “കന്ന്യാസ്ത്രീകളെ” വിരലിലെണ്ണാന്‍ പോലും യൂറോപ്പിലെ പല രാജ്യത്തിലും ഇന്നു് കാണാനാവുകയില്ല! ചത്തൊടുങ്ങിക്കൊണ്ടിരിക്കുന്ന ഒരു “വര്‍ഗ്ഗമാണു്” കന്ന്യാസ്ത്രീകള്‍ എന്നു് ചുരുക്കം. എന്തുകൊണ്ടു് കേരളത്തില്‍ ഈ അവസ്ഥ ഇല്ല? ഭക്തികൊണ്ടാണെന്നു് ഒരുപക്ഷേ അവര്‍ പറയും. കാരണം അതാണു് അവരുടെ സമൂഹം അവരില്‍ നിന്നും പ്രതീക്ഷിക്കുന്നതു്. ക്രിസ്തീയതയുടെ വിളഭൂമിയായിരുന്ന യൂറോപ്പില്‍ ഇല്ലാത്ത ക്രിസ്തുഭക്തി എങ്ങനെ കേരളത്തില്‍ വന്നു? സ്വന്തമായി ജോലിചെയ്തു്, വ്യക്തിത്വം പണയം വയ്ക്കാതെ, കുത്തുവാക്കുകള്‍ കേള്‍ക്കാതെ, “തെറിച്ചവള്‍” എന്നു് മുദ്രകുത്തപ്പെടാതെ, കേരളീയ സമൂഹത്തില്‍ മഠം ഉപേക്ഷിക്കുന്ന ഒരു കന്ന്യാസ്ത്രീക്കു് ജീവിക്കാന്‍ കഴിയുമായിരുന്നെങ്കില്‍, കേരളത്തിലെ മഠങ്ങള്‍ക്കും യൂറോപ്പിലെ സ്ഥിതി തന്നെ വരുമായിരുന്നു. യാതൊരു സംശയവും വേണ്ട. (കത്തോലിക്കാസമുദായത്തിലെ പാതിരികളുടെയും കന്ന്യാസ്ത്രീകളുടെയും കൂട്ടുത്തരവാദിത്വം എനിക്കുള്ളതുകൊണ്ടല്ല ഇതു് പറയുന്നതു്. അവരായി, അവരുടെ പാടായി! മറ്റു് രാജ്യങ്ങളില്‍ നിലവിലിരിക്കുന്ന അവസ്ഥ കേരളീയനും മനസ്സിലാക്കിയിരിക്കുന്നതുകൊണ്ടു് തെറ്റൊന്നുമില്ല എന്നൊരു തോന്നല്‍, അത്രമാത്രം!) ജീവജാലങ്ങളുടെ നൈസര്‍ഗ്ഗികതക്കെതിരായ ജീവിതരീതിയെ “സ്വയംവരിച്ചു്”, പ്രകൃതിവിരുദ്ധതയെ ആത്മീയതയെന്നു് തെറ്റിദ്ധരിച്ചു് ആത്മപീഡനം അനുഭവിക്കുന്ന, സ്വന്തം “ദൈവത്തിന്റെ” പീഡാനുഭവങ്ങള്‍ തന്റെ മാതൃകയും ആദര്‍ശവുമായി വിശ്വസിക്കുന്ന ഒരു വ്യക്തിക്കു്, സഹജീവികളുടെ നിര്‍മ്മലമായ സന്തോഷത്തില്‍ ആനന്ദിക്കാനാവില്ല. അതു് അവനില്‍ ഉണര്‍ത്തുന്നതു് അസൂയയുടെ, അസഹിഷ്ണുതയുടെ നീറ്റലായിരിക്കും. ലൗകികമായ എല്ലാ സുഖങ്ങളും സാത്താന്‍ കണക്കുകൂട്ടി നടപ്പിലാക്കുന്ന ചതികളായേ അവനു് മനസ്സിലാവൂ. സന്തോഷിക്കുന്നവരെ അവരുടെ സന്തോഷത്തില്‍നിന്നും പിന്‍‌തിരിപ്പിക്കാനാവും അവന്റെ സകല പ്രയത്നവും.

സ്ത്രീകള്‍ക്കു് സുരക്ഷാബോധത്തോടെ വഴിനടക്കാനോ, ബസിലോ, പ്ലെയിനില്‍ പോലുമോ ലൈംഗികപീഡനങ്ങള്‍ അനുഭവിക്കാതെ യാത്ര ചെയ്യാനോ കഴിയാത്ത അവസ്ഥ നിലവിലിരിക്കുന്ന ഒരു സമൂഹത്തില്‍ എന്തു് സദാചാരബോധം? എന്തു് ധര്‍മ്മനീതി? അന്യസ്ത്രീയെ പീഡിപ്പിക്കുന്ന യോഗ്യനു് “ചാരിത്ര്യം” നഷ്ടപ്പെടുന്നില്ലെന്നുണ്ടോ? ആണിനു് വേണ്ടാത്ത ചാരിത്രശുദ്ധി എന്തിനു് പെണ്ണിനു്? ഒന്നുകില്‍ രണ്ടു് കൂട്ടര്‍ക്കും. അല്ലെങ്കില്‍ ആര്‍ക്കും വേണ്ട. അത്ര ലളിതമാണതു്. ചാരിത്രശുദ്ധിപോലും! കന്ന്യാചര്‍മ്മം! മാങ്ങാത്തൊലി! ഏതു് നൂറ്റാണ്ടിലാണു് നമ്മള്‍ ജീവിക്കുന്നതു്? ലൈംഗികത ആണിനു് വേണം, പെണ്ണിനു് വേണ്ട എന്നാണോ? എങ്കില്‍ ലോകം പണ്ടേ മനുഷ്യശൂന്യമായേനെ!

ബസിലെ ആള്‍ത്തിരക്കില്‍ ആരും കാണുന്നില്ലെന്ന ബോധത്തോടെ ഒരു സ്ത്രീയുടെ ശരീരത്തില്‍ ഒന്നു് തോണ്ടി ലൈംഗികദാഹം ശമിപ്പിക്കുന്ന പുരുഷന്മാര്‍ ജീവിക്കുന്ന ഒരു സമൂഹത്തിനു് ദൈവം, ആത്മാവു്, അദ്ധ്യാത്മികത, ചാരിത്ര്യം മുതലായ പദങ്ങള്‍ ഉച്ചരിക്കാനുള്ള അവകാശം പോലുമുണ്ടെന്നു് എനിക്കു് തോന്നുന്നില്ല. സ്വന്തം അമ്മയെ, ഭാര്യയെ, മകളെ, സഹോദരിയെ അവരുടെ അനുവാദമില്ലാതെ തോണ്ടാന്‍ വഴിയേ പോകുന്നവര്‍ക്കൊക്കെ വിട്ടുകൊടുക്കുന്നവരാവണം നാണംകെട്ട ഈ “ആസ്ഫാള്‍ട്ട്‌ റോമിയോസ്‌”! അല്ലെങ്കില്‍, സ്വന്തം പുരുഷത്വത്തിനു് ഒരു തോണ്ടലിന്റെ മാത്രം വില നല്‍കുന്ന ഈ “അന്ധകാമുകര്‍” തോണ്ടുന്ന സ്ത്രീകള്‍ ആരുടെയോ അമ്മയോ, ഭാര്യയോ, മകളോ, സഹോദരിയോ ഒക്കെ ആണെന്നു് മനസ്സിലാക്കാന്‍ അവര്‍ക്കു് കഴിയേണ്ടതായിരുന്നു.

അതിനേക്കാളൊക്കെ കഷ്ടമാണു് കൊച്ചുകുട്ടികളെ വികൃതമായ ലൈംഗികതക്കു് വിധേയമാക്കാന്‍ പള്ളികളിലും, വായനശാലകളിലും, കുട്ടികള്‍ ഒറ്റക്കു് എത്തിപ്പെടാന്‍ സാദ്ധ്യതയുള്ള മറ്റു് പൊതുസ്ഥലങ്ങളിലും കാത്തിരിക്കുന്ന ആത്മീയഗുരുക്കളും, അമ്മാവന്മാരും, മറ്റു് അഭ്യുദയകാംക്ഷികളും! സ്വന്തം മക്കളെങ്കിലും ലൈംഗികമായി പീഡിപ്പിക്കപ്പെടരുതെന്നു് ആഗ്രഹിക്കുന്ന മാതാപിതാക്കള്‍ ഈ വസ്തുതകള്‍ അറിഞ്ഞിരുന്നാല്‍ നന്നു്.

 
 

മുദ്രകള്‍: , ,

അണുബാധയും ആരോഗ്യപരിപാലനവും

ഏതാനും മാസങ്ങള്‍ക്കു് മുന്‍പു് കേരളത്തിലെ ആശുപത്രികളില്‍ അണുബാധ ഉണ്ടായപ്പോള്‍ എഴുതിയതാണിതു്. അന്നെനിക്കു് ബ്ലോഗോ, ഞാന്‍ എഴുതുന്നതു് പ്രസിദ്ധീകരണയോഗ്യമായി കരുതിയിരുന്ന ആനുകാലികങ്ങളോ ഇല്ലായിരുന്നു. അതിനാല്‍ അതു് Hard Disk-ന്റെ Hades-ല്‍ പുനര്‍ജനി കാത്തു് കിടക്കേണ്ടി വന്നു. “ചൊറിതണം പിടിച്ചടിക്കണം ഈ മലയാളിയെ” എന്ന പോസ്റ്റും അതില്‍ സൂരജ്‌ ഇട്ട യുക്തമായ ഒരു കമന്റും വായിച്ചപ്പോള്‍, “ദാ, ഞാന്‍ ഇവിടെയുണ്ടേ” എന്നൊരു വിളി എന്റെ കമ്പ്യൂട്ടറിലെ “മൃതന്മാരുടെ ലോകത്തില്‍” നിന്നും! അതു് കേട്ടപ്പോള്‍ ആ ആത്മാവിനു് ഒരു പുനര്‍ജന്മം നല്‍കാമെന്നു് കരുതി. virus infection-നുമായി ബന്ധമുള്ളതുകൊണ്ടും, ഒരു കമന്റിന്റെ പരിധിയില്‍ ഒതുങ്ങാത്തതുകൊണ്ടും വെട്ടിച്ചുരുക്കാതെ ഒരു പോസ്റ്റാക്കി ഇവിടെ നവജന്മം നല്‍കുന്നു. “ആശുപത്രികളിലെ അണുബാധ” എന്നായിരുന്നു ആദ്യജന്മത്തിലെ പേരു്.

എന്റെ കൈവശം 1996-ലെ ഒരു ഇംഗ്ലീഷ്‌-ഇംഗ്ലീഷ്‌-മലയാളം ഡിക്‍ഷ്‌ണറിയുണ്ടു്.* കേരളത്തിലെ ചില ആശുപത്രികളില്‍ അണുബാധയുണ്ടായതായി കേട്ടപ്പോള്‍, ഈ അണുവിനെ അടുത്തറിയാനായി ആ ഗ്രന്ഥം ഒന്നു് തുറന്നു് നോക്കാമെന്നു് കരുതി. സ്വാഭാവികമായും ബാക്റ്റീരിയ എന്ന പദമാണു് ആദ്യം തേടിയതു്. ഏകവചനമായ bacterium ജീവാണു, രോഗാണു എന്നും, ബഹുവചനം bacteria എന്നും രേഖപ്പെടുത്തിയിരുന്നു. അങ്ങു് മുകളില്‍ ശൂന്യാകാശത്തില്‍ dark matter-ന്റെ അസ്തിത്വം കണ്ടെത്തിയ ശാസ്ത്രജ്ഞന്റെ സന്തോഷമായിരുന്നു എനിക്കു്! കാരണം, സാധാരണഗതിയില്‍ തേടുന്നതു് കാണാന്‍ കഴിയാത്തതും, തേടാത്തവ കാണേണ്ടിവരുന്നതും ഈ ഗ്രന്ഥത്തിന്റെ സ്വഭാവഗുണമായതിനാല്‍, കഴിയുമെങ്കില്‍ അതു് ഉപയോഗിക്കരുതെന്നു് ഞാന്‍ എന്നെ പഠിപ്പിച്ചിരുന്നു. infection-നു് virus-ഉം കാരണമാവാം എന്നതിനാല്‍ ആ വാക്കുകൂടി നോക്കാം എന്നു് കരുതിയപ്പോഴാണു് ഞാന്‍ വളരെ നേരത്തെയാണു് സന്തോഷിച്ചതെന്നു് മനസ്സിലായതു്. 1040-ാ‍മത്തെ പേജിലെ viceroy-യോടു് വിട പറഞ്ഞ എന്നെ നേരിട്ടതു് 1073-ാ‍മത്തെ പേജിലെ wolf ആണു്! അതായതു്, ആഗ്രന്ഥത്തില്‍ 32 പേജുകള്‍ ഇല്ല. ബൈന്റ്‌ ചെയ്തപ്പോല്‍ പിണഞ്ഞ അബദ്ധമോ, “കടലാസ്‌ ലാഭിക്കാന്‍” ചെയ്ത സൂത്രമോ എന്നറിയില്ല. viceroy-ക്കും, wolf-നും ഇടയ്ക്കു് വരാവുന്ന ഏതെങ്കിലും ഒരു വാക്കു് തേടേണ്ടതായ ആവശ്യം ഇതിനു് മുന്‍പു് എനിക്കു് ഉണ്ടായിട്ടില്ല എന്നതിനാല്‍, ഈ തട്ടിപ്പു് അറിയാന്‍ ഇതുവരെ എനിക്കു് കഴിഞ്ഞില്ല. അതാണു് കേരളത്തിന്റെ ഒരു പ്രത്യേകത! കേരളത്തിലെ ഒരു ഉത്പന്നം ഒരിക്കല്‍ വാങ്ങിയവന്‍ പിന്നീടു് ഒരു കേരളീയ ഉത്പന്നം വാങ്ങാതിരിക്കാന്‍ ശ്രദ്ധിക്കും. ഒരു മുന്‍കരുതല്‍ അത്രതന്നെ! quality control എന്ന ഒരേര്‍പ്പാടു് കേരളീയനു് അജ്ഞാതമാണല്ലോ! ഒരു സ്ക്രൂഡ്രൈവര്‍ അവനു് പ്ലൈയേഴ്സും, വെട്ടുകത്തിയും, കോടാലിയുമാണു്. ഒക്കുമെങ്കില്‍ ചെവിതോണ്ടിയും പല്ലുകുത്തിയും അതുകൊണ്ടുതന്നെ ഒപ്പിക്കും! കേരളീയ workmanship-ന്റെ “മേന്മ” മൂലമാവാം, ഇപ്പോള്‍ തൂങ്ങിമരിക്കാനുള്ള കയറുതന്നെ കഴിയുമെങ്കില്‍ തമിഴ്‌നാട്ടില്‍നിന്നും “ഇറക്കുമതി” ചെയ്യാനാണു് കേരളീയനു് താത്പര്യം. തമിഴന്റെ കയറില്‍ തൂങ്ങിയാല്‍ പൊട്ടിവീഴാതെ ചാവുമെന്നെങ്കിലും ഉറപ്പുണ്ടു്!

“അണുഗവേഷണം” മതിയാക്കി കേരളകൗമുദിയുടെ online edition വായിക്കാമെന്നു് കരുതി. ജന്മനാട്ടില്‍ പുതിയ അഴിമതിയോ, അണുബാധയോ, കയ്യേറ്റമോ, കയ്യാങ്കളിയോ ഉണ്ടാവുന്നതു് ഞാന്‍ അറിയാതെ പോകരുതു്. അതില്‍ “പാവം അണുക്കള്‍” എന്നൊരു ലേഖനം കണ്ടു.** “അച്‌ഛനിച്‌ഛിച്ചതും വൈദ്യന്‍ വിധിച്ചതും പാലു്! വായിച്ചു, മനം കുളുര്‍ക്കെ! ഒരു മരണപരമ്പര സൃഷ്ടിക്കാന്‍ തക്ക ശേഷിയൊന്നും ബാക്റ്റീരിയക്കില്ലെന്നും, ആഹരിക്കുക, വിസര്‍ജ്ജിക്കുക, പ്രത്യുത്പാദനം നടത്തുക എന്നിവയൊഴികെ മറ്റു് യാതൊരു ദുരുദ്ദേശവും അവയ്ക്കില്ലെന്നും ആ ലേഖനത്തില്‍ നിന്നും മനസ്സിലാക്കി. അതിപ്പോള്‍ ഒരു പ്രശ്നമോ? ഈ മൂന്നു് കാര്യങ്ങളല്ലാതെ മറ്റൊന്നും മലയാളികളും ചെയ്യാറില്ലല്ലോ! പിന്നെ എങ്ങനെ ഈ അണുബാധ കേരളസമൂഹത്തെ പിടിച്ചുകുലുക്കി ഭയത്തിലാഴ്ത്താന്‍ മാത്രം വളര്‍ന്നു് പന്തലിച്ചു? അതു് മോഡേണ്‍ മെഡിസിന്‍ തെറ്റു് മറച്ചുപിടിക്കാന്‍ നടത്തിയ ഒരു പ്രോപഗാന്‍ഡ ആയിരുന്നു എന്ന വാര്‍ത്ത ശരിയായിരിക്കുമോ? തെറ്റു് സമ്മതിക്കല്‍ ചിലര്‍ക്കെങ്കിലും പരാജയപ്പെടലാണു്. അതു് മനസ്സിലാക്കാം. തെറ്റു് സമ്മതിച്ചതുകൊണ്ടാണു് ആദാമും ഹവ്വായും പറുദീസയില്‍ നിന്നു് പുറത്താക്കപ്പെട്ടതുതന്നെ! മനുഷ്യന്റെ സ്വയംപരിപാലനദാഹത്തെ സഹായിക്കാനായി ഭാവിയിലെങ്കിലും മനുഷ്യന്‍ തെറ്റു് സമ്മതിക്കാതിരിക്കുകയാണു് വേണ്ടതെന്നതും നീതീകരിക്കാം. എന്നിട്ടും എന്തോ ഒരു അസ്വസ്ഥത! ഒരഭിപ്രായം കേട്ടാല്‍, എല്ലാവരും അതേ അഭിപ്രായക്കാരാണോ, അതോ, ചിലരെങ്കിലും അതിനു് വിപരീതമായ അഭിപ്രായം രേഖപ്പെടുത്തിയിട്ടുണ്ടോ എന്നു് അന്വേഷിക്കണമെന്ന, വിശപ്പും ദാഹവും പോലെ എന്നെ പിടി കൂടിയിരിക്കുന്ന, ഒരുതരം രോഗമാണു് ഈ അസ്വസ്ഥതയുടെ കാരണം. എന്റെ ഭാഗ്യത്തിനും, ഭാരത്തിനുമെന്നേ പറയേണ്ടൂ, ആകാശത്തിനു് മുകളിലും, താഴെയുമുള്ള മിക്കവാറും എല്ലാ കാര്യങ്ങളെപ്പറ്റിയും ആരെങ്കിലും, എന്നെങ്കിലും, എന്തെങ്കിലുമൊക്കെ പറഞ്ഞിട്ടും, കുറിച്ചുവച്ചിട്ടുമുണ്ടുതാനും. നിരോധനം ലംഘിച്ചു് പഴം പറിച്ചുതിന്നു് അതിന്റെ സ്വാദു് മറ്റുള്ളവരെ എഴുതി അറിയിച്ചതിന്റെ പേരില്‍ “ദൈവങ്ങള്‍” കൊന്നുകളഞ്ഞവരും അവരുടെ ഇടയില്‍ വിരളമല്ല. പക്ഷേ, എനിക്കു് അവരെ വളരെ ബഹുമാനമാണു്. കാരണം, അവരില്ലായിരുന്നെങ്കില്‍ ഞാന്‍ ഇപ്പോള്‍ ആയിരിക്കുന്നതിനേക്കാള്‍ വളരെയേറെ മണ്ടനായിരുന്നേനെ!

കോടാനുകോടി ബാക്റ്റീരിയ നമുക്കു് ചുറ്റും വസിക്കുന്നുണ്ടെങ്കിലും, ഒരു ബാക്റ്റീരിയക്കടലിലാണു് നമ്മുടെ കിടപ്പും നടപ്പുമെങ്കിലും, എന്തുകൊണ്ടു് നമ്മള്‍ “പച്ചപ്പടക്കനേന്നു്” ചത്തുവീഴുന്നില്ല എന്നു് ലേഖകന്‍ ചോദിക്കുന്നു. ഈ ചോദ്യം ലാഘവബുദ്ധിയോടെയല്ല അദ്ദേഹം ചോദിക്കുന്നതെന്നു് ഞാന്‍ ആത്മാര്‍ത്ഥമായും ആശിക്കുന്നു. കാരണം, 1347 മുതല്‍ 1351 വരെയുള്ള വെറും നാലു് വര്‍ഷങ്ങളില്‍ പശ്ചിമയൂറോപ്പിലെ മൂന്നിലൊന്നു് ജനങ്ങളുടെ (ഏകദേശം 250 ലക്ഷം മനുഷ്യര്‍!) ജീവന്‍ അപഹരിച്ച പ്ലേഗിനെപ്പറ്റി കേട്ടിട്ടുള്ളവര്‍, അണുബാധയും, പകര്‍ച്ചവ്യാധിയും, ശുചിത്വമില്ലായ്മയും, പരിസ്ഥിതിമലിനീകരണവുമൊന്നും ലാഘവബുദ്ധിയോടെ കാണുമെന്നു് കരുതാന്‍ എനിക്കു് കഴിയുന്നില്ല. പ്ലേഗില്‍ മരിച്ചവര്‍ അഗതികളും, ചേരിപ്രദേശത്തുള്ളവരും മാത്രമായിരുന്നില്ല. രാജാവും, രാജ്ഞിയും, കര്‍ദ്ദിനാളും, ബിഷപ്പുമെല്ലാം Black Death-നു് മുന്‍പില്‍ അടിയറ വയ്ക്കേണ്ടിവന്നു. അങ്ങേയറ്റം ശ്രദ്ധിക്കാതിരുന്നാല്‍ മനുഷ്യര്‍ കൂട്ടത്തോടെ മരിച്ചുവീഴാമെന്നു് നമ്മള്‍ മനസ്സിലാക്കിയിരിക്കുന്നതു് നല്ലതാണു്.

മാരകമായ രോഗങ്ങള്‍ ഉള്ളവരും, ഇല്ലാത്തവരുമായ മനുഷ്യരും മൃഗങ്ങളും യഥേഷ്ടം തുറസ്സായി നിക്ഷേപിക്കുന്ന മലവും മൂത്രവും കഫവും ഛര്‍ദ്ദിയും മഴയിലൊലിച്ചു്, വെയിലിലുണങ്ങി, കാറ്റില്‍ പറന്നു് അന്തരീക്ഷത്തില്‍ “തുല്യമായി” വിതരണം ചെയ്യപ്പെടുന്ന തെരുവുകളിലൂടെ ഉന്തുവണ്ടിയില്‍ ആഹാരങ്ങള്‍ വില്‍ക്കുന്നവരില്‍ നിന്നും അതു് വാങ്ങി കഴിക്കുന്നവര്‍ ഉടനെയോ, ഭാവിയിലോ രോഗബാധിതരാവുന്നുണ്ടോ, അതുവഴി മരിക്കുന്നുണ്ടോ എന്നൊക്കെ ആരാണു് പഠിക്കുന്നതു്? പരിശോധിക്കുന്നതു്? ആഹാരം അധികപങ്കും തിളച്ച വെള്ളത്തില്‍ വേവിച്ചും, എണ്ണയില്‍ പൊരിച്ചുമൊക്കെയാണു് വില്‍ക്കുന്നതു് എന്നതു് അതിലെ രോഗാണുക്കള്‍ നശിക്കുന്നതിനു് സഹായകമാവുന്നുണ്ടാവാം. ചെറുപ്പം മുതലേ അതുപോലുള്ള സാഹചര്യങ്ങളില്‍ വളരുന്ന മനുഷ്യരില്‍ ശരീരത്തിന്റെ രോഗപ്രതിരോധശക്തിയും അതിനനുസരിച്ചു് വളരുന്നുണ്ടാവാമെന്നതു് ഒരു പരിധി വരെയെങ്കിലും രോഗങ്ങളെ ചെറുത്തുനില്‍ക്കാന്‍ കഴിയുന്നതിന്റെ കാരണവുമാവാം. ചൂടുകൂടിയ രാജ്യങ്ങളില്‍ ബാക്റ്റീരിയ തണുത്ത രാജ്യങ്ങളേക്കാള്‍ വേഗത്തില്‍ പെരുകുമെന്നതിനാല്‍ കൂടുതല്‍ ശ്രദ്ധിക്കുകയാണു് വേണ്ടതു്. AIDS-നെതിരെ പൂര്‍ണ്ണവിജയം നേടാന്‍ ഇന്നും കഴിഞ്ഞിട്ടില്ലെന്ന വസ്തുതയുടെ വെളിച്ചത്തില്‍, ഒരു മ്യൂട്ടേഷന്റെ ഫലമായി രൂപമെടുത്തേക്കാവുന്ന പുതിയ ബാക്റ്റീരിയയുടെയോ, വൈറസിന്റെയോ ആക്രമണത്തെ പ്രതിരോധിക്കാന്‍ ഉടനടി മനുഷ്യനു് കഴിയണമെന്നില്ല. മനുഷ്യരില്‍ പരിഭ്രാന്തി സൃഷ്ടിക്കരുതെന്ന അത്രതന്നെ പ്രാധാന്യമേറിയതാണു് അപായസാദ്ധ്യതകളെ അവഗണിക്കരുതെന്നതും! ഒരു ചെറിയ അംശം ഭയം നല്‍കിയാണു് പ്രകൃതി ജീവജാലങ്ങളെ ഭൂമിയില്‍ ആക്കിയിരിക്കുന്നതു്. അതു് നിലനില്‍പിനു് അനുപേക്ഷണീയവുമാണു്. (അതൊരു ബലഹീനതയല്ല. പക്ഷേ, മനുഷ്യന്റെ ഓരോ ചിന്തയും, ഓരോ പ്രവൃത്തിയും നിരന്തരം വീക്ഷിക്കപ്പെടുന്നു എന്നു് പഠിപ്പിക്കപ്പെടുമ്പോള്‍, ഭയം പിന്‍തുടരല്‍ഭീതിയായി, കുറ്റബോധമായി പരിണമിക്കുന്നതുമൂലം അതൊരു ബലഹീനതയായി മാറുന്നു എന്നു് മാത്രം! “വീക്ഷകനായ” ഒരു big brother-നെ പ്രതിനിധീകരിക്കുന്നവര്‍ക്കു് മനുഷ്യനെ ആജ്ഞാനുവര്‍ത്തിയാക്കാന്‍ തന്മൂലം വലിയ ബുദ്ധിമുട്ടുമില്ല.)

വേണ്ടത്ര വൈദഗ്ദ്ധ്യമോ, പരിശീലനമോ ഇല്ലാതെ, എന്തിനും ഏതിനും മാരകമായ മരുന്നുകള്‍ കോരിയൊഴിച്ചു് വിളനിലത്തെ വിഷനിലമാക്കുന്നതും, മുന്‍പു് സൂചിപ്പിച്ച മലിനീകരണങ്ങളുമൊക്കെ ജനങ്ങളുടെ ആരോഗ്യത്തെ പ്രതികൂലമായി ബാധിക്കുന്നുണ്ടോ എന്നും, അമ്മമാര്‍ ചാപിള്ളകളേയും, വളര്‍ച്ചയെത്താത്ത കുഞ്ഞുങ്ങളേയുമൊക്കെ പ്രസവിക്കുന്നതിനു് കാരണമാവുന്നുണ്ടോ എന്നുമൊക്കെ അറിയാന്‍, വേണ്ടത്ര പഠനം നടത്തുവാന്‍, കേരളത്തില്‍ ആര്‍ക്കെവിടെ സമയം? വളര്‍ച്ചയെത്താതെ ജനിക്കുന്ന കുഞ്ഞുങ്ങള്‍ ജീവിച്ചിരിക്കാനുള്ള സാദ്ധ്യത കുറവാണെന്നതു്, അവര്‍ക്കോ, മറ്റു് കുഞ്ഞുങ്ങള്‍ക്കോ അണുബാധയുണ്ടാവുന്നതിന്റെ നീതീകരണമാവുകയില്ല. കുഞ്ഞുങ്ങളായാലും, മുതിര്‍ന്നവരായാലും, രോഗികള്‍ കിടക്കുന്ന മുറികള്‍ അണുവിമുക്തമായി സൂക്ഷിക്കുവാനുള്ള കടമ ജീവനക്കാര്‍ക്കുണ്ടു്. ശുചിത്വത്തിനും, ആരോഗ്യപരിപാലനത്തിനും തടസ്സമായി നില്‍ക്കുന്നതു് സന്ദര്‍ശകരുടെ എണ്ണമോ, പെരുമാറ്റമോ, മറ്റെന്തുതന്നെയോ ആയാലും, അതിനെതിരായ പ്രതിരോധ നടപടികള്‍ സ്വീകരിച്ചു് നടപ്പാക്കാനുള്ള കടമ മാത്രമല്ല, അധികാരവും, അവകാശവും ജീവനക്കാര്‍ക്കുണ്ടായിരിക്കണം. ജോലിയുടെ സാങ്കേതിക വശങ്ങള്‍ അറിയുന്നതും, അറിയേണ്ടതും ജോലിക്കാരാണു്, സന്ദര്‍ശകരല്ല.

ജനനം മുതല്‍ മരണം വരെ മനുഷ്യര്‍ നേരിടേണ്ടിവരുന്നതു് ശത്രുതാപരമായ ചുറ്റുപാടുകളെയാണു്. മനോഹരമായ പ്രകൃതിയുടെ മറുവശം ക്രൂരമാണു്. പിഴയ്ക്കുന്ന ഒരു ചുവടു് അവസാനചുവടായി മാറാം. എത്ര ശ്രദ്ധിച്ചാലും വേണ്ടത്ര ശ്രദ്ധിച്ചില്ല എന്നും വരാം. മനുഷ്യനു് ശ്രദ്ധിക്കാന്‍ കഴിയാത്ത ഒട്ടേറെ കാര്യങ്ങളുടെ ചുമതല ഏറ്റെടുക്കാന്‍ പ്രകൃതി തയ്യാറായിരുന്നില്ലെങ്കില്‍ യുഗങ്ങളിലൂടെയുള്ള യാത്ര മനുഷ്യന്‍ അതിജീവിക്കുമായിരുന്നോ എന്നുതന്നെ സംശയിക്കേണ്ടിയിരിക്കുന്നു. ഉദാഹരണത്തിനു്, മനുഷ്യശരീരത്തില്‍ രോഗപ്രതിരോധത്തിനുള്ള സജ്ജീകരണങ്ങള്‍ ഇല്ലായിരുന്നെങ്കില്‍ പണ്ടേ മനുഷ്യര്‍ അണുക്കളുടെ ആക്രമണഫലമായി ഭൂമുഖത്തുനിന്നും അപ്രത്യക്ഷമായേനെ! ചര്‍മ്മവും, ശ്ലേഷ്മപാളികളും അണുക്കള്‍ ശരീരത്തില്‍ കടക്കാതെ നമ്മെ സംരക്ഷിക്കുന്നു. ബോധപൂര്‍വ്വമായ നമ്മുടെ പങ്കാളിത്തം പോലും പലപ്പോഴും അതിനു് ആവശ്യമില്ല. തുമ്മല്‍, ചുമ മുതലായ reflex വഴി സ്വയംപ്രേരിതമായി ശരീരം നമ്മെ അപകടകരമാവുമായിരുന്ന എത്രയോ സാഹചര്യങ്ങളില്‍ നിന്നു് രക്ഷപെടുത്തുന്നു. അണുക്കളിലെ പ്രയോജനകരമായവയെ ശരീരത്തില്‍ കുടിയിരുത്താനും, അല്ലാത്തവയെ നശിപ്പിക്കാനുമുള്ള ശേഷി യുഗങ്ങളിലൂടെ പ്രകൃതി മനുഷ്യരില്‍ വളര്‍ത്തിയെടുക്കുകയായിരുന്നു. എന്തെങ്കിലും കാരണത്താല്‍ സ്വന്തം പ്രതിരോധശേഷി കുറഞ്ഞവരില്‍ കയറിപ്പറ്റുന്ന ബാക്റ്റീരിയയെയും, വൈറസിനെയുമൊക്കെ ചെറുക്കാന്‍ ശരീരത്തിനു് കഴിയാതെ വരുന്നതിനാലാണു് അതു് രോഗത്തിനു് നിദാനമായിത്തീരുന്നതു്.

മനുഷ്യനെ കൊല്ലാനൊന്നും കഴിയില്ലെങ്കിലും ബാക്റ്റീരിയയുടെ വിസര്‍ജ്ജ്യം വിഷമാണെന്നു് ലേഖകന്‍ പറയുന്നു. പക്ഷേ, മനസ്സിനിണങ്ങി ഒന്നു് കക്കൂസില്‍ പോകാം എന്ന ലക്‍ഷ്യവുമായല്ല അണുക്കള്‍ ശരീരത്തില്‍ കയറിപ്പറ്റുന്നതു്. സ്വയം മിടുക്കര്‍ എന്നു് കരുതുന്ന ചില മനുഷ്യര്‍ സമൂഹസ്വത്തായ വനഭൂമി കയ്യേറുന്നതുപോലെ, ആതിഥേയശരീരത്തില്‍ കുടിയേറിപ്പാര്‍ത്തു് പെരുകുകയാണു് പരോപജീവികളായ അവയുടെ ലക്‍ഷ്യം. അതിനു് അവ സ്വീകരിക്കുന്ന മാര്‍ഗ്ഗങ്ങള്‍ അങ്ങേയറ്റം വിഭിന്നവുമാണു്. കൂണ്‍ജാതികള്‍ (fungi), ആദിമജീവികള്‍ (protozoans), വിരകള്‍, കൃമികള്‍, ബാക്റ്റീരിയ, വൈറസ്‌ മുതലായ എത്രയോ പാരസൈറ്റുകള്‍ക്കു് ഓരോന്നിനും സ്വന്തവളര്‍ച്ച സാദ്ധ്യമാക്കിത്തീര്‍ക്കാന്‍ അവയുടേതായ പ്രത്യേകരീതികളുണ്ടു്. വളരാനും വംശം വര്‍ദ്ധിപ്പിക്കാനും ഒരു ആതിഥേയശരീരം കൂടാതെ കഴിയില്ലെന്നതാണു് ഇവക്കെല്ലാം പൊതുവായ സ്വഭാവം. കൃമികള്‍ക്കു് അവയുടെ ജീവിതത്തിന്റെ ഒരു ഘട്ടത്തില്‍ സ്വതന്ത്രമായി ജീവിക്കാന്‍ കഴിയുമ്പോള്‍, വൈറസിനു് നിലനില്‍ക്കാനും, പെരുകാനും ജീവനുള്ള ഒരു സെല്ലില്‍ പ്രവേശിക്കാതെ സാധിക്കുകയില്ല. ബാക്റ്റീരിയകളില്‍ പലതിനും അതേസമയം, കുറേനാളത്തേക്കു് ജീവനില്ലാത്ത പദാര്‍ത്ഥങ്ങളിലും ജീവിക്കാനും വളരാനും കഴിയും.

ഒരു virus infection ഉദാഹരണമായി എടുക്കാം. പ്രൊട്ടീന്‍ ഉറയില്‍ പൊതിഞ്ഞ ഒരു ജീന്‍ മാത്രമാണു് വൈറസ്‌! ചലിക്കാന്‍ പോലും കഴിയാത്ത വൈറസിനു് “പെരുകുക” എന്നതല്ലാതെ മറ്റെന്തെങ്കിലും ഒരു ലക്‍ഷ്യമോ കഴിവോ ഇല്ല. അതിനുപോലും ജീവനുള്ള ഒരു സെല്ലില്‍ പ്രവേശിക്കാതെ അതിനു് കഴിയുകയുമില്ല. സ്പര്‍ശനം വഴിയോ മറ്റോ ഒരു സെല്‍ പ്രതലത്തിലെത്തിയാല്‍, തന്റെ “മൈക്രൊ കാലുകള്‍” കൊണ്ടു് ആ സെല്‍ തനിക്കു് കുടിയേറാന്‍ അനുയോജ്യമോ എന്നു് വൈറസ്‌ – രാസപരമായിട്ടാവാം – പരിശോധിക്കുന്നു. അനുയോജ്യമെങ്കില്‍ തന്റെ പല്ലുകള്‍ സെല്‍ഭിത്തിയില്‍ കടിച്ചുപിടിച്ചുകൊണ്ടു് ഭിത്തി തുരന്നു് ഉറയില്‍ പൊതിഞ്ഞിരുന്ന ജീന്‍ (DNA) സെല്ലിനുള്ളിലേക്കു് ഒഴുക്കുന്നു. അതോടെ വൈറസിന്റെ ജീവിതലക്‍ഷ്യം നിറവേറ്റപ്പെട്ടു! അതിനുശേഷം ഉറ നശിക്കുന്നു. അകത്തുകടന്ന ജീന്‍ (അഥവാ ഉറയില്ലാത്ത വൈറസ്‌!) സെല്‍-DNA-യുടെ ഇടയിലെത്തി അതിനോടു് പറ്റിച്ചേരുന്നു. സെല്‍ പ്രവര്‍ത്തനങ്ങളെ നിയന്ത്രിക്കുന്ന കോഡില്‍ അതുവഴി വ്യത്യാസം വരുന്നതിനാല്‍ പുതിയ പ്രൊട്ടീനുകള്‍ നിര്‍മ്മിക്കാന്‍ ലഭിക്കുന്ന നിര്‍ദ്ദേശം അനുസരിച്ചുകൊണ്ടു്, “ചതി” മനസ്സിലാക്കാതെ, തങ്ങള്‍ക്കു് ആവശ്യമെന്ന ധാരണയില്‍ സെല്‍-DNA “പ്രൊട്ടീനുകള്‍” നിര്‍മ്മിക്കുന്നു! അവ സെല്ലില്‍ കുടിയേറിയ വൈറസിന്റെ തനിപ്പകര്‍പ്പുകളാണെന്നു് മാത്രം! തിരുത്തപ്പെട്ട കല്‍പനകളാണു് തങ്ങള്‍ക്കു് ലഭിക്കുന്നതെന്നു് തിരിച്ചറിയാതെ, ആത്മഹത്യാപരമായി, സെല്‍-DNA സ്വന്തം വിഭവശേഷി മുഴുവന്‍ വൈറസിന്റെ (ഉറസഹിതമുള്ള!) കോപ്പികള്‍ നിര്‍മ്മിക്കാന്‍ വിനിയോഗിക്കുന്നു. ഏതാനും മിനുട്ടുകള്‍ക്കുള്ളില്‍ സെല്‍ മരിക്കുന്നു. അങ്ങനെ രൂപമെടുക്കുന്ന വൈറസുകള്‍ അടുത്ത സെല്ലുകളിലേക്കു് കുടിയേറുന്നു. ബാക്റ്റീരിയയും, കൂണുകളും, കൃമികളുമൊക്കെ അവയുടെ സ്വന്തമായ മാര്‍ഗ്ഗങ്ങളിലൂടെ പരോപജീവിതം വിജയകരമാക്കാന്‍ ശ്രമിക്കുന്നു.

അണുബാധ നിരുപദ്രവകരമായ എന്തോ ആണെന്ന ധാരണ സാമാന്യജനങ്ങളില്‍ ഉണ്ടായേക്കാവുന്ന തരത്തിലുള്ള പ്രതികരണങ്ങള്‍ ഉത്തരവാദിത്വമുള്ളവരില്‍ നിന്നും ഉണ്ടാവാന്‍ പാടില്ലാത്തതാണു്. ആരോഗ്യപൂര്‍വ്വം ജീവിക്കുവാന്‍ ശുചിത്വം എത്രമാത്രം പ്രധാനപ്പെട്ടതാണെന്നു് ജനങ്ങളെ പഠിപ്പിക്കുകയാണു് ആവശ്യം. “പട്ടിയും, പൂച്ചയും, കാക്കയും മക്കളെ ലേബര്‍ റൂമില്‍ പ്രസവിക്കാഞ്ഞിട്ടും അവയുടെ വംശം നശിക്കുന്നില്ലാത്തതുകൊണ്ടു്” മനുഷ്യര്‍ അവയെ അനുകരിക്കണമെന്നില്ല. കാരണം, മനുഷ്യര്‍ മൃഗങ്ങളല്ല. ചേരിപ്രദേശങ്ങളിലെ കുഞ്ഞുങ്ങള്‍ അണുബാധയേറ്റു് മരിക്കുന്നില്ല (!?) എന്നതിനാല്‍, എല്ലാ കുഞ്ഞുങ്ങളേയും അവിടേക്കു് പറഞ്ഞുവിടുകയല്ല, സ്വന്തകുറ്റത്താലല്ലാതെ ചേരികളില്‍ ജനിക്കേണ്ടിയും ജീവിക്കേണ്ടിയും വരുന്നവരെ വിദ്യാഭ്യാസം നല്‍കി, ബോധവല്‍ക്കരിച്ചു് അവിടെനിന്നു് രക്ഷപെടേണ്ടതിന്റെ ആവശ്യം സ്വയം ബോദ്ധ്യമാവുന്ന നിലയിലേക്കു് വളര്‍ത്തിക്കൊണ്ടു് വരികയാണു് വേണ്ടതു്. യുഗങ്ങളിലൂടെ അക്ഷരവിരോധം ദൈവവിധിയായി തലയില്‍ അടിച്ചേല്‍പിച്ചവരെ അതില്‍നിന്നും ഒറ്റയടിക്കു് മോചിപ്പിക്കാനാവില്ല. മൃഗങ്ങള്‍ക്കു് മനുഷ്യരേക്കാള്‍ സ്ഥാനവില കല്‍പിക്കുന്ന ഒരു സമൂഹത്തില്‍ മനുഷ്യര്‍ മൃഗങ്ങളേപ്പോലെ ജീര്‍ണ്ണിക്കേണ്ടിവരുന്നതു് നീതീകരിക്കപ്പെട്ടു എന്നും വരാം. പക്ഷേ, സമൂഹത്തിലെ ഉയര്‍ന്ന സ്ഥാനങ്ങളില്‍ എത്തിച്ചേര്‍ന്നവര്‍ ഉയരാന്‍ കഴിയാതെ പോയവര്‍ക്കു് വഴി കാണിക്കുമ്പോള്‍, കാലാനുസൃതമായ അറിവിന്റെ പിന്‍ബലം അവര്‍ക്കുണ്ടായിരിക്കേണ്ടതാണു്.

———————————-
* English-English-Malayalam Dictionary, T. Ramalingampillai, 46th Edition, D.C. Books 1996

** പാവം അണുക്കള്‍: ചിറ്റാറ്റിന്‍കര എന്‍. കൃഷ്ണപിള്ള വൈദ്യകലാനിധി, നേത്രവൈദ്യവിശാരദ്‌, Kerala Kaumudi online Edition 15.05.2007

 

മുദ്രകള്‍: , , ,